2 ДӘРЕС

Сөйләм телен куллану

2 Көринтлеләргә 2:17

МАКСАТ. Табигый һәм чын күңелдән сөйлә. Сөйләгәннәреңә ышанганың һәм башкалар турында кайгыртуың сизелсен.

КИҢӘШЛӘР:

Дога кылып, җентекләп әзерлән. Дулкынланмас өчен, ә игътибарны хәбәреңә туплау өчен ярдәм сорап дога кыл. Ачыклыйсы төп фикерләрне исеңдә тот. Фикерләрне үз сүзләрең белән белдер. Бастырылган материалны сүзгә-сүз сөйләргә тырышма.

Изге Язмалардан я башка басмадан өзек укырга булсаң, аны шома укыр өчен, текст белән яхшылап таныш. Кеше сүзләре очраганда, аларны тиешле хисләр белән укы, әмма укуың театраль тамаша булып китмәсен.
Чын күңелдән сөйлә. Тыңлаучыларың ни өчен бу хәбәрне ишетергә тиеш икәне турында уйлан. Шулчак гәүдә торышыңда, ишарәләреңдә һәм йөзеңдә җылылык, эчкерсезлек һәм дуслык чагылыр.

Үзеңне табигый тоту үзеңне чиктән тыш иркен тотуны аңлатмый. Аңлаешлы һәм дөрес сөйләп, хәбәреңнең әһәмиятле икәнен күрсәтерсең.
Тыңлаучыларыңа кара. Кеше күзенә карап сөйлә. Нотык дәвамында кеше төркеменә карар я алар өстеннән күз йөртер урынына вакыт-вакыт аерым кешеләргә карарга тырыш.