Ambe enga Biblia sánderu uandajka, jindeesti Tata Diosïri Reinueri ambe. Ini Reinu jimbo, Tata Diosï Jeoba uaati ambe enga eratsetini japka ueenakuarhu Echerini jingoni. ¿Ambeeski Tata Diosïri Reinu? ¿Nénachi míteski eska juramuxakaia? ¿Ambe xáni úskia i Reinu? ¿Ka ambe uaa sánderu orhepani? Ini kurhamarhikuechanchi mókuantauaka ini jorhenguarhikua jimbo ka ístu máteru tsimani jorhenguarhikuecha jimbo.

1. ¿Ambeeski Tata Diosïri Reinu ka neeski Juramuti?

Tata Diosïri Reinu, juramukua máesti enga Tata Diosï uaxastaka. Juramuti jindeesti Tata Jesukristu ka auandarhu uératini juramuxati (Mateu 4:17; Juanu 18:36). Biblia ari ambe uandasïndi Jesúsiri: ‘Méntkisï juramuati’ (Lukasʌ 1:32, 33). Jimboka juramutiska Tata Diosïri Reinurhu, juramukuauati iámu parhakpinirhu anapuechani.

2. ¿Neechaksï juramusïni Jesúsini jingoni?

Jesúsi no jandiajku juramusïndi. Juramuatiksï kʼuiripuecha engaksï ‘táchani jásï triburhu anapueka ka engaksï mámaru jásï idioma uandajka ka uápuru nasionicharhu ka iretecharhu’ anapuecha (Jaŋaskuecha 5:9, 10). ¿Namunksï juramua Kristuni jingoni? Jiáni uératini enga Jesúsi ixú Echerirhu japka, uánikua kʼuiripuechaksï chúxapaspti paraksï kristianu úkuarhini. ¿Joperuksï iáminduecha juramua Jesúsi jingoni? Nómbe, solu 144,000 engaksï auandarhu niuaka paraksï Jesúsi jingoni juramuni (arhinta je Jaŋaskuecha 14:1-4). Ka Tata Diosïri Reinu, juramukuauati iámindu máteru kristianuechani engaksï ixú Echerirhu irekaaka (Salmo 37:29).

3. ¿Andisï Tata Diosïri Reinu sánderu ambakiti juramukua máe eska kʼuiripuecheri?

Nájkirukaksï jaka máru juramuticha engaksï uéjka ambakiti ambe úni, nóksï jatsisti uinhapikua para úni iámindu ambe engaksï uékajka. Ka tátsekuaksï máteruecha niárasïndi imeecheri lugari jimbo, engaksï no xáni uandanhiajka kʼuiripuecha jimbo. Peru Jesúsini enga Juramutiika Tata Diosïri Reinurhu, no nema kénditaati. Tata Diosï uaxastasti “gobiernu ma enga no méni kʼamajkunhaaka” (Daniel 2:44). Jesúsi juramuati interu parhakpinirhu ka iáminduechani májkueni káuati. Ima uékpitisti, sési kámpisïndi ka jurhimbitisti, ka jorhendauati kʼuiripuechani paraksï májkueni uékpitiini, jurhimbitku úni ambe ma ka paraksï sési kaani máteruechani (arhinta je Isaías 11:9).

4. Juramukua uinhapiti ma enga iámu Echerirhu juramuaka

Tata Jesukristu sánderu uinhapikua jatsisti para juramuni eska náki uéjki juramuti ma. Arhinta je Mateu 28:18 ka uandontskuarhi je íri ambe:

• ¿Andisï Jesúsiri juramukua sánderu kʼérii eska náki uéjki máteru juramutiiri?

Parhakpinirhu anapu juramutichaksï ma partijku juramusïndi ka niárasïndiksï mójtakunhani. ¿Májkueni úkuarhisïni Tata Diosïri Reinu jingoni? Arhinta je Daniel 7:14 ka uandontskuarhi je íri ambe:

• ¿Andisï sésii eska Tata Diosïri Reinu no méni kʼamajkunhaaka?

• ¿Andisï sésii eska iámu Echerirhu juramuaka?

5. Parhakpinirhu anapu gobiernuechaksï jatsisti para mójtakunhani

¿Andisï uétarhijki eska Tata Diosïri Reinu juramuakia ka nóteru parhakpinirhu anapu gobiernuecha? Exe je BIDEUNI, ka uandontskuarhi je íri ambe:

BIDEU: ¿Ambeski Tata Diosïri Reinu? (ma parti) (1:41)

• ¿Náki problemechaksï jarhaski parhakpinirhu anapu gobiernuecha jimbo?

