Без Гайсә Мәсихтән нәрсәгә өйрәнәбез?
Хак Аллаһы турында
Аллаһының исеме бармы?
Гайсә Аллаһының исеме бар дип өйрәткән. Ул: «Сез болай дога кылыгыз: Күктәге Атабыз! Исемең изге дип икърар ителсен»,— дигән (Маттай 6:9). Тәүратта Аллаһының исеме Йәһвә дип әйтелә (Яратылыш 2:4, искәрмә). Гайсә үз шәкертләре турында әйткәндә, Атасына догада: «Синең исемеңне аларга белдердем»,— дигән (Яхъя 17:26).
Йәһвә кем ул?
Гайсә Йәһвәне «бердәнбер хак Аллаһы» дип атаган, чөнки Йәһвә — Барлыкка Китерүче (Яхъя 17:3). «Кешеләрне бар иткәндә, Булдыручы баштан ук „аларны ир һәм хатын итеп бар итте“,— дигәнне сез укымадыгызмыни?» — дип әйткән Гайсә (Маттай 19:4). Шулай ук ул болай дигән: «Аллаһы Ул — Рух» (Яхъя 4:24). Шуңа күрә без Аллаһыны күрә алмыйбыз (Чыгыш 33:17—20).
Аллаһы бездән нәрсә таләп итә?
Бер кеше Гайсәдән: «Әмерләрнең кайсысы иң мөһим?» — дип сорагач, ул аңа болай дип җавап биргән: «Иң мөһим әмер... „Тыңла, Исраил! Раббы Аллаһыбыз — бердәнбер Раббы! Раббы Аллаһыңны бөтен йөрәгең, бөтен җаның, бөтен акылың һәм бөтен көчең белән ярат“. Ә менә икенчесе: „Якыныңны үзеңне яраткан кебек ярат“» (Марк 12:28—31).
Аллаһыны яратканыбызны без ничек күрсәтә алабыз?
Гайсә: «Мин Атаны яратам»,— дигән. Ул үзенең яратуын ничек күрсәткән? «Ата Миңа нинди әмер биргән булса, мин шуны башкарам»,— дип әйткән ул (Яхъя 14:31). Ул тагын болай дигән: «Мин һәрвакыт Ул теләгән эшләрне генә эшлим» (Яхъя 8:29). Без Аллаһы турында белем алып, аны шатландыра алабыз. Гайсә үзенең шәкертләре хакында дога кылганда, болай дип әйткән: «Сине, бердәнбер хак Аллаһыны... танып белү — шул мәңгелек тормыштыр» (Яхъя 17:3; 1 Тимутегә 2:4).
Без Аллаһы турында ничек белә алабыз?
Аллаһы турында белергә мөмкинлекләрнең берсе — ул барлыкка китергәннәрне күзәтү. Мәсәлән, Гайсә болай дигән: «Кошларга карагыз: алар чәчмиләр дә, урмыйлар да, ашлыкны амбарларга да салмыйлар, әмма аларны сезнең Күктәге Атагыз туендыра. Ә сез кошлардан кыйммәтлерәк түгелме соң?» Ул безне нәрсәгә өйрәтергә теләгән? Тормыштагы ихтыяҗлар турында борчылу безгә Аллаһыга хезмәт итәргә комачауларга тиеш түгел. Моңа юл куймыйк (Маттай 6:26—33).
Аллаһы турында белергә иң яхшы мөмкинлек — аның Сүзен, Изге Язмаларны өйрәнү. Гайсә Изге Язмаларны «Аллаһы сүзе» дип атаган (Лүк 8:21). Гайсә Аллаһыга мөрәҗәгать итеп, болай дигән: «Синең сүзең — хакыйкать» (Яхъя 17:17; 2 Петер 1:20, 21).
Гайсә кешеләргә Йәһвә турындагы хакыйкатьне белергә булышкан. Гайсә хакында аның бер шәкерте болай дигән: «Ул безгә юлда сөйләгәндә һәм Изге язманың мәгънәсен аңлатканда, безнең күңелләребез күтәрелеп китте түгелме соң?» (Лүк 24:32). Аллаһы турында белем алыр өчен, безгә басынкы һәм өйрәнергә әзер булырга кирәк. Гайсә: «Әгәр сез үзгәреп... балалар кебек булмасагыз, Күкләр Патшалыгына кермәячәксез»,— дип әйткән (Маттай 18:3).
Ни өчен Аллаһы турындагы белем бәхетле итә?
Безгә яшәүнең мәгънәсен аңларга кирәк, һәм Аллаһы бу яктан безгә ярдәм итә. Гайсә: «Рухи яктан фәкыйрьләр бәхетле»,— дигән (Маттай 5:3). Йәһвә безгә тормышның иң яхшы юлын күрсәтә. «Аллаһы сүзен тыңлаучылар һәм аны үтәүчеләр сәгадәтле!» — дип әйткән Гайсә (Лүк 11:28; Ишагыйя 11:9).
Аллаһы турында күбрәк белер өчен, «Изге Язмаларның хак тәгълиматлары» дигән китапның 1 нче бүлеген карагызa
[Искәрмә]
a Йәһвә Шаһитләре тарафыннан бастырылган.
[16 биттәге иллюстрация]
«Синең исемеңне аларга белдердем» (Яхъя 17:26)
[16, 17 биттәге иллюстрацияләр]
Йәһвәнең барлыкка китәргәннәрен күзәтеп һәм Изге Язмаларны өйрәнеп, без аның турында белә алабыз