¿Andisï kʼuiripu nóteru xáni respetarikuarhijkia?

ANDISÏ JUKAPARHAKUE RESPETARIKUARINI

Ima kʼuiripu enga respetarikuarhijka úsïndi uandanhiateecha jingoni orhepani uérani. Ka úsïndi tekaantani.

Imeecha engaksï iiri ambe estudiarijka, uandantasïndiksï eska kʼuiripu ma enga eratsejka eska no ma ambe úsïnga sési úni, sánderuksï sóntku niárasïni ini ambe pʼamenchani komu: jukari uandanhiani, depresioni, kánikua tʼireni o jukari sántku. Ístuksï sánderu sóntku niárasïndi bisiu ambe jupikani komu kauini, ísku jatini medikamentu ambe arhani ka droga ambe úrani.
Kʼuiripu ma enga respetarikuarhijka no terukukuarhintasïndi máteruecha jingoni, jimboksïsï újti sánderu sési pájperani máteruecha jingoni ka ambakiti amiguechani jatsiani. Joperu ima kʼuiripu enga no sáni respetarikuarhijka, sánderuksï tsitisïndi arhinchpeni. Ini ambe jimbo, nóksï úsïndi sési pájperani máteruecha jingoni.
Ima kʼuiripu enga respetarikuarhijka sánderuksï uinhapiti jarhasïndi enga uandanhiateechani jatsiajka; no ma ambe ójkutasïndi para kumplirini imeecheeri meteechani. Peru para ima kʼuiripu enga no respetarikuarhijka, enga ambe ma no sési uérakuaka, sóntku desanimarikuarhisïndi ka nóteru jánguarhintania úni ambe ma.

AMBE ENGAJTSÏ UAAKA ÚNI

Imani amiguechani erakua je engaksïni jarhuataaka. Imeecha jingoni kúnguarhi je engaksï respetu xarhatajka, engaksï uandanhiauaka chánksïni jimbo ka ambakiti ambeksïni jorhendani.

“Ambakiti amigu ma méntkisï uékpisïndi, ka ermanu máesti enga andajpenuka para jiáni enga uandanhiata jauaka” (Proverbios 17:17).

Jarhuataa máteruechani. Engari sési kámpiska ka ambakiti ambe úni máteruechani jimbo, asta imeecha jimbo engaksïni no uaaka májkueni ambe jimbo jarhuataani, kánikuari sési pʼikuarheraaka. Nájkiruka ísï xarharaaka enajkikini no nema agradaserijki ima ambe jimbo engari sési újka.

“Ma sánderu sési pʼikuarherasïndi intsïmpini ka eska intsïmbinhani” (Úkuecha 20:35).

Jarhuataa je chaari sapiichani paraksï jorhenguarhini respetarikuarhini. Ma engaksï uaaka úni jindeesti jurajkuani eskaksï jandiajku sési peentauaka máru imeecheeri problemeechani nani engaksï jamberi uaaka. Inde ambe jorhendauati parakaksï uaaka orhepani uérakuani uandanhiateechani. Ístuksï jorhenguarhiati respetarikuarhini ka inde ambe kánikua marhuakuauati engaksï kʼériuakia.

“Jorhenda sapini náki jindeeski ambakiti xanharu, nájkiruka jatiriuakia no jurajkuati indeni xanharuni” (Proverbios 22:6).

Pirenchi ma Biblieri ambe jorhendaxati uarhiitini ma kafeteriarhu.

AMBE ENGACHI JEOBAERI TESTIGUECHA ÚJKA

Tánguarhikuecha ka ambe engaksï jorhentpijka Jeobaeri testiguecha, jarhuataasïndi kʼuiripuechani paraksï sánderu sési irekani ka i ambe kánikua marhuasïndi paraksï sánderu respetarikuarhini.

MÁNDANI SEMANA ANAPU TÁNGUARHIKUECHA

Mándani semana juchaari tánguarhikuecharhuchi kurhaasïngachi arhijtsïkperatechani engaksï Bibliarhu pʼitakateeka. Jimachi jorhendanhasïnga konsejuechani engajtsïni jarhuatajka parachi respetarhikuarhini. Né uéjki úsïndi nirani juchaari tánguarhikuecharhu ka no ma maianhpesïndi. Pori ejemplu, jimajtsï jorhenguarhiaka arhini ambe...

... andijtsïsï chá jukaparhakue para Tata Diosï.
... néna míteni andichisï irekani jaki.
... néna jatsiani ambakiti amiguechani ka ióni jamberi.

Jimari exeantauaka ambakiti amiguechani engaksï meru uandanhiajka máteruecha jimbo (1 Korintu 12:25, 26).

Parari sánderu míteni juchaari tánguarhikuecheri ambe, incha je pájinarhu jw.org ka exe je bideuni ¿Nénaksï úkuarhisïni juchaari tánguarhikuecha?

ESTUDIU BIBLIKU

Gratisichi jorhendaasïnga kʼuiripuechani Biblieri ambe úraparini libruni Tsípikua jingoni ireka je. I libru úraasïndi kurhamarhikuechani enga újka eska kʼuiripu eratsentaaka ka úni sési kurhanguani Bibliarhu anapu tekstuechani. Ístu no úkua jukasti na enga eksplikarijka ka jarhastiksï ambakiti bideuechaksï ka sési járhati imajeniicha. Biblieri ambe jorhenguarhini jarhuataasïndi kʼuiripuechani paraksï sánderu sési pʼikuarherani ka sánderu sési irekani.

Engajtsï uéjka sánderu míteni nénaksïni uaa jarhuatani jorhenguarhini Biblieri ambe Jeobaeri testiguecha jingoni, incha je pájinarhu jw.org jimbo ka exe je bideuni ¿Andisï uétarhijki jorhenguarhini Biblieri ambe?