Изге Язмалар тормышымны ничек яхшырта ала?

Изге Язмалар гади китап түгел. Анда Барлыкка Китерүчебездән киңәшләр бар (2 Тимутигә 3:16). Андагы хәбәр безгә бик нык тәэсир итә ала. Изге Язмаларда: «Аллаһының сүзе тере һәм кодрәтле»,— диелә (Еврейләргә 4:12). Аның тормышыбызны ике юл белән яхшыртырга кодрәте бар. Ул көндәлек тормышыбызда хәзер җитәкчелек бирә һәм Аллаһы хакында һәм вәгъдәләре турында белергә ярдәм итә (1 Тимутигә 4:8; Ягъкуб 4:8).

Хәзерге тормышыгызны яхшырту. Изге Язмалар шәхси сорауларда ярдәм итә ала. Ул мондый яклардан гамәли киңәшләр бирә:

• Башкалар белән мөнәсәбәтләр (Эфеслеләргә 4:31, 32; 5:22, 25, 28, 33).

• Эмоциональ һәм физик сәламәтлек (Зәбур 37:8; Гыйбрәтле сүзләр 17:22).

• Әхлакый нормалар (1 Көринтлеләргә 6:9, 10).

• Икътисади иминлек (Гыйбрәтле сүзләр 10:4; 28:19; Эфеслеләргә 4:28).

Азиядәге бер яшь кенә ирле-хатынлы Изге Язмалардагы киңәшләрнең файдасы өчен бик рәхмәтле. Алар, күп кенә яңа өйләнешкән парлар кебек, бер-берсен үзгәртергә тырышкан, һәм аларга бер-берсе белән аралашу авыр булган. Әмма алар Изге Язмалардан укыганнарын куллана башлаган. Нәтиҗәсе нинди булган? Винсент болай ди: «Изге Язмалардан укыганнарым миңа никахыбыздагы авырлыкларны ярату белән хәл итәргә ярдәм итте. Изге Язмалар буенча яшәү безгә бергә бәхетле тормыш алып барырга булыша». Хатыны Анелу́ аның белән ризалаша: «Изге Язмалардагы мисалларны уку безгә ярдәм итте. Хәзер мин бәхетле. Никахыбыз һәм максатларыбыз белән дә канәгать».

Аллаһы турында белем алу. Никахы турында әйтүдән тыш, Винсент шулай ук болай ди: «Изге Язмаларны укып, мин үземне Йәһвәгә элеккегә караганда якынрак хис итәм». Винсент әйткәннәре бер мөһим нәрсәгә игътибар итә: Изге Язмалар сезгә Аллаһы белән танышырга ярдәм итә ала. Шулай итеп сез аның киңәшләреннән дә файда алырсыз, аның белән дус булып та китә алырсыз. Һәм сез аның яхшы киләчәк — «чын тормышның» рәхәтен мәңге күрә алачак вакыт — турында үзенчәлекләрне ачканын күрерсез (1 Тимутигә 6:19). Башка бер китапта да андый белем юк.

Изге Язмаларны укый башлап, моны дәвам итсәгез, сез дә файда күрерсез: хәзерге тормышыгызны яхшыртырсыз һәм Аллаһы турында белем алырсыз. Әмма Изге Язмаларны укыганда сезнең күп сорауларыгыз туар. Шул чакта 2 000 ел элек яшәгән бер хәбәш кешесенең яхшы мисалын исегездә тотыгыз. Аның Изге Язмалар белән бәйле күп сораулары булган. Үзеннән укыганнарын аңлыймы дип сорагач, ул: «Әгәр берәрсе аңлатып бирмәсә, ничек аңлый алыйм инде?» — дип җаваплаганa. Шуннан соң ул бик теләп Гайсәнең беренче шәкертләренең берсеннән — оста Изге Язмалар өйрәтүчесе Филиптән — ярдәм кабул иткән (Рәсүлләр 8:30, 31, 34). Шундый ук карашта булып Изге Язмалар турында белергә телисез икән, без сезне бу брошюрада китерелгән үзегезгә якын адрес буенча язарга чакырабыз. Шулай ук якында яшәгән Йәһвә Шаһитләренә мөрәҗәгать итеп я якындагы Патшалык Залына барып була. Сез бүген үк Изге Язмаларны алып, аңа үзегезне яхшы тормышка алып барырга мөмкинлек бирә аласыз.