Яшь абый-кардәшләр, сез җыелыштагы вазифаларга омтыласызмы?
1. Яшь абый-кардәшкә 1 Тимутигә 3:1 дәге киңәшне кайчан куллана башларга кирәк?
1 Рәсүл Паул язганча, җыелыштагы вазифаларга «омтылучы кеше игелекле эшкә омтыла» (1 Тим. 3:1). Аллаһы тарафыннан рухландырылган бу сүзләр абый-кардәшләрне төрле җаваплы вазифаларга яраклы булыр өчен тиешле адымнар ясарга дәртләндерә. Андый вазифаларга ничә яшьтән омтыла башларга кирәк? Яшь чактан ук башласаң, яхшырак. Шулай итеп син кирәкле өйрәтү алырсың һәм үскәч, хезмәттәш ярдәмче булып билгеләнергә яраклы икәнеңне күрсәтерсең (1 Тим. 3:10). Син суга чумдырылу үткән яшь абый-кардәш булсаң, үзеңә нинди рухи максатлар куя аласың?
2. Фидакарьлек рухын ничек үстереп һәм күрсәтеп була?
2 Фидакарьлек рухы. Исеңдә тот: син берәр титулга түгел, ә игелекле эшкә омтыласың. Шуңа күрә кардәшләреңә ярдәм итәргә теләгеңне үстер. Моның өчен бер мөмкинлек — Гайсәнең үрнәге турында уйлану (Мат. 20:28; Яхъя 4:6, 7; 13:4, 5). Йәһвәдән сиңа башкаларга карата игътибарлы булырга булышсын дип сора (1 Көр. 10:24). Җыелыштагы олы яшьтәге я авырган кешеләргә берәр ничек ярдәм итә аласыңмы? Патшалык Залы янындагы үләнне чабуда, карны көрәүдә я Залга кагылышлы башка төрле эшләрдә катнаша аласыңмы? Хезмәт мәктәбендә берәрсе урынына чыгыш ясарга кирәк булса, син андый чыгышка ризалашасыңмы? Башкаларга фидакарь ярдәм итү сиңа шатлык китереп торачак (Рәс. 20:35).
3. Рухилык никадәр мөһим, һәм аны үстерер өчен нәрсә эшләргә?
3 Рухилык. Җыелыштагы вазифаларны үтәүче кардәшнең берәр махсус талантка я сәләткә ия кеше булуына караганда рухи кеше булуы күпкә мөһимрәк. Рухи кеше бар нәрсәгә Йәһвәнең һәм Гайсәнең карашы белән карарга тырыша (1 Көр. 2:15, 16). Аның тормышында «рух җимеше» күренеп тора (Гәл. 5:22, 23). Ул Патшалык эшләрен беренче урынга куя һәм ашкынып вәгазьли (Мат. 6:33). Шәхси өйрәнүнең яхшы графигын төзе, бу сиңа рухи сыйфатларны үстерергә булышыр. Мәсәлән, Изге Язмаларны һәр көн укы, яңа чыккан брошюраларның һәр санын укып бар. Шулай ук җыелыш очрашуларына әзерләнеп килү бик мөһим (Мәд. 1:1, 2; Евр. 10:24, 25). Яшь Тимутине рухи яктан үсәргә дәртләндергәндә рәсүл Паул: «Өйрәткәннәреңә игътибарлы бул»,— дип язган (1 Тим. 4:15, 16). Теократик хезмәт мәктәбендә бирелгән йөкләмәләреңне үтәр өчен бар көчеңне куй. Вәгазьгә барыр алдыннан әзерлән һәм бу хезмәттә регуляр рәвештә катнаш. Үзеңә рухи максатлар куй. Мәсәлән, пионер булып я Вефильдә хезмәт итүне яисә Өйләнмәгән абый-кардәшләр өчен Изге Язмалар мәктәбендә укуны үзеңә максат итеп куй. Шул максатларга ирешер өчен тиешле адымнар яса. Рухи кеше булырга омтылу сиңа «яшьлеккә хас теләкләрдән качарга» булышыр (2 Тим. 2:22).
4. Ни өчен ышанычлы һәм тугры булу югары бәяләнә?
4 Ышанычлы һәм тугры. Беренче гасырда мохтаҗлыктагы мәсихчеләргә ризыкны таратыр өчен билгеләнгән абый-кардәшләр «хөрмәт казанган» булганга, күрәсең, ышанычлы һәм тугры булганга күрә, рәсүлләр бу эш өчен инде борчылып тормаган. Шулай итеп алар башка мөһим нәрсәләр турында кайгырта алган (Рәс. 6:1—4). Сиңа да җыелышта берәр йөкләмә бирелсә, аны мөмкин кадәр яхшырак башкарып чыгарга тырыш. Нухтан үрнәк ал: ул көймә төзү буенча бирелгән күрсәтмәләрне төгәл үтәгән (Ярат. 6:22). Йәһвә тугрылыкны бик югары бәяли, һәм бу сыйфат кешенең рухи яктан җитлеккәнлеген күрсәтә (1 Көр. 4:2; «Өйрәтүнең файдасы» дигән рамканы кара.)
5. Ни өчен яшь абый-кардәшләргә җыелыштагы вазифаларга омтылырга кирәк?
5 Пәйгамбәрлектә әйтелгәнчә, Йәһвә уңыш җыю эшен тизләтә (Ишаг. 60:22). Уртача 250 мең кеше һәр ел суга чумдырылу үтә. Шулай итеп хакыйкатькә күп кенә кеше килә һәм, әлбәттә, җыелышлар турында кайгыртыр өчен яраклы рухи ир-атлар кирәк. Аеруча безнең көннәрдә Йәһвә хезмәтендә бик күп эшләр башкарырга кирәк (1 Көр. 15:58). Яшь абый-кардәшләр, сез җыелыштагы вазифаларга омтыласызмы? Алайса, сез чын мәгънәдә игелекле эшкә омтыласыз!
[2 биттәге иллюстрация]
Хакыйкатькә күп кенә кеше килгәнгә, җыелышлар турында кайгыртыр өчен яраклы рухи ир-атлар кирәк
[3 биттәге рамка]
Өйрәтүнең файдасы
Өлкәннәр җыелыштагы вазифаларны үтәр өчен яраклы яшь абый-кардәшләргә йөкләмәләр биреп, аларны өйрәтсәләр, бу шул яшьләргә зур файда китерә. Бер район күзәтчесе җыелыш очрашуыннан соң бер вәгазьче белән сәхнәдә сөйләшеп утырганда, яннарында басып торган бер малайга игътибар иткән. Район күзәтчесе аңардан сөйләшергә телиме дип сорагач, шул малай аңа һәр очрашудан соң сәхнәне пылесос белән чистартырга йөкләмә бирелгән дип җавап биргән. Әти-әнисе инде кайтып китәргә әзер булса да, аның үз вазифасын үтәмичә кайтып китәсе килмәгән. Район күзәтчесенә бу бик нык тәэсир иткән. Ул болай дип әйтә: «Бу җыелыштагы өлкәннәр яраклы яшь абый-кардәшләргә төрле йөкләмәләр биреп өйрәтеп торалар. Нәтиҗәдә, җыелышка килеп китүем вакытында алар берәр абый-кардәшне хезмәттәш ярдәмче итеп тәкъдим итәләр».