Nénajtsï uaa ménderu sési pájperantani Tata Diosï Jeoba jingoni

MÁNDANI uéxurhini uánikuechaksï kʼuanhatsentasïndi engaksï petanhantajka kúnguarhikuarhu. Ju je eranhaskani na enga sáni “tsípikuarhita jarhajka auandarhu” enga ma í xáni ambakiti karichi kʼuanhatsentajka (Luk. 15:7, 10). Enga chá jindeeka engajtsï kʼuanhatsentaka, seguru ja je eska Jesúsi, ánjelicha ka Tata Diosï Jeoba, kánikuaksï tsípixaka. Joperu jamberi engajtsï jánguarhintani jauakia sési pájperantani Tata Diosï Jeoba jingoni, jauati máru ambe engaksïni no jurajkuaka ísï úni. ¿Ambeksïni úpirini ójkutani, ka ambeksïni uaa jarhuatani parajtsï ísï úni?

MÁRU AMBE ENGAKSÏNI ÚPIRINGA ÓJKUTANI

Uánikua erachicha engaksï kʼuanhatsentajka kúnguarhikuarhu, no sésiksï pʼikuarherasïndi. Enga chá ísï nitamakuarhini jaka, jamberijtsï kurhangukujka na enga pʼikuarherapka rei Dabidi, nájkiruka ima puáminhantaapkia pekaduechani, ima uandaspti: “Kánikuarini no sési pʼikuastasïndi xáni uánikua ambe engani no sési úka” (Sal. 40:12; 65:3). Nema enga andarhientajka Tata Diosï Jeobani, uaati uánikua uéxurhini no sési pʼikuarherani ka kʼuratseni. Pori ejemplu, Isabellea enga 20 uéxurhini nóteru japkia kúnguarhikuarhu, uandasïndi: “Kánikua úkua jukanchasïreenga jakajkuni eskarini Tata Diosï Jeoba puáchintapiringa”. Engajtsï chá chkétakuarhiska uaakajtsï ménderu jarharini Tata Diosï Jeobani (Prov. 24:10). Jánguarhinta je paraka no ísï úkuarhiaka.

Máteruechaksï uandanhiasïndi eskaksï no uaaka imani ambe úni enga uétarhijka para úni ménderu sési pájperani Tata Diosï Jeoba jingoni. Antoine, enga na kʼuanhatsentapkia kúnguarhikuarhu, uandaspti: “Mirikurhispkia iámindu ambe engani jorhenguarhipka ka engani ueenga jiáni engani Testiguepka”. Jimbokaksï máru ísï pʼikuarherasïnga, nóteruksï jánguarhintasïndi marhuakuani Tata Diosï Jeobani xáni eskaksï xáni uaaka.

Ju je ejemplu ma jatsikuni. Enga kʼumanchikua ma no sési pakarajka kʼéri janikua ma jimbo, kʼumanchikueri dueniu kánikua no sési pʼikuarherasïndi jimboka jatsiska para jánguarhintani ka tiempu inchajpani para ménderu sési jájkuntani. Sáno májkueni, engajtsï chá nóteru ambakiti pájperakua ma jatsikia Tata Diosï Jeoba jingoni jimbokajtsï kʼéri pekadu ma úska, jamberijtsï ísï exejka eskajtsï jatsiska para kánikua jánguarhintani para ménderu sési pájperantani imani jingoni. Joperujtsï jatsiska jarhuajperata.

Tata Diosï Jeobajtsïni pʼímarhisïndi: “Ju je ka sésichi peentaaka ambe ma” (Is. 1:18). Jimbokajtsï chá jánguarhintaskia sési peentani ambe ma Tata Diosï Jeoba jingoni, imaksïni xénchasïndi engajtsï ísï úka. Eratsi je ini ambe: Ima uaati úrani chaari ejempluni para xarhatakuni Satanasini eska chkuanderari meeska (Prov. 27:11).

Engajtsï chá kʼuanhatsentakia Tata Diosï Jeoba jingoni, chájtsï andarhientaskia imani, ka imaksïni aiachisïndi eskaksïni ístu andarhientaaka (Sant. 4:8). Kánikua sési jarhasti eskaksï máteruecha exeaka eskajtsï kʼuanhatsentaskia kúnguarhikuarhu, joperu uétarhisïndi eskajtsï uaaka máteru ambe. Jatsiskajtsï para jánguarhintani sánderu xénchani chaari Taati ka Amiguni, Jeobani. ¿Nénajtsï uaa ísï úni?

