Ebikorwa by’Abakwenda
14 Obu bakaba bali Ikoniyo, baataaha omu isorrokaniro ly’Abayudaaya kandi baabaza omu mulingo omurungi, kyaleetera Abayudaaya n’Abayonaani baingi kuhinduka baafooka baikiriza. 2 Baitu Abayudaaya abataraikiriize, baasoonasoona abantu ab’amahanga kuhakaniza ab’oruganda. 3 Paulo na Bbaranabba bakamara akasumi nibabaza n’obumanzi habw’obusobozi obu baatungire kuruga hali Yahwe,* ayahaire obwakaiso oburukukwata ha kigambo ky’embabazi ze enyingi muno kuraba omu kubasobozesa kukora obwokurorraho n’ebyamahano. 4 Baitu abantu ab’omu rubuga oru baayebaganizaamu; abamu baagenda ha rubaju rw’Abayudaaya kandi abandi ha rubaju rw’abakwenda. 5 Abantu ab’amahanga hamu n’abalemi baabo bakalengaho kubakora kubi n’okubateera amabaale, 6 baitu kikabamanyisibwa kandi bairukira omu mbuga za Likoniya, Rusitura na Derebbe hamu n’omu byaro ebyetoroire ebicweka ebi. 7 Obu baahikire oku baagumizaamu kurangirra amakuru amarungi.
8 Omu Rusitura, hakaba haliyo omusaija ow’akaba aikaliire hansi aramaire ebigere. Akazaarwa ali mulema kandi akaba atakarubataga. 9 Omusaija onu akaba naahuliiriza Paulo obu akaba naabaza. Paulo yamwikazaaho amaiso kandi obu yarozere ngu aine okwikiriza okusobora kumukiza, 10 omu iraka erya haiguru yagamba ati: “Imuka oyemerre.” Omusaija yaguruka yatandika kurubata. 11 Ekitebe ky’abantu obu baarozere Paulo eki akaba akozere baatandika kutokera haiguru omu rulimi Orulikoniya nibagamba bati: “Baruhanga bafookere nk’abantu kandi baizire nambere tuli!” 12 Kandi Bbaranabba baatandika kumweta Zeu,* baitu Paulo baamweta Hereme,* habwokuba nuwe akaba naayebembera omu kubaza. 13 Kandi nyakatagara wa Zeu, yekaru ye ey’ekaba eri ha mulyango gw’orubuga, yaleeta enimi n’ebyakyo ha mulyango gw’orubuga naagonza kuhayo ebihongwa ali hamu n’ekitebe ky’abantu.
14 Baitu omukwenda Bbaranabba n’omukwenda Paulo obu baakihuliire, baatemura ebijwaro byabo kandi bairuka baataaha omu kitebe ky’abantu, baatokera haiguru nibagamba bati: 15 “Bantu inywe, habwaki nimukora ebintu binu? Na itwe tuli bantu abaine obuceke nka inywe; kandi nitubamanyisa amakuru amarungi nukwo musobole kuruga omu bintu binu ebitaine mugaso, mwije hali Ruhanga omwomeezi, ayakozere iguru, n’ensi, n’enyanja hamu n’ebintu byona ebirumu. 16 Omu busumi obwa kara akaikiriza amahanga kugendera omu mihanda yago, 17 noobu kiraaba ngu uwe wenka akeeheera obwakaiso kuraba omu kukora ebirungi, nk’okubaha enjura kuruga omu iguru, kweza ebyokulya omu kasumi kaabyo, kubaha ebyokulya omu bwingi n’okwijuza emitima yanyu n’okusemererwa.” 18 Baitu noobu baabalize ebintu ebi, batasobole kutanga abantu kubahongera.
19 Baitu Abayudaaya baaruga Antyokiya na Ikoniyo, baasoonasoona ebitebe by’abantu, baateera Paulo amabaale, kandi baamukurra baamunaga aheeru y’orubuga nibateekereza ngu afiire. 20 Baitu abeegeswa obu baizire baamwetoroora, yaimuka yataaha omu rubuga. Ekiro ekyahondiireho, uwe na Bbaranabba baarugayo baagenda Derebbe. 21 Hanyuma y’okurangirra amakuru amarungi omu rubuga oru n’okufoora abantu baingi abeegeswa, baagaruka Rusitura, Ikoniyo, na Antyokiya. 22 Obu baahikire oku, baagarramu amaani abeegeswa nibabeekambisa kwikara omu kwikiriza kandi baagamba bati: “Tusemeriire kuraba omu mihito nyingi kusobora kutaaha omu Bukama bwa Ruhanga.” 23 Kandi baakoma abagurusi omu buli kitebe, hanyuma y’okusaba n’okusiiba, baabakwasa Yahwe,* ou baikiriize.
24 Hanyuma baaraba Pisidiya kandi baahika omu Pamufuliya, 25 kandi hanyuma y’okurangirra ekigambo omu Perega, baasirimuka Ataliya. 26 Obu baarugire oku, baayambuka enyanja baagenda Antyokiya, nambere Ruhanga yaboolekiire embabazi ze enyingi muno habw’omulimo ogu bakaba bamazire kukora.
27 Obu baahikireyo, baasorooza hamu ekitebe, baabagambira ebintu bingi Ruhanga ebi akaba akozere kuraba omuli bo, kandi nkooku akaba akinguliireho abanyamahanga omulyango gw’okwikiriza. 28 Nahabweki, baikara n’abeegeswa kumara akasumi.