Ambe enga kurhanguarhijka ima enga arhintajka
¿Andisï no sési jaki redesi sosialicharhu péraani Jeobaeri testiguecheri publikasionichani o pájinarhu ma engachi jucha úka Internetirhu?
Komuchi jucha gratisi aiatspiajka Bibliaeri publikasionichani, máruksï eratsisïndi eskaksï uáka kopiariuani ka mánharhitaani máteru sitiuecharhu o redesi sosialicharhu. Peru ísï úparini, nóksï kumplirini jarhasïndi ambe enga arhijka parti Néna úrani pájinani,a juchari sitiuecheri Internetirhu ka kʼérati problemechaksï jarhasïndi. Jima klaru uandasïndi eska no nema uáka “publikariuani dibujuechani, publikasioni elektronikuechani, empresecheri markechani, kústakua, fotuechani, bideuechani o artikuluechani ini pájineri, Internetirhu (o máteru pájina jimbo, redesi sosialicharhu, níjtu imani pájinechani jimbo engaksï úrakuarhijka para máteruechani archibuechani pasarikuani)”. ¿Andichisï no sésikua jatsi?
Juchari publikasionichaksï kuájchakukata jarhasti derechosi de autori jimbo, jimbosï no nema uáti máteru pájinecharhu Internetiri karhataani.
Iámu ambe enga juchari sitiuecharhu Internetiri jaka, kuájchakukata jarhasti derechosi de autori jimbo. Apostatecha ka imecha engajtsïni ikiachijka, imecheri pájinecharhuksï péraasïndi juchari publikasionichani para antsitaani Jeobaeri testiguechani ka máteruechani. Peru imecheri pájinecharhu ístu jarhasti informasioni enga jindeka para dudaritarpini (Sal. 26:4; Prov. 22:5). Máteruechaksï niárasti úrani informasioni enga juchari publikasionicharhu jaka o logotipuni de jw.org, paraksï imecheri ambe uandantani, produktuecharhu engaksï atarantajka ka aplikasionicharhu para telefonu ka tabletecha. Para kuájchakuni derecho de autorini ka markechani produktueri, organisasioni jatsisti lei ma enga no jiáratpejka ísï úni (Prov. 27:12). Enga organisasioni mítiparini ini ambe, jurajkupiringa nemani, nájtuka Testiguepiringa, para máteru sitiu de Internetirhu pérani juchari ambe enga Internetirhu jaka o para úrani logotipuni de jw.org para ambe ma atarantani, jamberijtsïni tribunalicha no apoiaripirindi parachi pʼínguani ikiatspitichani o kompania komersialichani.
No jw.org uératini késkuani juchari publikasionichani uáti peligrosueni. Jeoba solu íntskusti responsabilidadi jántspirini enga mintsinharhikueka ka jánhaskatiini, para jorhentpini Jeobaeri ambe (Mat. 24:45). I “jántspiri” imeri pájina ofisialicharhujkusï publikarijti Bibliaeri ambe, enga jindeka www.jw.org, tv.jw.org ka wol.jw.org. Ka tanimu aplikasionijkuchisï jatsiaka para telefonu o tableta: JW Language®, JW Library® ka JW Library Sign Language®. Uákachi mintsikani eskaksï i aplikasionicha ka pájinecha no anunsiarisïnga ambe ma ka nóksï jeuetakata jarhasti Satanasiri parhakpiniri ambe jingoni. Engachi máteru nani uératini késkuaska publikasionichani, nochi uá seguru jarhani eska no ma ambe mójtakunhaska o eska no jeuetakata jarhaska parhakpiniri ambe jingoni (Sal. 18:26; 19:8).
Ístu, enga nema karhataska publikasioni ma Internetirhu nani enga újka komentariu ambe jatsikunhani, íntsaani jarhasïndi sésikua apostatechani ka imechani engajtsïni arhinchajka paraksï úni eskachi deskonfiariuaka Jeobaeri organisasioniri. Máru erachichaksï niárasti jupiperani Internetirhu ka i ambe jingonksï sánderu no sési pakatasïndi Jeobaeri nombrini. Internetiri foruechaksï no jindesti para “kaxumbikua jingoni arhistakua[ni] imechani engaksï no jeiapanhintajka ini xanharuni” (2 Tim. 2:23-25; 1 Tim. 6:3-5). Ístu, exenhantastiksï redesi sosialicharhu ka pájinecharhu Internetiri, kuentecha engaksï chkuanderakua máeka jimbokaksï organisasioniri nombri jimbo jarhaska, Grupueri enga orhejtsïkuajka iámindu kúnguarhikuechani ka erachicheri engaksï ini grupurhu jaka. Sési jimbo, no nema ini grupueri jatsikuarhisti pájina ma Internetiri ni redi sosiali ma jimbo jaki.
Engachi pájinarhu jw.org axajka kʼuiripuni, jarhuajpisïngachi eianhpini “ambakiti eianhperakua” (Mat. 24:14). Erramienta dijitalicha engachi intsïnhaajka para eianhpini, sánhani arhixatiksï sési únhani. Ka uékasïngachi eskaksï iáminduecha marhuanchauaka. Ísï jimbo, eska na arhijka parti Néna úrani pájinani, uákajtsï axakuni nemani korreu elektroniku jimbo publikasioni dijitali ma o bínkulu ma paraka uáka jw.org uératini késkuni. Engachi juchari pájina ofisialicharhu axaajka imechani engaksï uéjka mítini jurhimbikuani, andarhiteraanchi jarhasïnga jántspiri jingoni enga mintsinharhikueka ka enga jánhastiika, enga peerakata jaka para jorhentpini Jeobaeri ambe.
a Bínkulu engaksïni pájka partirhu Néna úrani pájinani, asta kétsekua jarhasti pájinarhu jw.org. Ambe enga jima no jiáratpejka para úni, jindesti para iámu ambe enga juchari sitiuecharhu Internetiri publikarikuarhijka.