Пәйгамбәрләрдән үрнәк алыгыз. Сафуния
1. Сафуния пәйгамбәр булып хезмәт иткәндә, Яһүд җирендә нинди хәлләр булган? Ул безгә нинди үрнәк калдырган?
1 Б. э. к. VII гасырның уртасы. Яһүд патшалыгындагы күп кенә кешеләр Баалга табына. Күптән генә түгел явыз патша Амонны үтергәннәр. Хәзер яшь Йошия патша идарә итә (2 Елъ. 33:21—34:1). Ул вакытта Йәһвә Сафуниягә үзенең хөкем хәбәрен сөйләргә куша. Сафуния, бәлки, Яһүд җирендәге патша нәселеннән булгандыр. Шулай да ул Йәһвәнең Яһүд башлыкларын хөкем итү хәбәрен йомшартыбрак сөйләмәгән (Саф. 1:1; 3:1—4). Без дә Сафуниядән үрнәк алып кыюлык күрсәтәбез һәм туганнарыбызга Йәһвәгә гыйбадәт кылуыбызга зыян китерергә юл куймыйбыз (Мат. 10:34—37). Сафуния нинди хәбәр сөйләгән һәм нинди җимешләр урган?
2. Йәһвәнең ачу көнендә сакланып калыр өчен, безгә нәрсә эшләргә кирәк?
2 Йәһвәне эзләгез. Йәһвәнең ачу көне килгәч, Аллаһы генә үзе кешеләрне үлемнән коткара алыр. Сафуния моны белгән, шуңа күрә ул, вакыт әле булганга, Яһүд җирендәге кешеләрне Йәһвәне эзләргә, тәкъвалыкны эзләргә һәм юашлыкны эзләргә өндәгән (Саф. 2:2, 3). Без дә кешеләрне Йәһвәне эзләргә өндибез. Ләкин моның өстәвенә безгә сөйләгәннәребез буенча яшәргә һәм Йәһвәгә һәрвакыт тугры калырга тәвәккәл булырга кирәк (Саф. 1:6). Без Йәһвәне аның Сүзен тырышып өйрәнеп һәм аңардан җитәкчелек сорап эзлибез. Без тәкъвалыкны әхлакый нормалар буенча яшәп эзлибез. Без юашлыкны эзлибез: тыңлаучанлык рухын күрсәтергә тырышабыз һәм Йәһвә оешмасы биреп торган җитәкчелеккә буйсынабыз.
3. Ни өчен безгә хезмәткә уңай караш саклау мөһим?
3 Яхшы җимешләр. Сафуниянең хөкем хәбәрен Яһүд җирендәге кайбер кешеләр кабул иткән. Алар арасында, иң мөһиме, яшь Йошия булган. Ул Йәһвәне балачактан ук эзли башлаган. Йошия потларга табынуга каршы нык көрәшкән (2 Елъ. 34:2—5). Безнең көннәрдә кайбер Патшалык орлыклары — юл буена, икенчеләре — ташлы урынга, өченчеләре чәнечкеле үсемлекләр арасында чәчелә, ә кайбер орлыклар яхшы җиргә чәчелә һәм җимеш китерә (Мат. 13:18—23). Патшалык орлыкларын чәчеп торсак, Йәһвә безне, һичшиксез, фатихалаячак (Мәд. 125:6).
4. Ни өчен безгә Йәһвәне көтү мөһим?
4 Яһүд җирендәге кайбер кешеләр Йәһвә беркайчан да эш итә башламас дип уйлаган. Ләкин Йәһвә аларны ышандырган: аның бөек көне якын (Саф. 1:12, 14). Йәһвәдә сыеныч тапкан кешеләр генә котылып калачак (Саф. 3:12, 17). Йәһвәне көткән арада, әйдәгез, мәһабәт Аллаһыбызга кардәшләр белән бергә гыйбадәт кылып шатлык табыйк! (Саф. 3:8, 9)