ERATSI JE IMANI AMBE ÚNI ENGAJTSÏ UAAKA ÍSÏ ÚNI

Jánguarhinta je imani ambe úni engajtsï uaaka úni. Jamberijtsï útasï miáni jaka ambe engajtsï xáni jorhenguarhipka Tata Diosï Jeobaeri ambe ka ambe engajtsïni aiachijka. Joperu uétarhisïndi eskajtsï seguiriuaka jánguarhintani imani ambe úni enga ima jaiapanhentajka, komu uérani aianhpini, tánguarhikuecharhu nirani ka erachicha jingoni jarhani. Ju je exeni máru ambe engajtsï uaaka úni.

Someni uandontskuarhi je Tata Diosï Jeoba jingoni. Chaari Taatiksïni kurhanguchisïndi eskajtsï jamberi úkua jukanchaaka kómarhini jimbokajtsï no sési pʼikuarherasïnga imani ambe jimbo engajtsï úka (Rom. 8:26). Joperu jánguarhinta je kómarhini imani ka arhi je eskajtsï meru uékasïnga imeeri amigueni (Rom. 12:12). Andrej miántasïndi: “Kánikua no sési pʼikuarherasïreenga ka kʼuratseni joperu engani na kómarhiengia Tata Diosï Jeobani, sési pʼikuarherantasïreenga”. Engajtsï no mítejka ambe uandani kómarhikuarhu, uaakajtsï eratseantani rei Dabidiri kómarhikuechani engaksï Salmo 51 ka 65 jimbo jaka.

Pauani pauani jorhenguarhi je Bibliani. I ambeksïni jarhuataati parajtsï sánderu mintsikani ka xénchani Tata Diosï Jeobani (Sal. 19:7-11). Felipe uandasïndi: “Jimbokani no pʼindespka arhintani ka sánderu jorhenguarhini Biblieri ambe, inde ambe úspti eskani chkétakuarhipiringa ka eskani no sési pʼikuastapiringa Tata Diosï Jeobani. Jimbokani nóteru uékasïrengia ísï úkuarhinchani, eratsespka jatsini juchiiti jorhenguarhikua Biblieri ambe”. Engajtsï no míteka ambe jorhenguarhini, uaakajtsï arhini amiguni ma enga sési marhuakuni jaka Tata Diosïni eskaksïni jarhuataaka.

Ménderu amigu úkuarhi je erachicheri. Máru engaksï kʼuanhatsentajka, uandanhiasïndiksï eskaksï máteruecha no sési exeauaka. Larissa uandantasïndi: “Kánikua kʼuratsesïreenga, ísï pʼikuarherasïreenga enajkini no sési úkupi kúnguarhikuani. Ióni jamberi ísï pʼikuarheraspka”. Uaakajtsï seguru jarhani eska orhejtsïkuticha ka máteru erachicha engaksï sési marhuakuani jaka Tata Diosïni, uékaxakaksïni jarhuatani parajtsï ménderu sési pájperantani Tata Diosï Jeoba jingoni (exe je rekuadruni “Ambe engaksï uaaka úni orhejtsïkuticha”). Kánikuaksï tsípisïndi engajtsï kʼuanhatsentaka ka uékasïndiksï eskajtsï chájtu sési pʼikuarheraaka (Prov. 17:17).

¿Ambejtsï uaa úni parajtsï sánderu andarhierani kúnguarhikuani? Asï kuerata je tánguarhikuecharhu, jánguarhinta je someni uérani aianhpini erachicha jingoni. ¿Nénaksïni jarhuataa engajtsï jánguarhintaska ísï úni? Felix uandaspti: “Iámindu kúnguarhikuarhu anapuechajtsïni erontaxaptia. Kánikuarini sési pʼikuastaspti i ambe. Iáminduechajtsïni jarhuataspti parani sési pʼikuarherani kúnguarhikuarhu, exeni eskarini Tata Diosï Jeoba puáchintaspkia ka eskani úpiringa ménderu marhuakuni imani” (exe je rekuadruni “Ambe engajtsï uaaka úni”).

ASÏ KUATANTA JE

Engajtsï chá sési pájperantani jauaka Tata Diosï Jeoba jingoni, Satanasiksïni seguirini jauati problemechani juáchiani parajtsï chkétakuarhini (Luk. 4:13). Engajtsï uéjka sési preparadu jarhani, jánguarhinta je iásï sánderu sési pájperani Tata Diosï Jeoba jingoni.

Tata Diosï Jeoba aiakuasïndi imeeri karichichani: “Jirinhantauaka imeechani engaksï tsïncheka, imeechani engaksï támisï jámani jaka ménderuni juánguauaka, irhimakuauaka imeechani engaksï atakuarhika ka uinhaperantauaka imeechani engaksï chkerini jaka” (Ezeq. 34:16). Tata Diosï Jeoba jarhuataastia uánikua imeeri marhuarichani paraksï ménderu sési pájperantani imani jingoni. Ísï jimbo, uaakajtsï seguru jarhani eskaksïni uékasïnga jarhuatani parajtsï ménderu sési pájperantani imani jingoni.