Arhinta je Eclesiastés 8:9 ka uandontskuarhi je íri ambe:

• ¿Exesïntsï eska Tata Diosïri Reinu jatsipiringa para kénditaani parhakpinirhu anapu juramutichani para ima juramuni? ¿Andi?

6. Imeecha engaksï Tata Diosïri Reinurhu juramuaka kurhanguchisïndijtsïni

Jimboka juchaari Juramuti, Jesúsi, kʼuiripuespka ka irekani ixú Echerirhu, uaatijtsïni “pʼamojkuni juchantsïni engachi xáni debiliika” (Ebreu 4:15). Tata Diosï Jeoba erakuasti 144,000 tatakechani ka nanakechani engaksï sési marhuakujka imani paraksï Jesúsi jingoni juramuni. I kʼuiripuechaksï ‘táchani jásï triburhu anapuesti ka mámaru jásï idiomaksï uandasïndi ka uápuru nasionicharhu ka iretecharhu anapuestiksï’ (Jaŋaskuecha 5:9).

• ¿Uinhaperantasïnksïni míteni eska Jesúsi ka imeecha engaksï imani jingoni juramuaka míteska na enga jindeeka kʼuiripuecheri irekua? ¿Andi?

7. Tata Diosïri Reinueri leichaksï sánderu ambakitiisti eska kʼuiripuecheri

Gobiernuechaksï uaasïndi juramukuechani paraksï jarhuataani ka kuájchakuani kʼuiripuechani. Tata Diosïri Reinu, ístu jatsiasti leichani ka jatsistiksï para ísï úni imeecha enga ima juramukuauaka. Arhinta je 1 Korintu 6:9-11 ka uandontskuarhi je íri ambe:

• ¿Néna irenhaa parhakpinirhu engaksï iáminduecha ísï jámaaka eska Tata Diosï na juramujka?a

• ¿Sési jaki enga Jeoba uékajka eskaksï kurhajchauaka ini juramukuechani imeecha engaksï jiáni irekaaka enga Tata Diosïri Reinu juramuni jauakia? ¿Andijtsïsï ísï uandajki?

• ¿Nénachi míteski eskaksï uaaka mójtakurhini imeecha engaksï no kurhajchaajka ini juramukuechani? (Exe je bersikulu 11).

AMBE ENGACHI JORHENGUARHIKA

Tata Diosïri Reinu, gobiernu máesti enga auandarhu jaka ka enga iámu parhakpinirhu juramuaka.

Ambejtsï jorhenguarhiski

• ¿Neeskiksï juramuticha Tata Diosïri Reinurhu?

• ¿Andisï Tata Diosïri Reinu sánderu ambakitii eska náki uéjki kʼuiripuecheri juramukua?

• ¿Ambe uékasïni Tata Diosï eskaksï uaaka imeecha engaksï uéjka eska ima juramukuauaka?

ÍSTU EXE JE INI AMBE

Arhinta je nani enga uandapka Jesúsi eska japiringa Juramukua.

“¿Tata Diosïri Reinu jindeeski ambe ma engachi mintsitarhu pájka?” (Artikulu ma enga jw.org jimbo jaka)

¿Andiksïsï Jeobaeri testiguecha sánderu kurhajchajki Tata Diosïri Reinuni ka eska kʼuiripuecheri gobiernuechani?

Tata Diosïri Reinunkuksï apoiaristi (1:43)

Exe je ambe enga Biblia uandaka 144,000 kʼuiripuecheri enga Tata Diosï Jeoba erakuajka paraksï Jesúsi jingoni juramuni.

“¿Neechaksï nirasïni auandarhu?” (Artikulu ma enga jw.org jimbo jaka)

¿Ambe jarhuataspi uarhiitini ma enga ónhakata japka para seguru jarhani eska Tata Diosïjkusï uaaka úni eska iámindu ambe jurhimbikua jingoni úkuarhiaka?

“Jorhenguarhiska eska nóteru jauakia no sési kámberakua ambe” (¡Tsínharhi!, nobiembri de 2011)

Tata Diosïri Reinu 1914 jimbo ueenasti juramuni auandarhu. Ini mismu uéxurhini uénakuarhisti últimu jurhiatikuecha para parhakpini anapu juramukuecha. ¿Nénachi míteski ini ambe? Exenchi jauaka ambe enga Biblia uandarini japkia, ístu, ambe enga xáni úkuarhini japiringa parhakpinirhu ka na engaksï jámapiringa kʼuiripuecha 1914 uératini.

