¿Andisï nóteru xáni jakiia respetu?

ANDISÏ XÁNI JUKAPARHAKUE RESPETARIUANI MÁTERUECHANI

Respetu úsïndi eska ma no seguiriuaka ikiani ka eska no sánderu kʼéjkuaka problemani ma.

Bibliarhu anapu karakata ma uandasïndi: “Enga mókuntskua tekaantskua jingoniijka kénditasïndi ikiatapuni, peru uandakua enga no sési pʼikuastpejka úsïndi eska néna sánderu ikiauaka” (Proverbios 15:1). Enga ma no respetu jingoni uandajka ni jámani, inde ambe ísïisti komueska sánderu chkari jatsijpani chpirirhu. Ka inde ambe úsïndi eska problema ma sánderu no sési kʼamarhuaka.
Jesúsi uandaspti eska: “Kʼuiripu ma uandasïnga ambe enga xáni mintsitarhu jatsijka” (Mateu 12:34). Engachi no respetu jingoni uandontskuarhekuaska máteruechani, jamberi jindeeti jimbokachi kʼéri problema ma jatsiska ka ini ambe jimbo xarhatani japiringachi eskachi no májkueni exeasïnga kʼuiripuechani jimbokaksï ménderueni irekaska eska jucha, o jimbokaksï máteru raseeska, o máteru pʼindekuechani jatsiani o máteru paisi jimbo anapueni. Ísï jimbo, juchachisï jatsipiringa para mójtakuni na engachi eratsejka.

Enkuesta ma enga iásï nótki xáni ióni únhaaka jukari 32,000 kʼuiripuecheeri 28 paisi jimbo, xarhatasti eska 65 % kʼuiripuecha nóteru xáni respetu xarhatasïngia nijtu sési jánguechani.

AMBE ENGAJTSÏ UAAKA ÚNI

Náki uéjki kʼuiripu ma jingoni engajtsï uandontskuarheni jauaka, jánguarhi je respetu jingoni kámani, asta imeechani jamberi engaksï no májkueni eratseaka eska chá. Imeeri ambe uandontskuarhi je engajtsï tsimarhani tsitiaka, ísïjtsï no jámaaka jusgariuani máteruechani ni arhinchaani.

“Ásteru jáma jeia no sési ambe exekuani máteruechani parajtsï chájtu no no sési ambe exeminhani” (Mateu 7:1).

Ísï kaa je máteruechani eskajtsï na uékapiringa eskaksïni kámapiringa chánksïni. Engajtsï sési uandontskuarhekuaska máteruechani ka jurhimbikua jingoni, jamberiksïni imeechajtu májkueni kámaati.

“Ístu, ísï kaa je máteruechani eskajtsï na uékapiringa eskaksïni kámapiringa chánksïni” (Lukasï 6:31).

Listu ja je para puátspentani. Ménichani kʼuiripuechaksï no uékaparini uandasïndi o úni ambe ma. Ísï jimbo, enga nema uandaska o úni ambe engaksïni no sési pʼikuastaaka, tekaakunta je.

“Kʼuiripueri jánhaskakua jarhuatasïndi pʼínguni imeeri ikiatapuni, ka kánikua sési ambe úsïndi enga no jatanhetspijka” (Proverbios 19:11).

Jeobaeri testiguecheri Kʼumanchikua Reinueri ma jimbo, kʼuiripuecha engaksï no májkueni jatiriika ka uápuru ísï anapueni, kánikua tsípikua jingonksï saludarijperaxati ka uandontskuarhenksï ante de tánguarhikua ueenani.

AMBE ENGACHI JEOBAERI TESTIGUECHA ÚJKA

Nani uéjkichi irekani o ánchikuarhini, Jeobaeri testiguechachi iáminduechani respetariuasïnga ka jarhuataasïngachi máteruechani parakaksï májkueni uaaka.

Iáminduechanchi pʼímarhiasïnga parakaksï jorhenguarhiaka Biblieri ambe gratisi, joperuchi no méni úsïnga eskaksï máteruechajtu afuersa jakajkuaka ka ísïksï eratseni eska jucha. Sánderu sési, ísï eska na uandajka Biblia “iatsitakuarhu ka kánikua janhanharhikua jingoni” uandontskuarhekuasïngachi máteruechani ambe engachi jakajkujka (1 Pedru 3:15; 2 Timoteu 2:24).

Nóchi nemani menusi úsïnga. Juchaari tánguarhikuecharhu tsípikua jingonchi jiókaasïnga imani kʼuiripuechani engaksï uéjka jorhenguarhini Biblieri ambe nani uéjkisïksï anapueni. Jánguarhintasïngachi kurhangukuani máteruechani ka ‘janhanharhiani iámindu jásï kʼuiripuechani’ (1 Pedru 2:17).

Kurhajchaasïngachi juramutiichani jimeesïsï engachi jucha irekaka (Roma 13:1). Kurhajchaasïngachi leichani ka maiampiasïngachi impuestuechani. Ka nájkirukachi no inchamukujka politikarisï, respetariuasïngachi máteruecha engaksï uéjka ísï úni.