Ambe engajtsïni jorhendajka juchaari Kueraajpiri úsïndi eskachi ambakiti erokuarhikua ma jatsiaka

Tata Diosï kʼamajkuati no sési úrichani

“Engaksï no ambarhati kʼuiripuecha uánijka ísï eska uitsakua na kánijka, ka engaksï iámindu no sési úricha tsïpajka, jindeesti parakaksï kʼamajkunhaaka para méntkisï” (SALMO 92:7).

Eskachi na exekia máteru jorhenguarhikua jimbo, parhakpinirhu sánderu no sési jánhaskuarhixati. Joperu i ambejtsïni no jatsisti para ístu pakatani, jimboka Biblia uandaspkia ixú 2 Timoteo 3:1-5 jimbo, eska últimu jurhiatikuecha jimbo kʼuiripu kánikua no sési jásï ambe úpiringa. Joperu, ¿últimu jurhiatikuecha ambeeri? Parhakpiniri ma engaksï uinintaka kʼuiripuecha engaksï no janhanharhijka Tata Diosïni ka engaksï no sési jásï ambe újka. No ióni jimbo, Tata Diosï kʼamajkuauati imani kʼuiripuechani engaksï no uékajka jurajkuani no sési járhati jánguechani. Ima kʼuiripuechajkusïksï pakaraati echerirhu engaksï uékaaka kurhajchani Tata Diosïni. Ísï eska na uandajka Salmo 37:29, “echeri jurhimbiticheriuati, ka jimaksï irekaati para méntkisï”.

Tata Diosï kʼamajkuati Satanasini

“Tata Diosï enga pínandikua íntspijka no ióni jimbo chʼatandurhiati Satanasini” (ROMANOS 16:20, TNM).

Enga Satanasi, demoniuecha ka iámindu kʼuiripu no sési úricha kʼamajkunhaaka, jimajkani kʼóru pínandikua jauati Echerirhu. Juchaari Kueraajpirijtsïni aiachisïndi: “No nema chérauati” (Miqueas 4:4).

Tata Diosï kʼamajkuauati pʼamenchakuechani ka uarhikuani

Tata “Diosï kutsunharhikuauati iámindu uekua ka nóteru jauati uarhikua ka ni uandanhiata ka nóteru nema ueraati o pʼamenchani” (JAŊASKUECHA [APOCALIPSIS] 21:4).

Tata Diosï sési peentaati iámu no sési jásï ambe enga Satanasi, Adáni ka Eba ka ambe engachi jucha úka pekaduni jimbo. Ísï jimbo, nóteru jauatia kómu nitamakua ambe, ni pʼamenchakuecha, asta uarhikua jamberi nóteru jauatia. Imeecha engaksï xénchaaka ka kurhajchani juchaari Kueraajpirini, irekaatiksï para méntkisï. Joperu, ¿naniksï irekaa?

Juchaari Kueraajpiri paraisu ma úntaati Echerini

“Desiertu ka echeri kʼarhiri kánikuaksï tsípini jauati, ka pákua enga no ma ambe újka tsikini, tsípini jauati ka ísï tsïpaati komueska asafrani” (ISAÍAS 35:1).

Enga Tata Diosï kʼamajkuaka no sési jásï ambeni, Echeri paraisu máeuati. Sési járhati parkichaksï jauati ka jardinicha iápurisï ka echeri kánikua tʼirekua íntspiati (Salmo 72:16). Maricha, laguecha ka riuechaksï pímbinhanharhiksï jauati ka kánikua ambe jatamiati. Kʼuiripuechaksï úkuarhiauati kʼumanchikuechani ka jimaksï irekaati. Nóteru nema pobriuatia, ni no jatsikuarheni tʼirekua o xanharu jimbo ísï irekani (Isaías 65:21, 22).

Tata Diosï tsítaantauati imeechani engaksï uarhikia

Tsíntaatiksï uarhiricha (UKUECHA [HECHOS] 24:15).

¿Uékapirintsï ménderu tsípiti exeani chaari familiarichani ka amiguechani engaksï uarhikia? Enga Echeri paraisu máeuakia, Tata Diosï enga Iámu ambe Újka Úni, tsítantauati. ¡Eranhaska je na engajtsï xáni sési pʼikuarheraaka engajtsï exeantauaka ka engajtsï míteantauaka! Biblia xarhatasïndi eskaksï tsíntaspka sapiicha ka kʼératicha ka eskaksï ménderu imeecheri familiecha jingoni jarhaspka. Ka tata Jesukristu tsítantaspti máru kʼuiripuechani uánikuechani japarini (Lukasʌ 8:49-56; Juanu 11:11-14, 38-44).