1. ¿Ambe uandarixapia Biblia?

Bibliarhu anapu libru ma enga arhinhajka Daniel uandasïreendia eska Tata Diosïri Reinu jiáni ueenapiringa juramuni enga nitamapiringia “siete tiempu” (Daniel 4:16, 17). Ísï tátsekua, Jesúsi uandaspti ini tiempuni arhikuekani “tiempuecha engaksï no Israeli anapuecha juramukua jatsiaka” ka jorhentpispti eska i tiempu nótki kʼamakurhisïreenga (Lukasʌ 21:24). Eskachi na exeni jauaka siete tiempuecha 1914 jimboksï kʼamakurhisti.

2. Desde 1914 uératini, ¿na jánhaskuarhixaki parhakpinirhu ka kʼuiripuechaksï na jámasïni?

Jesúsiri chúxapatichaksï kurhamarhispti imani: “¿Ambe mínda jaua engari tʼu junguakuekani jauaka ka enga kʼamarani jámaaka i tiempu?” (Mateu 24:3). Para mókukuantani, Jesúsi uánikua ambe arhiaspti enga úkuarhini japiringa ísï tátsekua enga ima ueenapiringia juramuni auandarhu Tata Diosïri Reinurhu. Pori ejemplu uandaspti eskaksï japiringa guerrecha, kʼarhingua ka kʼérati jenchekuecha (arhinta je Mateu 24:7). Biblia, ístu uandasptia eska na engaksï jámapiringa kʼuiripuecha “últimu jurhiatikuecha jimbo” úpiringa eska “peligru japiringa” (2 Timoteo 3:1-5). Desde 1914 uératini, exexakachi eska ísï úkuarhixaka.

3. ¿Andisï ueena sánderu no sési jánhaskuarhini jiáni enga Tata Diosïri Reinu ueenaka juramuni?

Sánisï tátsekua enga Jesúsi ueenaka juramuni Tata Diosïri Reinurhu, guerra ma úkuarhispti auandarhu ka Jesúsi uarhiperaspti Satanasi ka imeeri demoniuecha jingoni. Satanasi no úspti andani ka eska Biblia na uandajka, “kʼuanijpanhasti parhakpinirhu iámindu imeeri ánjelichani jingoni” (Jaŋaskuecha 12:9, 10, 12). Satanasi kánikua ikiaxati, jimboka míteska eska no ióni jimbo kʼamajkunhaaka, jimbosï úni jati eska interu parhakpinirhu xáni kómu nitamakua ambe jauaka. ¡I ambejtsïni jarhuatasïndi kurhanguni andisï xáni no sési jánhaskuarhini jaki parhakpinirhu! Joperu Tata Diosïri Reinu kʼamajkuati iámindu no sési jásï ambeni.

JORHENGUARHI JE SÁNDERU AMBE

4. Bibliaeri profesiechaksï xarhatasïndi eska Tata Diosïri Reinu 1914 jimbo ueenaska juramuni

BIDEU: Tata Diosïri Reinu 1914 jimbo ueenasti juramuni (5:02)

Tata Diosï úspti eska Nabukodonosori, enga reiipka ióntki Babilonia, tsánharhipiringa ambe ma enga sánderu orhepani úkuarhipiringa. Ambe enga Nabukodonosori tsánharhipka ka ambe enga Danieli uandapka eska arhikuekasïreenga, profesia máespti enga Nabukodonosoriri juramukuani arhikuekani japka ka Tata Diosïri Reinuni (arhinta je Daniel 4:17).a

Arhinta je Daniel 4:20-26. Tátsekua úra je diagramani parajtsï mókuantani arini kurhamarhikuechani:

• A) ¿Ambe exespi Nabukodonosori imeeri tsánharhikua jimbo? (Exea je bersikuluechani 20 ka 21).

• B) ¿Ambe úkuarhipirini anhatapu jingoni? (Exe je bersikulu 23).

• C) ¿Ambe úkuarhipirini enga na kʼamakurhipiringia “siete tiempu”? (Exe je bersikulu 26).

Tsánharhikua anhatapueri ka Tata Diosïri Juramukua

PROFESIA (Daniel 4:20-36)

Juramukua

A) Kʼéri anhatapu ma

Juramukua kʼamakurhisïndi

B) “Chʼapa je anhatapuni” ka jurajku je “astaka siete tiempu nitamaaka”

Ménderu uéntasïndi juramukua

C) “Intsïnhantaakari chiiti juramukuani”

Na enga primeru xanhari kumplirikuarhipka:

• D) ¿Néni arhikuekasïreni anhatapu? (Exe je bersikulu 22).

