Ebikorwa by’Abakwenda
11 Abakwenda hamu n’ab’oruganda omu Buyudaaya, bakahurra ngu abantu ab’amahanga na bo bakaba baikiriize ekigambo kya Ruhanga. 2 Nahabweki Petero obu yaizire Yerusaalemu, abarukusagika kusarwa baatandika kumujumirra,* 3 nibagamba bati: “Ogenzere omu nju y’abantu abatasazirwe kandi walya na bo.” 4 Nubwo Petero yabasoborra ensonga enu omu bwijwire, naagamba ati:
5 “Nkaba ndi omu rubuga rwa Yopa ninsaba, natunga okwolekwa, narora ekintu ekirukusisana nk’esuuka enkooto ey’ekitaani neesirimuka kuruga omu iguru ekwasirwe ha nsonda zaayo ina, yateekwa hansi kandi yaija nambere ndi. 6 Hanyuma y’okugyetegereza kurungi narora ebisoro eby’amaguru ana eby’omu nsi, eby’omu kisaka, ebyekurra hansi, hamu n’ebinyonyi eby’omu mwanya. 7 Kandi nahurra iraka niringambira liti: ‘Petero imuka obaage olye!’ 8 Baitu nagamba nti: ‘Nangwa Mukama wange, habwokuba ekintu ekitangirwe rundi ekitasemiire tikikataahaga omu kanwa kange.’ 9 Omurundi ogwa kabiri, iraka kuruga omu iguru lyagamba liti: ‘Ebintu Ruhanga ebi asemiize leka kubyeta ebitasemiire.’ 10 Kinu kikabaho omurundi ogwa kasatu kandi buli kimu kyona kyayongera kyatwarwa omu iguru. 11 Ekindi, abasaija basatu abakaba basindikirwe hali nyowe kuruga Kaisaliya, bakaba beemeriire nambere tukaba nitwikara. 12 Hanyuma omwoyo gwangambira kugenda na bo ntarukugurukyagurukya naakake. Baitu ab’oruganda banu mukaaga bakagenda na nyowe kandi twataaha omu nju y’omusaija.
13 “Omusaija ogu yatugambira nkooku yarozere malaika ayemeriire omu nju ye naagamba ati: ‘Tuma abasaija bagende Yopa beete Simooni arukwetwa Petero, 14 kandi naija kubagambira ebintu ebisobora kukoonyera iwe n’ab’omuka yaawe boona kujunwa.’ 15 Baitu obu natandikire kubaza, omwoyo ogurukwera gwabaijaho nkooku na itwe gwatwizireho ha kubanza. 16 Eki obu kyabaireho, naijuka ebigambo bya Mukama waitu, ebi yagambaga ati: ‘Yohaana akabatiza n’amaizi, baitu inywe mulibatizibwa n’omwoyo ogurukwera.’ 17 Nahabweki, Ruhanga obu araaba yabahaire ekisembo nikyo kimu ekya busa, na itwe abaikiririize omu Mukama waitu Yesu Kristo eki atuhaire, niinyowe oha ayaakusoboire kulemesa Ruhanga?”*
18 Obu baahuliire ebintu binu, baaleka kuhakana,* kandi baanyumiza Ruhanga, nibagamba bati: “Abantu ab’amahanga na bo Ruhanga abahaire omugisa ogw’okwegarukamu nukwo basobole kutunga obwomeezi.”
19 Abo abakaba bararangire habw’okuhiiganizibwa okwabaireho habwa Sitefano, bakagenda baahika Foinikiya, Kupuro hamu na Antyokiya, baitu bakagambira Abayudaaya bonka, ekigambo. 20 Baitu omuli bo, hakaba harumu abamu abaarugire Kupuro na Kulene baija Antyokiya kandi baatandika kubaza n’abantu abarukubaza Oruyonaani, nibabatebeza amakuru amarungi aga Mukama waitu Yesu. 21 Kandi omukono gwa Yahwe* gukaba guli na bo kandi abantu baingi bakafooka abaikiriza baahinduka baija hali Mukama waitu.
22 Ab’omu kitebe kya Yerusaalemu obu baahuliire ebi, baatuma Bbaranabba kugenda Antyokiya. 23 Obu yahikireyo, yarora embabazi za Ruhanga enyingi muno, yasemererwa muno kandi yatandika kubeekambisa boona kwikara bagumiire hali Mukama waitu n’omutima gwabo gwona; 24 habwokuba akaba ali musaija murungi, aijwire omwoyo ogurukwera hamu n’okwikiriza. Kandi abantu baingi baikiririza omu Mukama waitu. 25 Hanyuma yagenda Taruso kuserra Saulo. 26 Obu yamuzoire, yamuleeta Antyokiya. Nahabweki kumara omwaka gwona, baasorrokanaga na bo omu kitebe, nibeegesa abantu baingi, kandi omu Antyokiya nuho abeegeswa baabandize kwetwa Abakristaayo, ibara eryarugire hali Ruhanga.
27 Omu biro ebi, banabbi bakaruga Yerusaalemu baija Antyokiya. 28 Omu hali bo ow’akaba naayetwa Agabo akeemerra yaranga kuraba omu mwoyo ngu enjara ey’amaani ekaba eri haihi kugwa omu nsi yoona, kandi ekabaho kwo omu kasumi ka Kurawudiyo. 29 Nahabweki, abeegeswa baacwamu ngu buli omu aheyo obukoonyezi* kusigikirra nkooku arukusobora, nukwo busindikwe hali ab’oruganda abarukwikara omu Buyudaaya; 30 kandi eki bakakikora, baabusindikira abagurusi kuraba omu Bbaranabba na Saulo.