Ebbaruha ya Paulo Hali Abakolosai
4 Inywe bakama b’abairu, abairu banyu mubatwaze omu mulingo gw’okuhikirra kandi ogw’obwinganiza, habwokuba mukimanyire ngu na inywe mwine Mukama waanyu omu iguru.
2 Mwikale nimusaba mutarukuleka, mutagwijagira omu kusaba kandi musiimege. 3 Na itwe mutusabire, ngu Ruhanga atukingurreho orwigi nukwo tutebeze ekigambo kandi turangirre ensita erukwera* erukukwata hali Kristo, habwokuba egi niyo ensonga habwaki mboherwe omu nkomo, 4 kandi nsobole kugitebeza kurungi nkooku nsemeriire.
5 Mugumizeemu nimukoragana n’abo abatali kicweka ky’ekitebe* omu mulingo ogw’amagezi, nimukozesa kurungi muno obwire bwanyu.* 6 Leka ebigambo byanyu biikalege eby’embabazi obwire bwona, birungirwemu ekisura, nukwo mumanye omulingo musemeriire kugarukamu buli muntu weena.
7 Tukiko, ow’oruganda mugenzi wange, omuheereza omwesigwa kandi omwiru mutaahi wange omu Mukama waitu, alibagambira byona ebirukunkwataho. 8 Nimmutuma nambere muli nukwo mumanye nkooku tuli kandi ahuumuze emitima yanyu. 9 Naija hamu na Onesimo, ow’oruganda mugenzi wange omwesigwa kandi omugonzebwa, ow’owaanyu; alibagambira ebintu byona ebirukuba kunu.
10 Alisitako, omunyankomo mugenzi wange naabaramukya na Marako, omwihwa wa Bbaranabba (ou mwahairwe oburagirizi ngu mumutangirre kakuba aija nambere muli), 11 na Yesu arukwetwa Yusito, abarukuruga omu basazirwe. Banu bonka nubo bakozi bataahi bange habw’Obukama bwa Ruhanga, kandi nubo barukumpuumuza.* 12 Epafura, omwiru wa Kristo Yesu kandi ow’owaanyu, abaramukize. Aikara naayekamba omu kusaba kwe habwanyu nukwo hati musobole kuba abakuzire omu by’omwoyo mutaine eki murukuburwaho kandi mugumize kimu byona Ruhanga ebi agonza. 13 Nimmuheera obwakaiso ngu ayekamba muno habwanyu na habw’ab’omu Laodikiya na Hierapoli.
14 Luka dakitaali omugonzebwa na Dema, babaramukize. 15 Mundamukize ab’oruganda ab’omu Laodikiya na Ninfa hamu n’ab’omu kitebe ekisorrokanira omu nju ye. 16 Ebbaruha enu obu eraamara kusomwa omuli inywe, mukole enteekaniza esomwe n’omu kitebe eky’Abalaodikiya kandi na inywe musomerwe ebbaruha kuruga Laodikiya. 17 Ekindi, mugambire Arakipo muti: “Teeka omutima ha buheereza obu waikiriize omu Mukama waitu, nukwo osobole kubuhikiiriza.”
18 Nyowe Paulo, mpandiikire okuramukya kunu n’omukono gwange. Mwikale nimwijuka okubohwa kwange omu nkomo. Embabazi za Ruhanga enyingi muno* zibe na inywe.