• E) ¿Káni jamberi juramuspi Nabukodonosori? (Arhinta je Daniel 4:29-33).

• F) ¿Ambe úkuarhinchaspi Nabukodonosori enga na nitamapkia “siete tiempu”? (Arhinta je Daniel 4:34-36).

NA ENGA PRIMERU XANHARI KUMPLIRIKUARHIPKA

Juramukua

D) Nabukodonosori Babilonia anapu juramuti

Juramukua kʼamakurhisïndi

E) Nabukodonosori loku úkuarhisïndi enga na nitamajkia uéxurhini 606 a. de J.* ka siete uéxurhini no úsïndi juramuni

Ménderu uéntasïndi juramukua

F) Nabukodonosori sési niántasïndi ka ménderu uénasïndi juramuni

Na enga profesia ménderu kumplirikuarhipka:

• G) ¿Neechani arhikuekaasïreni anhatapu? (Arhinta je 1 Crónicas 29:23).

• H) ¿Asta káni jamberiksï juramuspi? ¿Nénachi míteski eskaksï no juramuxapka enga Jesúsi ixú Echerirhu japka? (Arhinta je Lukasʌ 21:24).

• I) ¿Nani ka káni ueenaspi ménderu juramuni i gobiernu?

NA ENGA PROFESIA MÉNDERU KUMPLIRIKUARHIPKA

Juramukua

G) Israeli anapu juramuticha engaksï Tata Diosïri juramukuani arhikuekeenga

Juramukua kʼamakurhisïndi

H) Jerusaléni kʼamajkunhasïndi uéxurhini 607 a. de J.; nóteruksï Israeli anapu reicha juramusïndia 2,520 uéxurhini

Ménderu uéntasïndi juramukua

I) Jesúsi ueenasïndi juramuni auandarhu Tata Diosïri Reinurhu 1914 jimbo

5. Uéxurhini 1914 jimbo iámindu ambe mójtakurhisti

Exe je BIDEUNI.

BIDEU: Uéxurhini 1914 jimbo iámindu ambe mójtakurhisti parhakpinirhu (1:10)

Jesúsi uandaspti ambe enga úkuarhini japiringa parhakpinirhu enga ima ueenapiringa juramuni. Arhinta je Lukasʌ 21:9-11 ka uandontskuarhi je íri ambe:

• Ambe enga xáni i profesia uandajka, ¿ambe ka ambejtsï chá exesïni eska úkuarhixaka ojtsï kurhaani eska úkuarhixaka?

Apostoli Pablu uandaspti na engaksï jámapiringa kʼuiripuecha últimu jurhiatikuecha jimbo engaksï kʼuiripuecha juramuni japiringa. Arhinta je 2 Timoteo 3:1-5 ka uandontskuarhi je íri ambe:

• Ísï eskaksï na arhijka i tekstuecha, ¿chá exesïni eskaksï kʼuiripuecha ísï jámasïnga?

6. Míteparini eska Tata Diosïri Reinu juramuxakaia, jatsipiringachi para úni ambe ma

Arhinta je Mateu 24:3, 14 ka uandontskuarhi je íri ambe:

• ¿Náki kʼéri ánchikuarhita xarhatasïni eska Tata Diosïri Reinu juramuxakaia?

• ¿Chájtsï néna uaa jarhuajpeni ini ánchikuarhitarhu?

Tata Diosïri Reinu juramuxatiia ka nóteru ióni kueratasïndia para interu parhakpinirhu juramuni. Arhinta je Ebreu 10:24, 25 ka uandontskuarhi je íri ambe:

• ¿Ambechi jatsipirini para úni “engachi exeni jaka eska Tateeri jurhiatikua janoxamkia”?

AMBE ENGACHI JORHENGUARHIKA

Ambe engaksï Bibliarhu anapu profesiecha uandajka ka na enga jánhaskuarhini jaka, xarhatasïndi eska Tata Diosïri Reinu juramuxakaia. Ka juchachi xarhatasïnga eskachi jakajkusïnga ini ambe engachi nirajka aianhpini ka tánguarhikuecharhu.

Ambejtsï jorhenguarhiski

• ¿Ambe úkuarhispi enga na nitamapkia siete tiempu enga libru de Daniel jimbo uandakata japkia?

