Ebikorwa by’Abakwenda
19 Apolo obu akaba ali omu Kolinso, Paulo akaraba omu muhanda ogw’obwerre, yasirimuka yahika Efeeso. Oku yasangayo abeegeswa abamu 2 kandi yabakaguza ati: “Mukatunga omwoyo ogurukwera obu mwafookere abaikiriza?” Baamugarukamu bati: “Noomanyisa ki, titukahurrahoga ngu haliyo omwoyo ogurukwera.” 3 Yayongera yabakaguza ati: “Hati, mukabatizibwa omu mulingo ki?” Baamugarukamu bati: “Omu kubatiza okwa Yohaana.” 4 Paulo yagamba ati: “Yohaana akabatiza n’okubatiza okw’akokurorraho akarukwoleka okwegarukamu, naagambira abantu kwikiririza omuli ogu arukwizira enyuma ye kandi ogu nuwe Yesu.” 5 Obu baahuliire eki, baabatizibwa omu ibara lya Mukama waitu Yesu. 6 Kandi Paulo obu yabataireho emikono* ye, omwoyo ogurukwera gwabaijaho, baatandika kubaza omu ndimi ezindi n’okuranga obunabbi. 7 Kandi boona hamu bakaba bali nk’abasaija 12.
8 Kumara emyezi esatu, yagendaga omu isorrokaniro naabaza n’obumanzi, naaha embazo, naabasoonasoona kuraba omu kuhingisaniza na bo ebiteekerezo ha birukukwata ha Bukama bwa Ruhanga. 9 Baitu habwokuba bamu bakaba baine ekyeju, bakanga kwikiriza* nibabazaaho kubi Omuhanda* omu maiso g’ekitebe ky’abantu, Paulo yabarugaho, yaihayo abeegeswa kandi buli kiro yahaga embazo omu kyombeko ky’isomero lya Turano. 10 Kinu kikabaho kumara emyaka ebiri, nukwo boona abaikaraga omu isaza lya Asiya Abayudaaya n’Abayonaani baahurra ekigambo kya Mukama waitu.
11 Kandi Ruhanga akaikara naakora ebyamahano eby’amaani kuraba omu Paulo, 12 n’engoye ezaabaga zikwasire ha mubiri gwe, abantu baazitwarraga abarwaire nibakira endwaire zaabo, kandi n’emyoyo emibi neebarugamu. 13 Baitu Abayudaaya abamu abaarabamuga nibabinga daimooni, na bo bakalengaho kukozesa ibara lya Mukama waitu Yesu kubinga emyoyo emibi; nibagamba bati: “Ninkuragira omu lbara lya Yesu, Paulo ou atebezaaho.” 14 Hakaba haroho abaana musanju aba mukuru wa banyakatagara Omuyudaaya arukwetwa Sikewa abaakoraga eki. 15 Baitu omwoyo omubi gukabagambira guti: “Yesu mmumanyire, na Paulo mmumanyire, baitu inywe niinywe baha?” 16 Nubwo omusaija ow’akaba aine omwoyo omubi, yabagurukira boona yabakiza amaani kandi yabasingura, baaruga omu nju nibairuka bali busa kandi bahutaire. 17 Kinu kyamanywa Abayudaaya n’Abayonaani abakaba nibaikara omu Efeeso; baatiina muno kandi ibara lya Mukama waitu Yesu, lyanyumizibwa. 18 Kandi baingi abakaba baafookere baikiriza, baijaga kandi nibaatura ebikorwa byabo omu rwijwire. 19 Kandi baingi hali abo abaakoraga eby’obufumu baaleeta ebitabu byabo baabisorooza hamu, baabyokya abantu boona nibarora. Obu baabazire omuhendo gwabyo, baasanga niguhika ebicweka by’efeeza 50,000. 20 Nahabweki, ekigambo kya Yahwe* kikeeyongera kuraranga n’okuba ky’amaani.
21 Hanyuma y’ebintu ebi kubaho, Paulo yacwamu omu mutima gwe ngu hanyuma y’okuraba Makedoni, na Akaya naija kugenda Yerusaalemu. Yagamba ati: “Hanyuma y’okurabayo, niinyija n’okugenda Rooma.” 22 Nubwo yatuma babiri omu Makedoni abaamukoonyeraga kandi abo nubo Timoseo, hamu na Erasito, baitu uwe yaikara omu isaza lya Asiya kumara akasumi.
