Ebikorwa by’Abakwenda
28 Obu twahikire kurungi ha bwerre, twakyetegereza ngu ekizinga eki kyali nikyetwa Merita. 2 Abantu* aba ha kizinga eki bakatwoleka embabazi nyingi muno. Bakatuhembera omurro kandi baatutangirra kurungi habwokuba enjura ekaba eriyo neegwa kandi obwire nibufuka muno. 3 Baitu Paulo obu yaseenyere ekiba ky’enku yakita ha murro, habw’ekibabu, enjoka ey’obusegwa yarugamu yamwezinga ha mukono. 4 Abantu aba ha kizinga eki obu baarozere enjoka eyezingiire ha mukono gwe, baatandika kugambirangana bati: “Mananu kwo omusaija onu mwisi, noobu kiraaba ngu akizire yaruga omu nyanja ali kurungi, Obwinganiza* tiburukumwikiriza kwikara ali mwomeezi.” 5 Baitu yagyekunkumuraho yaginaga omu murro kandi etamukole kabi koona. 6 Baitu bakaba nibanihira ngu naija kuzimba rundi agwe hansi afe. Hanyuma y’okumara obwire bwingi balindiriire kandi baarora busaho kabi akamuhikireho, baahindura enteekereza yabo kandi baatandika kugamba ngu, akaba ali ruhanga.
7 Haihi n’ekiikaro eki, hakaba haroho ebibanja by’omusaija mukuru w’ekizinga, ayayetwaga Pubuliyo, ayatutangiriire kurungi kandi yatukunira kumara ebiro bisatu. 8 Omu kasumi ako, ise Pubuliyo akaba abyamire omu kitabu arwaire omuswija hamu n’ensese, Paulo yagenda nambere ali, yasaba, yamuteekaho emikono, kandi yamukiza. 9 Hanyuma y’eki, abantu abandi aba ha kizinga abakaba barwaire baija nambere ali nukwo abakize. 10 Bakatuha ebisembo bingi, kandi obu tukaba nitugenda kusimbura, baatuha ebintu byona ebi tukaba nitwetaaga.
11 Hanyuma y’emyezi esatu, twagendera omu meeri ey’ekaba eroho akokurorraho “ak’Abaana ba Zeu.”* Emeeri ekaba neeruga Alekizanderiya kandi ekaba emazire obwire obw’obufuki ha kizinga eki. 12 Obu twahikire ha mwaro gwa Sarakusa, twaikarayo kumara ebiro bisatu. 13 Obu twarugireyo oku, twagenda twahika Regiyo. Ekiro ekyahondiireho omuyaga kuruga obukiizi bw’obulyo gwateera kandi twahika Puteyoli ha kiro ekya kabiri. 14 Oku twasangayo ab’oruganda kandi baatwesengereza kwikara na bo kumara ebiro musanju, hanyuma twagenda Rooma. 15 Ab’oruganda ab’omu Rooma obu bahuliire amakuru agarukutukwataho, baija baahikira kimu omu Katale ka Apiyo n’omu kiikaro ekirukwetwa Enju Isatu* kwija kututangaana. Paulo obu yabarozere, yasiima Ruhanga kandi yaguma. 16 Obu twahikire Rooma, Paulo yaikirizibwa kwikara wenka ali n’omuserikale arukumulinda.
17 Baitu obu haarabireho ebiro bisatu, yayeta abakuru b’Abayudaaya. Obu baamazire kwesorooza hamu, yabagambira ati: “Basaija inywe, ab’oruganda, noobu kiraaba ngu tinyine kibi eki nakozere abantu rundi kuhakaniza emigenzo y’abaisenkuruitwe, nkateekwa omu nkomo kandi naheebwayo omu mikono y’Abarooma omu Yerusaalemu. 18 Obu baamazire kuntonganiza baagonza kundekera, habwokuba hakaba hataroho ensonga yoona ey’esemeriire kunnyisa. 19 Baitu Abayudaaya obu bakihakaniize kyampambiriza kujurra hali Kaisaali, baitu tikiri ngu nkaba nyine ekintu kyona eki ndukujunaana ihanga lyange. 20 Habw’ensonga egi, mbeesere kubaza na inywe habwokuba mboheerwe enjegere zinu habw’okunihira kwa Isaleeri.” 21 Baamugambira bati: “Na itwe titukatungaga ebbaruha kuruga Buyudaaya ezirukukubazaaho, kandi busaho n’ow’oruganda weena ow’aizire kunu ayakubalizeeho ekintu kyona ekibi. 22 Baitu twakugondeze kuhurra enteekereza yaawe, habwokuba tukimanyire ngu akadiini kanu, nikabazibwaho kubi buli hamu.”
23 Nahabweki baateekaniza ekiro eky’okumutangatangana kandi baija baingi muno omu kiikaro nambere akaba naaraara. Kandi kuruga nyenkyakara kuhika rwebagyo, yabasoborra ensonga enu obu naabaha obwakaiso oburukukwata ha Bukama bwa Ruhanga omu bwijwire, kandi yalengaho kubasoonasoona kwikiriza Yesu obu naakozesa Ebiragiro* bya Musa n’ebyahandiikirwe Banabbi. 24 Abamu baatandika kwikiriza ebi yagambire; kandi abandi tibaabiikiriza. 25 Habwokuba bataikirranize, baatandika kugenda, kandi Paulo yagamba ati:
“Omwoyo ogurukwera ekigwabalize hali baisenkuruitwe kuraba omu nabbi Isaaya, kihikiriire, 26 obu yagambire ati: ‘Genda hali abantu abo, ogambe oti: “Okuhurra mulihurra baitu timulyetegereza, kandi mulirora baitu timulihweza. 27 Habwokuba omutima gw’abantu banu gugumangaine.* Bahuliire n’amatu gaabo baitu busaho eki bakozereho, kandi bazibiriize amaiso gaabo nukwo batarora, noobu kwakuba kuhurra n’amatu gaabo, nukwo beetegereze n’emitima yabo, bahinduke mbakize.”’ 28 Nahabweki mukimanye ngu, amakuru ganu agarukukwata ha mulingo Ruhanga ajunamu, gatwairwe hali ab’amahanga; kandi nibaija kugahuliiriza.” 29* ——
30 Paulo yamarayo emyaka ebiri omu nju ei akaba apangisize, kandi yatangirraga kurungi abo boona abaijaga nambere ali, 31 naabatebeza ebirukukwata ha Bukama bwa Ruhanga kandi naabeegesa ebirukukwata ha Mukama waitu Yesu Kristo n’obumanzi,* ataine kyona ekirukumulemesa.