«Зуррак ашкыну һәм көчлерәк ярату хисе белән»

1922 елның сентябрь аеның шушы җомга көне иртәннән үк эссе булган. Конгресс үткән залда якынча 8 000 кеше җыелган. Программа рәисе хәзер программаның мөһим өлеше башланачак һәм аның вакытында һәркем залдан чыгып китә ала, ләкин кире керә алмаячак дигән белдерү ясаган.

Башта конгрессның делегатлары җырлар җырлаган, шуннан соң сәхнәгә Джозеф Рутерфорд кардәш чыккан. Залда утыручыларның күбесе тын да алмыйча утырган. Ә эсселек аркасында бер урында утыра алмыйча йөргән кайберәүләрне нотыкчы утырырга һәм игътибар белән тыңларга өндәгән. Нотык башланган, әмма кем дә булса сәхнә өстендә эленеп куелган зур һәм җыйнак кына төрелгән тукыма рулонны күргән микән?

Нотык «Күкләр Патшалыгы якынлашты» дип исемләнгән булган. Сәгать ярым дәвамында залда Рутерфорд кардәшнең көчле тавышы яңгыраган. Ул борынгы вакытта яшәгән пәйгамбәрләрнең Патшалыкның килүе хакында курыкмыйча игълан иткәннәре турында сөйләгән. Нотыгының кульминацион ноктасына җиткәндә ул тыңлаучылардан: «Сез данлыклы Патшаның идарә итә башлавына ышанасызмы?» — дип сораган. Тыңлаучылар каты тавыш белән: «Әйе!» — дип җаваплаган.

«Алайса Аллаһы Тәгаләнең уллары яңадан вәгазьгә! Менә, Патша хакимлек итә! Сез — аның хәбәрчеләре. Шуңа күрә Патшаны һәм аның патшалыгын игълан итегез, игълан итегез, игълан итегез»,— дигән Рутерфордның сүзләре яңгыраган.

Шул мизгелдә рулон ачылып киткән һәм барысы да: «Патшаны һәм аның Патшалыгын игълан итегез!» — дигән сүзләр язылган зур плакатны күргән.

«Ишеткәннәре барысын да бик нык дулкынландырды»,— дип исенә төшерә Рей Бопп. Анна Гарднер сүзләре буенча, «алкышлар шулкадәр көчле иде ки, хәтта залдагы балкалар селкенде». «Барысы да бер кеше кебек үз урыннарыннан торып басты»,— дигән Фред Тварош. Ә Эвангэлос Скуффас исемле абый-кардәш анда булганны болай итеп сурәтләгән: «Безне урыннарыбыздан торып басарга ниндидер көч этәргән кебек булды. Без бастык, һәм безнең күзләребез яшьләр белән тулды».

Шул конгресска килгәннәрнең күбесе Патшалык турындагы яхшы хәбәрне инде вәгазьләп йөргән. Әмма хәзер алар үз максатлары нәрсәдән гыйбарәт икәнен тагы да ачыграк итеп аңлаган. Этел Беннекофф исемле апа-кардәш искә төшергәнчә, Изге Язмаларны Тикшерүчеләр «элеккегә караганда зуррак ашкыну һәм көчлерәк ярату хисе белән» вәгазьләргә булган. 18 яшьлек Одесса Так конгресстан кайткач, Ишагыя 6:8 дә язылган «Кем барыр?» дигән өндәүгә көчле теләк белән җавап бирергә тәвәккәл булган. Ул болай дип исенә төшергән: «Мин кайда, ничек һәм нәрсә турында вәгазьләргә кирәклеген белми идем. Миңа шунысы гына билгеле иде, минем: „Менә мин! Җибәр мине“,— дигән Ишагыя кебек буласым килә иде». Ралф Леффлер кардәш болай дип сөйли: «Бүген бөтен җир буенча таралган Патшалык турындагы киң масштаблы вәгазьләү эше нәкъ шул истәлекле көнне башланды да».

1922 елда Сидар-Пойнтта үткән конгрессның тарихка истәлекле теократик вакыйга буларак кереп калганы бер дә гаҗәп түгел. Джордж Гангас болай дигән булган: «Шул конгресс мине беркайчан да андый очрашуларны калдырмаска дәртләндерде». Үзе искә төшергәнчә, ул андый очрашуларны беркайчан да калдырмаган. Джулия Уилкокс үз хисләре турында болай дип язган: «Безнең басмаларыбызда 1922 елда Сидар-Пойнтта үткән конгресс турында искә алынганда, кичергән хисләремне тел белән әйтеп бетереп булмый. Минем һәрвакыт: „Йәһвә, миңа шул конгресста булырга мөмкинлек биргәнең өчен рәхмәт сиңа“,— дип әйтәсем килә».

Мөгаен, күпләребезнең йөрәкләрендә тирән эз калдырган конгресслар һаман да хәтердәдер. Алар, һичшиксез, безне ашкынып вәгазьдә катнашырга һәм бөек Аллаһыбызга һәм ул билгеләгән Патшага карата мәхәббәтебезне тирәнәйтергә дәртләндерми калмагандыр. Конгресслар турындагы андый истәлекләр безне: «Йәһвә, миңа шул конгресста булырга мөмкинлек биргәнең өчен рәхмәт сиңа!» — дип әйтергә дәртләндерә.