23 Omu kasumi ako, hakabaho akaimukirro akarukukwata ha Muhanda. 24 Habwokuba omusaija arukwetwa Demetiriyo omuheesi w’efeeza ayakoraga obubandiro obw’efeeza obwa Atemi, yaleeteraga abaheesi amagoba maingi. 25 Akabasorooza hamu n’abaheesi abandi yabagambira ati: “Basaija inywe, mukimanyire kurungi ngu omu mulimo gwaitu gunu nuho twiha itungo. 26 Hati nimurora kandi nimuhurra hatali omu Efeeso honka, baitu haihi omu isaza lyona erya Asiya, Paulo onu asoonasoonere ekitebe ky’abantu baingi yabahindura enteekereza naagamba ngu baruhanga abakozerwe emikono, tibali baruhanga naakake. 27 Ekindi, akabi akaroho tikuli kurabyamu omulimo gwaitu amaiso kyonka, baitu na yekaru eya ruhanga ow’amaani omukazi Atemi niija kurorwa nk’etaine mugaso, kandi nkooku arukuramibwa omu isaza lyona erya Asiya n’ensi yoona naija kuba atakyateekwamu ekitiinisa.” 28 Obu baahuliire eki baakwatwa ekiniga, baatokera haiguru bati: “Atemi ow’Abefeeso mukuru muno!”
29 Nubwo orubuga rwona rwabamu akaimukirro, boona bairuka baagenda omu kiikaro nambere boolekera emizaano, baakurra Gayo na Alisitako aba Makedoni abaagendaga na Paulo. 30 Baitu Paulo akaba naagonza kugenda nambere abantu bali, baitu abeegeswa baamutanga. 31 N’abamu abaateekanizaaga emyoleko n’emizaano abakaba bali banywani be, baamutumaho nibamwesengereza ataija omu kiikaro eki, nukwo atateeka obwomeezi bwe omu kabi. 32 Ekitebe ky’abantu boona baimukirra, buli omu naabaza ekye, kandi abarukukira obwingi bakaba batamanyire ensonga habwaki beesoroize hamu. 33 Nubwo Abayudaaya baiha Alekizanda omu kitebe ky’abantu, baamuleeta omu maiso nibamusindika, kandi Alekizanda yaimukiza abantu omukono, naagonza kwetonganaho. 34 Baitu obu baakyetegeriize ngu Muyudaaya, boona baatokera haiguru kumara nk’esaaha ibiri nibagamba bati: “Atemi ow’Abefeeso mukuru muno!”
35 Omuhandiiki w’orubuga obu yamazire kuculeeza ekitebe ky’abantu, yabakaguza ati: “Bantu inywe aba Efeeso, nooha omuli inywe atamanyire ngu orubuga rw’Abefeeso nurwo rulinda yekaru ya ruhanga omukazi omukuru Atemi, n’ekisisani kye ekyagwire kuruga omu iguru? 36 Nahabweki, ebintu binu obu biraaba bitarukuhakanizibwa, musemeriire kwikara muteekaine kandi mutanguhiriza kugira eki mwakora. 37 Habwokuba abasaija abamuleesere hanu tibaibire omu yekaru noobu kwakuba kujuma ruhanga waitu omukazi. 38 Nahabweki Demetiriyo n’abaheesi abali na uwe obu baraaba baine omusango ha muntu weena, haroho ebiro by’okucweramu emisango n’abamasaza* baroho, leka nubwo baleete emisango yabo. 39 Obu muraaba nimuserra ekintu ekirukukira hali eki, kisemeriire kucwibwamu omu rukurato orwa buli kiro. 40 Habwokuba tuli omu kabi ak’okujunaanwa omusango ogw’okwemera gavumenti habw’eki ekibaireho kiro kinu, habwokuba busaho nsonga ei tusobora kuha habw’akajagarro akabaireho.” 41 Hanyuma y’okubaza ebi, yaraga ekitebe ky’abantu.