• ¿Ambe úsïni eska chá jakajkuaka eska Tata Diosïri Reinu 1914 jimbo ueenaska juramuni?

• ¿Chájtsï néna uaa xarhatani eskajtsï jakajkusïnga eska Tata Diosïri Reinu juramuxakaia?

ÍSTU EXE JE INI AMBE

Arhinta je ambe engaksï uandajka máru engaksï istorieri ambe exejka ka máteru jorhenaticha, na enga mójtakurhika parhakpini 1914 uératini.

“Tiempu enga nóteru nema uéjkia ambakiti jángua ma xarhatani” (¡Tsínharhi!, abrili de 2007)

Exe je na enga profesia enga Mateu 24:14 jimbo jaka, jarhuataka acheetini ma mójtakuni imeeri irekua.

“Ji kánikua tsitisïreenga béisboli chʼanani” (Aianhpiri, núm. 3 2017)

¿Nénachi míteski eska profesia enga Daniel kapitulu 4 jimbo jaka, Tata Diosïri Reinueri ambe arhikuekasïnga?

“¿Káni ueenaski juramuni Tata Diosïri Reinu? (Parti 1)” (Aianhpiri, 1 de oktubri de 2014)

¿Ambe xarhatasïni eska “siete tiempu” enga Daniel kapitulu 4 jimbo uandajka 1914 jimbo kʼamakurhiska?

“¿Káni ueenaski juramuni Tata Diosïri Reinu? (Parti 2)” (Aianhpiri, 1 de nobiembri de 2014)

Tata Diosïri Reinu, juramuxatiia. Ka no ióni jimbo uánikua ambe mójtakuati ixú Echerirhu. Ju je exeni máru ambakiti ambe enga i gobiernu uaaka ka enga chá uaaka erokuarhini kánikua tsípikua jingoni.

1. ¿Ambe uaa Tata Diosïri Reinu paraka ménderu jauaka pínandikua ka iámindu ambe jurhimbikua jingoni úkuarhini?

K’éri uarhiperatarhu enga jindeeka Armajedoni, Jesúsi —enga Juramutiika Tata Diosïri Reinurhu— kʼamajkuati kʼuiripu no sési úrini ka ístu gobiernuechani (Jaŋaskuecha 16:14, 16). Imani tiempu jimbo, kumplirikuarhiati ari Bibliaeri aiatsperakua: “Nóteru ióni jimbo, no sési úrichaksï nóteru jauatia” (Salmo 37:10). Ini gobiernu jimbo, Jesúsi uaati eska iámu Echerirhu pínandikua jauaka ka eska iámindu ambe jurhimbikua jingoni úkuarhiaka (arhinta je Isaías 11:4).

2. ¿Néna irenhaa enga úkuarhiakia ambe enga Tata Diosï uékajka ixú Echerirhu?

Tata Diosïri Reinu jimbo, “echeri jurhimbiticheriuati, ka jimaksï irekaati para méntkisï” (Salmo 37:29). ¡Eranhaska je na engaksï irekaaka iámindu kʼuiripuecha engaksï ambakiti ambe uaaka, engaksï xénchaaka Jeobani ka engaksï iáminduecha xénchperaaka! Ambakiti ambeesti, ¿no ísïiski? Nóteru nema pʼamenchaatia ka iáminduechaksï irekaati para méntkisï.

3. ¿Ambe uaa Tata Diosïri Reinu enga kʼamajkuauakia no sési úrichani?

Engaksï kʼamajkunhaakia no sési úricha, Jesúsi jindeuati Juramuti 1,000 uéxurhini. Imani tiempu jimbo, Jesúsi ka 144,000 engaksï imani jingoni juramuaka, jarhuatauatiksï kʼuiripuechani paraksï niárani perfektueni. Enga kʼamakurhiakia mili uéxurhini, Echeri sési jásï paraisu máeuatia ka kʼuiripuechaksï tsípikua jingoni irekaati jimbokaksï kurhajchauaka Tata Diosï Jeobaeri juramukuechani. Jiájkani, Jesúsi íntskuntaati juramukuani imeeri Tata jémbani, Jeobani. Ka Tata Diosïri nombri pímbinhajkunhantaati (Mateu 6:9, 10). Ka sési mítekuarhiati eska Jeoba ambakiti juramuti máeska ka eska sési kuidarisïnga imeeri iretani. Tátsekua, kʼamajkuati Satanasini ka demoniuechani ka náki uéjki kʼuiripuni enga no uékaaka kurhajchani imeeri juramukuani (Jaŋaskuecha 20:7-10). Iámindu ambe enga uaaka Tata Diosïri Reinu, jindeuati para méntkisï.

