Jukari sieni uéxurhini tátsekua, ístu Tata Diosï kastigarispti juramukua Juda anapuni enga suri japka. Tata Diosïri profetecha arhiasptiksï juramutichani ambe enga úkuarhipiringa, máruksï jakajkuspti ka jánguarhintasptiksï para jurhimberantani iretani. Ma eranhikua jindesti, enga juramuti Josiasi kʼamajkupka kómarhikuani engaksï diosï úkatechani úkuauenga, ka enga sési jántskantaspka ménderu Jeobaeri templuni. Engaksï sési jántskantani japka templuni, exentasptiksï karakata ma enga Tata Diosï Moisesini íntskupka. Josiasi kánikua tsípispti i ambe jimbo, ka sánderu jánguarhintaspti para sóntku kʼamajkuni kómarhikuani engaksï diosï úkatechani úkuauenga.

Joperu imecha engaksï juramupka tátsekua, nóksï májkueni jámaspti. Isï jimbosï Jeoba jurajkupti eskaksï Babiloniuecha inchakupiringaksï Juda ka eskaksï kʼamajkupiringa Jerusalenini ka ístu templuni. Imecha engaksï tsípiti pakarapka, Babiloniaksï pánhaspti ka Tata Diosï uandaspti eska setenta uéxurhini nitamapiringa parakaksï ménderu úpiringa kʼuanhatsentani imecheri iretarhu. Iámindu i uéxurhinicha nóteru nema irekapirindi Juda.

19. Jerusaleni kʼamajkunhasïndi ka judiuecha Babiloniaksï pánhasïndi 607 a. de J.