Kaja sapichu ma enga jarhuatajka k’uiripuechani paraksï sánderu mintsikani Tata Diosï Jeobani

Jeobaeri testiguecha nóchi méni intsïnhaxapka xáni uánikua bideuechani ka publikasionichani engaksï Biblieri p’itakata jaka Interneti jimbo, ísï eska iásï. Uánikua lugaricharhu juchaari erachichaksï no úsïndi maiampini Interneti. Ka máteruecha jimeesïsïksï irekasti nani enga Interneti no káni jarhajka o no marhuani o enga meru no jarhajka.

Peru iásï, uánikua erachichaksï úsïndia késkuani juchaari publikasionichani nájkirukaksï no konektadu jauaka Internetirhu. ¿Néna úkuarhisïni i ambe?

JW Box kaja sapichu máesti enga axanhajka kúnguarhikuecharhu ima lugaricharhu nani enga no káni jaka Interneti. I kaja sapichu, jatasti ambe ma engaksï empresani ma piákuka enga marhuajka para antsitani internetiri seniali ka jukasti programa ma engaksï ima erachicha úka, engaksï Departamentu de Komputasionirhu ánchikuarhijka jini Beteli ka ístu jatasti bideuechani ka publikasionichani engaksï jw.org jaka. Mándani kaja sáno 75 dólari jukaparhasti.

Kʼumanchikua Reinuerirhu erachichaksï konektariuasïndi imeeri selularichani o tabletechani kajarhu JW Box úraparini wifi ka késkuasïndiksï publikasionichani ka bideuechani, asta ima selularicha o tabletecha engaksï ióni uérakia oksï no xáni jukaparhani úsïndiksï konektarikuarhini ini kajarhu. Peru enga kúnguarhikua ma no jatsika Interneti, ¿néna uaa sánderu jimbanhi ambe jatsini kajarhu JW Box? Beteli axaani jarhasïndi kúnguarhikuecharhu memoriechani USB engaksï sáno 4 dólari jukaparhaka ka engaksï sánderu jimbanhi ambe jataka, enga jw.org jimbo jaka. Memoriechaksï konektarikuarhisïndi JW Box parakaksï erachicha uaaka késkuni sánderu jimbanhi ambe.

¿Néna marhuakuaski JW Box juchaari erachichani? Nathan Adruandra, enga República Democrática del Congo irekaka, uandasïndi: “Ióni jánguarhintaspka késkuani bideuechani ‘Oh, Jeoba, mintsikasïngakini tʼungini’ ka Miánta je Lotiri témbani. Peruni no úspka, ini ambe jimbo komu p’ikuarherasïreenga. Iásï úsïngia késkuani bideuechani juchiiti telefonurhu ka i ambejtsïni jarhuatasïndi parachi úni jorhendaani juchiiti sapiichani”.

Erachi ma enga Nigeria anapu kúnguarhikuechani jarhuataka instalarini JW Box, uandantasïndi: “Erachichaksï exesïndi JW Box komueska Jeobaeri k’éri intsïmperata ma. Iásïksï kánikua tsípisïndia jimbokaksï úsïngia késkuani publikasionichani ka bideuechani engachi úrajka para jorhentpini”.

Axanhastia jukari 1,700 kajecha JW Box kúnguarhikuecharhu engaksï África, Oceanía ka Sudamérica jaka. Ka útasï uánikua i járhati kaja sapirhaticha axanhaati uánikua máteru kúnguarhikuecharhu. ¿Nani uérasïni sentabu para i ambe úrakuarheni? Ima sentabu jimbo enga aianhpikuarhu úrakuarhejka. Uánikuaksï íntspisïndi úraparini donate.jw.org. Kánikuachi diosmaiamukua arhisïnga engajtsï xáni intsïmpitika.