JORHENGUARHI JE SÁNDERU AMBE

4. Tata Diosïri Reinu kʼamajkuauati kʼuiripuecheri gobiernuechani

“Kʼuiripu juramukusïndi máteru kʼuiripuni solu para no sési ambe úkuni” (Eclesiastés 8:9). Tata Diosï Jeoba imeeri Reinu jimbo, sési peentaati iámindu no sési jásï ambe enga jaka jimboka no jurhimbikua jingoni úkuarhisïnga ambe ma.

Arhinta je Daniel 2:44 ka 2 Tesalonika 1:6-8, ka uandontskuarhi je íri ambe:

• ¿Ambe uaa Tata Diosï Jeoba ka Jesúsi, gobiernuecha jingoni ka imani kʼuiripuecha jingoni engaksï apoiariuajka?

• ¿Andijtsïsï seguru jaki eska ambe enga Tata Diosï Jeoba ka Jesúsi uaaka, jurhimbikua jingonksï uaaka ka eskaksï iáminduechani sési káuaka?

5. Jesúsi sánderu ambakiti Juramutiisti

Jimboka Jesúsi jindeeska Juramuti Tata Diosïri Reinurhu, uánikua ambakiti ambe uaati kʼuiripuecha jimbo. Exe je BIDEUNI parajtsï miántani néna xarhataspi Jesúsi eska uékasïnga jarhuataani kʼuiripuechani ka eska Tata Diosï íntskuska uinhapikua para ísï úni.

BIDEU: Jesúsi xarhatasti ambe enga uaaka Tata Diosïri Reinu (1:13)

Ambe enga Jesúsi úpka enga ixú Echerirhu japka, xarhatasti ambe enga uaaka Tata Diosïri Reinu. Aiatsperakuecha engaksï listarhu jaka, ¿nákichantsï sánderu uékasïni eska úkuarhiaka? Arhianta je iámindu tekstuechani nani engaksï pʼitakata jaka i aiatsperakuecha.

6. Tata Diosïri Reinu jimbo sésichi irekaaka sánderu orhepani

BIDEU: Ambakiti ambe engachi erokuarhini jaka para sánderu orhepatini (4:38)

Arhinta je Salmo 145:16 ka uandontskuarhi je íri ambe:

• ¿Nájtsï pʼikuarherasïni míteni eska Tata Diosï Jeoba íntsauaka “ambe engaksï uétarhinchajka imeecha engaksï tsípiti jaka”?

AMBE ENGACHI JORHENGUARHIKA

Tata Diosïri Reinu uaati ambe enga Tata Diosï uékajka. Eska iámu Echeri paraisu máeuaka ka eskaksï irekaaka ambakiti kʼuiripuecha engaksï Tata Diosï Jeobani kómarhiaka para méntkisï.

Ambejtsï jorhenguarhiski

• ¿Ambe uaa Tata Diosïri Reinu para pímbinhajkuntani Tata Diosï Jeobaeri nombrini?

• ¿Andichisï seguru jaki eska Tata Diosïri Reinu uaaka ambe engajtsïni Biblia aiachini jaka?

• Iámindu amberi enga Tata Diosïri Reinu uaaka, ¿nákintsï sánderu uékapirini exeni?

ÍSTU EXE JE INI AMBE

Jorhenguarhi je ambeeski Armajedoni.

“¿Ambeeski Armajedoni?” (Artikulu ma enga jw.org jimbo jaka)

Exe je ambe enga uandapka Jesúsi imani jurhiatikuecheeri enga kánikua no sési nitamakuarhinhaaka.

“¿Ambe arhikuekasïni ima jurhiatikuecha enga kánikua no sési nitamakuarhinhaaka?” (Artikulu ma enga jw.org jimbo jaka)

¿Nénaksï uaa familiecha eranhaskani eskaksï tsípikua jingoni irekaxakaia imani ambe jingoni enga úkuarhiaka Tata Diosïri Reinu jimbo?

Paraisurhu exekuarhi (1:50)

Arhinta je eksperiensiani “Uánikua ambe kurhamarhikuarhisïreenga” parajtsï exeni na enga acheeti ma enga politikarisï jámeenga exeantapka mókuntskuechani ima amberi enga kurhamarhikuarhienga.

“Biblia jarhuataasti mójtakuni irekua” (Aianhpiri, 1 de eneru de 2012)