Néna sési péntaani uandanhiatechani

Engaksï tsimani kʼuiripuecha tembuperajka, niárasïndiksï uandanhiatecha jarhani, jamberi jimbokaksï no májkueni eratsijka ka pʼikuarherani o ménderuenksï kʼuiriperanhani. Ístu, uáti eskaksï uandanhiatecha máteru nani uératini juuaka o ambe ma jimbo engaksï no erokuarhienga.

Sánderu fásilisti no kasu úni ambe enga úkuarhini jaka, peru Biblia uandasïndi eskajtsï jatsiska para orhepani uérakuani (Mateu 5:23, 24). Engajtsï úska ambe engaksï uandajka Tata Diosïri juramukuecha uákajtsï exeni néna sési péntaani uandanhiatechani.

1 UANDONTSKUARHI JE UANDANHIATERI AMBE

AMBE ENGA BIBLIA UANDAJKA: “Jarhasti ma [...] tiempu para uandani” (Eclesiastés 3:1, 7). Arhuta je tiempu parajtsï uandontskuarhini uandanhiateri ambe; eiangukuarhi je jurhimbikua jingoni chári achatini o uarhiitini na engajtsï pʼikuarherajka ka eratsini. Méntkisï jurhimbitku eiangukuarhi je (Efesu 4:25). Engajtsï ikiani jauaka, pʼíngukuarhi je parajtsï no uarhiperani. Iatsitakuarhu mókuntani uáti úni eskajtsï no uarhiperaaka sánititu ambe jimbojku (Proverbios 15:4; 26:20).

Nájkirukajtsï no jaiapanhintaaka ambe enga eratsijka chári uarhiiti o achati, sési káma je; xarhatakuparini uékperakua ka respetu (Kolosasi 4:6). Jánguarhintsï je jirejiresï sési peentani uandanhiatani ka asï jáma je nóteru uandajperania (Efesu 4:26).

AMBE ENGAJTSÏ UÁKA ÚNI:

• Eraku je ma jandora enga sési jauaka parajtsï uandontskuarhini uandanhiateri ambe

• Engaksïni uandontskuarhicheni jauaka chári achati o uarhiiti, jánguarhintsï je no uandani astaka ima kʼamaraaka. Niáraati tiempu parajtsï cha uandani

2 KURHANDI JE KA KURHANGUKU JE

AMBE ENGA BIBLIA UANDAJKA: “Uékpera je máteru ka máteruni jingoni eska májku ermanuecha, ka sánderu kʼéri ambe exea je máruteruechani ka eska chájkumindu” (Roma 12:10). Jukaparhakuesti eskajtsï jorhenaaka kurhaani ka jánguarhintsï kurhanguni na enga eratsijka chári achati o uarhiiti, ‘májku ambe pʼikuarheraparini ka sési kámberaparintsï’ (1 Pedru 3:8; Santiagu 1:19). Asï ísku no kurhandini ísï jáma je. Méntkisï engajtsï uáka, jurajku je ambe engajtsï úni jauaka ka jingontku kurhaa je chári uarhiitini o achatini, o kurhamarhi je uájtsï tátsekua ísï uandontskuarhini. Engajtsï ísï exejka chári achatini o uarhiitini komueska chári pámpiri ka no komueska ikiatspiti ma, nójtsï sóntku ikiauaka (Eclesiastés 7:9).

AMBE ENGAJTSÏ UÁKA ÚNI:

• Kurhaa je ka jiókuarhi je ambe enga chári achati o uarhiiti uandajka, nájkirukajtsï no tsitiaka

• Kurhangu je ambe engaksïni uékani jaka arhini. Exe je ambe enga újka chári achati o uarhiiti enga uandajka ka kurhachaku je na enga uandajka

3 SEGUIRI JE JÁNGUARHINTANI

AMBE ENGA BIBLIA UANDAJKA: “Iámindu jásï ánchikuarhita enga ma uinhamu ánchikuarhijka sési uéranchasïndi, peru enga ma puru uandani jarhajka niárasïndi pobrini” (Proverbios 14:23). No solu jindesti eskajtsï tsimarani exeaka ambejtsï uá úni, uétarhisïndi eskajtsï ísï uaaka. Jamberi uétarhiati eskajtsï kánikua jánguarhintaaka, peru sésiksïni nicheati (Proverbios 10:4). Engajtsï márku ánchikuarhiska, “ambakiti kóntperatajtsï” ma jatsiaka (Eclesiastés 4:9).

AMBE ENGAJTSÏ UÁKA ÚNI:

• Eratsi je ambejtsï uá úni táchanisï para sési peentani uandanhiatani

• Jima sáni, exe je na engajtsï xáni orhepani uérakia