Ebbaruha ya Paulo ey’Okubanza Hali Abasesalonika

5 Hati ab’oruganda obukirukuhika ha bwire n’obusumi, tikirukwetaagisa kubahandiikira ekintu kyona. 2 Habwokuba mukimanyire kurungi ngu ekiro kya Yahwe* kiriija nk’omusuma oku aija ekiro. 3 Obu baliba nibagamba ngu: “Businge n’okuteekaana!” obu nubwo okuhwerekerra okw’ahonaaho kulibaizira nkooku ebisa biizira omukazi ow’aine enda kandi tibalikiraho. 4 Baitu inywe ab’oruganda, timuli omu mwirima, nahabweki ekiro eki tikirukwija kubahikaho mutakimanyire nkooku obwire bukya abasuma batakimanyire, 5 habwokuba inywe muli baana b’ekyererezi kandi abaana aba nyamusana. Tituli baana ab’obwire bw’ekiro rundi ab’omwirima.

6 Nahabweki, tuleke kugwijagira nk’abandi oku barukukora, baitu leka twikale niturora kandi twikale nitwetegereza kurungi. 7 Habwokuba abo abagwijagira, bagwijagira ekiro, kandi abo abatamiira, batamiira ekiro. 8 Baitu itwe abaana aba nyamusana, leka twikale nitwetegereza kurungi kandi tujwale eky’omu kifuba eky’okwikiriza n’okugonza kandi tujwale okunihira okw’okujunwa nk’enkofiira 9 habwokuba Ruhanga atatukome kuhikwaho ekiniga, baitu akatukoma nukwo tutunge okujunwa kuraba omu Mukama waitu Yesu Kristo. 10 Akatufeera nukwo obu turaaba niturora rundi tugwijagiire,* tusobole kuba hamu na uwe. 11 Nahabweki, mugumizeemu nimugarramungana amaani* kandi nimwombekangana nkooku murukukora hati.

12 Hati ab’oruganda, nitubeesengereza kutamu ekitiinisa abo abarukukora n’amaani omuli inywe, abarukubeebembera omu Mukama waitu, kandi abarukubahabura; 13 mubagonze muno kandi mubooleke embabazi enyingi habw’omulimo ogu barukukora. Buli muntu abe omu businge na mugenzi we. 14 Ekindi, ab’oruganda, nitubateererra kuhabura entahurra, muhuumuze abo abeenuubire,* musagike abaceke, kandi mugumiisirize boona. 15 Hatabaho n’omu ayahoora enzigu hali mutaahi we kandi mwikale nimukorrangana ebirungi kandi mubikorre n’abandi boona.

16 Mwikalege musemeriirwe. 17 Musabege mutarukuleka. 18 Musiimege habwa buli kimu kyona. Kinu nikyo Ruhanga arukugonza mukole omu Kristo Yesu. 19 Mutazimya omurro gw’omwoyo. 20 Mutagaya obunabbi. 21 Mwekebiijege ebintu byona kugumya obu garaaba gali mananu; kandi mugumire ha birungi. 22 Mwetantale ebintu ebibi ebya buli mulingo.

23 Leka Ruhanga ow’obusinge abeereze kimu. Ab’oruganda leka omwoyo* gwanyu, obwomeezi bwanyu, n’omubiri gwanyu biikale kurungi kandi birindwe bitarukujunaanwa ekintu kyona ha kubaho* kwa Mukama waitu Yesu Kristo. 24 Ogu arukubeeta mwesigwa, kandi hataroho kugurukyagurukya eki naija kukikora.

25 Ab’oruganda mugumizeemu nimutusabira.

26 Muramukye ab’oruganda boona n’okunywegera okurukwera.

27 Nyaaburainywe, nimbateererra omu Mukama waitu ngu, ebbaruha enu esomerwe ab’oruganda boona.

28 Embabazi enyingi muno* eza Mukama waitu Yesu Kristo zibe na inywe.