Ambe enga kurhanguarhijka ima enga arhintajka

¿Andichisï jatsi para kristianuecha jingontku úraani aplikasionichani engaksï jindeeka para mensajicha?

▪ Máru erachichaksï úrasïndi teknologiani paraksï uandajpani imeri familiarichani o máteru Testiguechani. Ísïsti, erachicha engaksï eratsekua jukariika kurhajchasïndiksï ini konsejuni: “Ima enga exeparini jámajka exesïndi eska peligru jarhaska ka kéndikukuarhisïndi, joperu imecha engaksï no jánhastiika nóksï kéndikukuarhisïndi ka no sésiksï úkuarhinchasïndi” (Prov. 27:12).

Míteskachi eskajtsïni Jeoba uékasïnga kuájchakuni. Ísï jimbo nóchi kúnguarhisïnga imecha jingoni engaksï újka eskachi no májku kʼéri jauaka, engaksï petanhantaka kúnguarhikuarhu o imecha jingoni engaksï imani ambe jorhentpijka enga no ísïika (Rom. 16:17; 1 Kor. 5:11; 2 Juanu 10, 11). Jamberi máru kʼuiripuecha engaksï tánguarhijka kúnguarhikua jingoni, nóksï kurhajchaajti Tata Diosïri juramukuechani (2 Tim. 2:20, 21). No xáni úkua jukasti erakuni nécha jingonchi kúnguarhia enga ma exeani jarhajka kʼuiripuechani, joperu úkua jukasïndi erakuani engachi úrajka aplikasionichani mensajiri parachi amiguechani erakuani.

Engachi eratseni jaka kʼéri grupu ma jingoni inchani enga mensajirika, ju je kurhamarhikuarhini né jingonchi xáni kúnguarhia. Máru erachichaksï ini járhati grupurhu jarhaspti ka kánikuaksï no sési uéranchaspti. ¿Néna uá ma exeparini jámani engaksï grupurhu ma uánikua kʼuiripuecha jauaka? Méntku ma no úpirindi míteni né jindeskiksï inde kʼuiripuecha ka na engaksï jásï ma pájperakua jatsika Tata Diosï jingoni. Salmo 26:4 arhisïndi: “No kúnguarhisïnga imani kʼuiripuecha jingoni engaksï tsitijka chkuanderani ka nijtuni jámajka imecha jingoni engaksï jiskajka na engaminduksï jásïka”. Ísï jimbo ambe enga sánderu sési jaka, jindeesti imantku kʼuiripuecha jingontku uandajperani engaksï jucha meru míteaka.

Asta grupu sapirhaticha jimbo, jatsiskachi para exeparini jámani tiempu jingoni engachi úraaka parachi mensaji axaani o imani ambe jingoni enga jima uandanhaaka. Nóchi jatsiska para iámindu mensajichani mókuantani ambe uéjkiriksï uandani ka na uéjki xáni tiempu uandontskuarhenhani. Pablu arhispti Timoteuni eska exeparini jámapiringa imani kʼuiripuecha jingoni engaksï pʼíndepka uandatspini ka iápurisïksï uékani inchakutspini (1 Tim. 5:13). Ini jurhiatikuecha jimbo, i ambejtu úpirindi úkuarhini interneti jimbo.

Kristianuecha engaksï eratsekua jukariika, nóksï kurhauasïndi nijtuksï uandatsïajka máteru Testiguechani, oksï uandantani imani ambe enga no jatsika para mítekurhini (Sal. 15:3; Prov. 20:19). Nóksï kurhajchasïndi nijtuksï etsakujki imani ambe engaksï no seguru jarhajka eska ísïska (Efes. 4:25). Juchari pájinarhu jw.org ka programecharhu JW Broadcasting^® engaksï mándani kutsï uérajka, ambakiti informasionichi jatsiska enga Bibliarhu pʼitakata jaka ka enga mintsinharhikueka.

Máru Testiguechaksï úraasïndi aplikasionichani engaksï mensajirika paraksï íntspikuarhi, piáni ka para aianhpikuarhini ambe ma para íntspikuarhini o para ánchikuarhita ma aiatspeni, i ambe ánchikuarhiteri ambesti ka no jatsisti para jeuekuarhini Jeobaeri kómarhikua jingoni. Erachicha engaksï no uéjka jukari ambe jatsikuarheni, nóksï úraasïndi máteru erachichani paraksï sánderu sentabu andani (Ebr. 13:5).

¿Ka uáchi úraani ini aplikasioni mensajirichani para sentabu kurhajkuarhini para erachichani jarhuataani engaksï uétarhinchani jauaka o para imecha engaksï jimesïsï irekaka enga no sési ambe úkuarhika? Jimbokachi xénchaasïnga erachichani, jánguarhintasïngachi uinhaperantaani ka jarhuataani engaksï uétarhinchani jauaka (Sant. 2:15, 16). Joperu engachi imani grupuni ma úraska engachi uánikua kʼuiripuecha jaka, enbesi jarhuatani ójkutanchi japiringa Beteliri o orhejtsïkuticheri ánchikuarhitani engaksï sánderu sési újka úni i ánchikuarhitani (1 Tim. 5:3, 4, 9, 10, 16). Ísïsti, no ma kristianu uékapirindi ísï xarhatani eska ima intsïnhaska sésikua para kuidariuani erachichani.

Uékasïngachi eska Tata Diosï kʼéri ambe arhinhaaka imani ambe jingoni engachi uáka (1 Kor. 10:31). Ísï jimbo, engachi uékaaka úrani aplikasioni mensajiri ma o máteru jásï aplikasioni ma, ju je exeni ambechi úpirini úkuarhinchani ka jingontku úrani ini ambe.