JORHENGUARHIKUA 25
¿Ambe eratsetixaki úni Tata Diosï juchantsïni jimbo?
Biblia arhisïndi eskaksï kʼuiripuecha “no ióni irekasïn[ga] ka uánikua problemecha jingoni” (Job 14:1). Peru ¿ísï uékasïni Tata Diosï eskachi irekaaka? Ka enga no ísïika, ¿ambe eratsetixaki úni Tata Diosï parachi sési irekani? ¿Niáraa ísï úkuarhini? Exe je na engajtsïni xáni sési pʼikuastajka ambe enga Biblia mókuntajka.
1. ¿Néna uékasïni Tata Diosï eskachi irekaaka?
Tata Diosï Jeoba uékasïndi eskachi sési irekaaka. Enga kueraapka Adáni ka Ebani, sési jándikuarhu ma peeraaspti: jardini de Edénirhu. Ka jima “Tata Diosï újchakuraaspti ka arhiaspti: ‘Kánguarhia je sapiichani, ka uánikua úkuarhi je, ka uinira je echerini ka ánchita je’” (Génesis 1:28). Tata Diosï Jeoba uékasïreendi eskaksï kánguarhiapiringa sapiichani, ka eskaksï iámu Echerini paraisu ma úntapiringa ka eskaksï kuidariuapiringa animalichani. Tata Diosï Jeoba uékasïreendi eskachi irekapiringa para méntkisï ka eska no nema pʼamenchapiringa.
Nájkiruka no ísï úkuarhipka eska Tata Diosï na uékeenga ueenakuarhu,a no mójtakusti imeeri eratsekuani (Isaías 46:10, 11). Tata Diosï útasï uékaxati eskaksï kʼuiripuecha engaksï imani kurhajchajka irekaaka para méntkisï no no sési jásï ambe jingoni (arhinta je Jaŋaskuecha 21:3, 4).
2. Desde iásï, ¿nénachi uaa tsípikua jingoni irekani?
Tata Diosï Jeobajtsïni ísï kueraasti parachi uékani kurhandini ‘Tata Diosïri Uandakuani ka únchi eska na arhijka’, i ambe arhikuekasïndi uékani míteni imani ka k’éri ambe arhini (arhinta je Lukasʌ 11:28). Tata Diosï uékasïndi eskachi ambakiti pájperakua ma jatsiaka imani jingoni, eskachi jámaaka “imeeri xanharuecharhu”, eskachi xénchaaka ka eskachi iámu mintsita jingoni marhuakuaka (Deuteronomio 10:12; Salmo 25:14). Engachi úska iámu ini ambe, uaakachi meru tsípikua jingoni irekani nájkirukachi jatsiauaka problemechani. K’éri ambe arhini Tata Diosï Jeobani úsïndi eskachi sési irekaaka, jimbokachi ísï irekasïnga eska ima na uékajka.
JORHENGUARHI JE SÁNDERU AMBE
Ju je exeni na engajtsïni Tata Diosï Jeoba xarhatacheka uékperakua enga úka parhakpinini parachi irekani ka ambe engajtsïni jorhendajka imeeri Karakatarhu parachi sési irekani.
3. Tata Diosï Jeoba uékasïndi eskachi ambakiti irekua ma jatsiaka
Exe je BIDEUNI ka uandontskuarhi je íri ambe:
¿Andisï Tata Diosï xáni sési jásï parhakpinini ma kueraa parachi irekani?
Arhinta je Eclesiastés 3:11 ka uandontskuarhi je íri ambe:
¿Ambejtsïni jorhendasïni i tekstu Tata Diosï Jeobaeri ambe?
4. Ambe enga Tata Diosï Jeoba uékeenga úni ueenakuarhu no mójtakurhisti
Arhinta je Salmo 37:11, 29 ka Isaías 55:11, ka uandontskuarhi je íri ambe:
¿Nénachi míteski eska no mójtakurhiska ambe enga Tata Diosï uékeenga úni ueenakuarhu?
Kʼumanchikua ma enga kánikua no sési jáxejkia úsïndi sési jájkunhantani. Májkueni úkuarhisïndi Echeri jingoni: kʼuiripuechaksï iámu no sési jájkustia, peru Tata Diosï sési jántskantaati paraksï imeecha irekani engaksï xénchajka imani.
5. K’éri ambe arhini Tata Diosï Jeobani úsïndi eskachi sési irekaaka
Míteni andijtsïnisï kueraa Tata Diosï, úsïndi eskachi tsípikua jingoni irekaaka. Exe je BIDEUNI ka uandontskuarhi je íri ambe:
¿Ambe jarhuataspi Terumini míteni andijtsïnisï kueraa Tata Diosï?
Arhinta je Eclesiastés 12:13 ka uandontskuarhi je íri ambe:
Exeparini iámindu ambe enga Tata Diosï Jeoba úka juchantsïni jimbo, ¿ambechi úpirini úni parachi xarhatani eskachi jukaparharasïnga ini ambe?
MÁRUKSÏ I AMBE KURHANGUARHISÏNDI: “¿Andichisï irekani jaki? ¿Andichisï kueraanha?”.
¿Ambejtsï mókuntapirini?
AMBE ENGACHI JORHENGUARHIKA
Tata Diosï Jeoba uékasïndi eskachi meru tsípikua jingoni irekaaka para méntkisï ixú Echerirhu. Ka iásïjtuchi úsïnga tsípikua jingoni irekani engachi iámu mintsita jingoni kómarhijka Tata Diosï Jeobani.
Ambejtsï jorhenguarhiski
Enga Tata Diosï Jeoba kueraapka Adáni ka Ebani, ¿néna uékasïreeni eskaksï irekapiringa?
¿Nénachi míteski eska Tata Diosï no mójtakuska ambe enga uékeenga úni ueenakuarhu para kʼuiripuecha?
¿Ambeksïni jarhuataa parajtsï meru sési irekani?
ÍSTU EXE JE INI AMBE
Exe je andichisï uaa seguru jarhani eska jardini de Edéni meru jarhaspka.
“Jardini de Edéni, ¿solu uandantskua máeski?” (Aianhpiri, 1 de eneru de 2011)
Exe je andichisï seguru jaki eska Echeri méntkisï jauaka.
“¿K’amakurhia ma jurhiani Echeri?” (Artikulu ma enga jw.org jimbo jaka)
Exe je ambe enga Biblia uandajka andichisï kueraanha.
“¿Andichisï irekani jaki?” (Artikulu ma enga jw.org jimbo jaka)
Exe je na enga acheeti ma kuenta íntskukuarhepka eska kueratanchasïreenga ambe ma imeeri tsípikuarhu, nájkiruka ísï exeenga eska iámu ambe jatsispka.
a Máteru jorhenguarhikua jimbochi exeaka andisï no ísï úkuarhi eska Tata Diosï na uékeenga.