Ambe engajtsïni siensia no újka aianguni
Nájkirukaksï sientifikuecha uánikua ambe estudiarikia unibersueri ambe, útasï uánikua ambe jarhasti engaksï no míteka.
¿Míteskiksïa sientifikuecha néna ueenaski jarhani unibersu ka tsípikua? Nómbe. Uánikuechaksï uandasïndi eska sientifikuecha engaksï estudiarijka unibersuni uaakajtsïni aianguni na enga ueenaka jarhani unibersu. Peru Marcelo Gleiser enga jóskuecheri ambe jorhentpijka jini Unibersidad de Dartmouth, uandasïndi: “Nóchi úxaka sési míteni na enga ueenaka jarhani unibersu”.
Peru, ¿ambechi uaa uandani tsípikueri ambe? ¿Néna ueenaski jarhani? Artikulu ma rebisteri Science News uandasïndi: “Jamberichi no méni uaaka sési míteni na enga ueenaka jarhani tsípikua Echerirhu. Sáno iámindu ambe enga ióntki japka ka engachi jimbo úpiringa míteni na enga ueenaka jarhani tsípikua, nóteru jarhastia”. Í tsimani ambe xarhatasïndi eskaksï sientifikuecha no úxaka míteni na enga ueenaka jarhani unibersu ka tsípikua.
Jamberijtsï uandajka: “Enga nema úka eska Echerirhu tsípikua jauaka, ¿né ísï úski? Ka enga jaka Kueraajpiri ma enga sési kámpijka ka jánhastiini, ¿andisï jurajkujki eskachi kómu nitamakuarhiaka? ¿Andisï jurajkuni jaki eska xáni uánikua relijionicha jauaka? ¿Ka andisï jurajkuni jaki eska imeecha engaksï jakajkujka relijioniri ambe, no sési ambe uaaka?”.
Siensiajtsïni no uaati mókuchiantani indeni kurhamarhikuechani, peru i ambe no arhikuekasïndi eskachi no uaaka míteni indeni ambe. Uánikua kʼuiripuechaksï ústi míteni Bibliani jimbo andisï ísï úkuarhini jaki.
Máru sientifikuechaksï jorhenguarhisti ambe enga Biblia uandajka. ¿Uékapirintsï míteni andiksïsï jakajkujki eska jarhaska Kueraajpiri ma? Incha je pájinarhu jw.org ka jirinhaanta je bideuechani engaksï xarhatajka Ambe enga uandanhajka tsípikueri ambe.