Ebikorwa by’Abakwenda
13 Omu kitebe ekikaba kiri Antyokiya, hakaba haliyo banabbi n’abeegesa banu; Bbaranabba, Simyoni arukwetwa Niga, Lukiyo owa Kulene, Manayeni ayayegesiibwe Herodi omulemi w’isaza, hamu na Saulo. 2 Obu bakaba nibaheereza Yahwe* kandi nibasiiba, omwoyo ogurukwera gwagamba guti: “Munkomeremu Bbaranabba na Saulo habw’omulimo ogu mbeetiire.” 3 Kandi hanyuma y’okusiiba n’okusaba, baabataho emikono kandi baabaraga.
4 Nahabweki abasaija banu abaatumirwe omwoyo ogurukwera, baagenda Serukiya kandi obu baarugire oku baatemba emeeri baagenda Kupuro. 5 Obu baahikire Saramini, baatandika kutebeza ekigambo kya Ruhanga omu masorrokaniro g’Abayudaaya kandi bakaba bali na Yohaana naabakoonyera.
6 Obu baamazire kuraba omu kizinga kyona bahikire Pafo, baatangaana omusaija Omuyudaaya arukwetwa Bbaali-Yesu, ow’akaba ali mufumu kandi nabbi w’ebisuba. 7 Akaba ali hamu n’ow’isaza* arukwetwa Seregiyo Paulo, omusaija ow’amagezi. Yayeta Bbaranabba na Saulo kwija nambere ali aine ekihika eky’okuhurra ekigambo kya Ruhanga. 8 Baitu Erima omufumu (ibara lye nukwo lihindurwa liti) yatandika kubahakaniza, naalengaho kulemesa ow’isaza kwikiriza. 9 Hanyuma, Saulo arukwetwa Paulo, yaijura omwoyo ogurukwera yamutunurra, 10 yagamba ati: “Musaija iwe anyakwijwire obugobya bwa buli mulingo, n’ebibi ebya buli mulingo, iwe omwana wa Sitaani* kandi omunyanzigwa wa buli kintu kyona eky’okuhikirra, torukwija kulekeraaho kuhabisa emihanda ya Yahwe* ey’okuhikirra? 11 Dora omukono gwa Yahwe* gukuroho kandi noija kufa amaiso otarukurora ekyererezi habw’akasumi.” Ahonaaho amaiso ge gaijaho ekiho eky’amaani n’omwirima, yatandika kuhabahaba naaserra omuntu araamukwata ha mukono akamwoleka omuhanda. 12 Ow’isaza obu yarozere ekibaireho, yaikiriza habw’ebi yayegere ebirukukwata hali Yahwe.*
13 Paulo n’aba akaba ali na bo baayambuka enyanja baaruga Pafo baahika Perega omu Pamufuliya. Baitu Yohaana yabasigaho yagaruka Yerusaalemu. 14 Baitu baagumizaamu, baaruga Perega baija Antyokiya ey’omu Pisidiya. Kandi baagenda omu isorrokaniro ha kiro kya Sabbiiti baikarra. 15 Hanyuma y’Ebiragiro* n’ebitabu bya banabbi kusomwa, abakuru b’isirrokaniro baabagambira bati: “Basaija inywe, ab’oruganda, obu muraaba mwine ekigambo kyona ekirukugarramu abantu amaani, mukibagambire.” 16 Hanyuma Paulo yayemerra, yabaculeeza n’omukono gwe kandi yagamba ati:
“Basaija inywe, Abaisaleeri hamu na inywe abandi abarukutiina Ruhanga, muhuliirize. 17 Ruhanga w’abantu banu Abaisaleeri akakoma baisenkuruitwe, yabanyumiza haiguru obu bakaba bali banyamahanga omu nsi ya Misiri kandi yabaiha omu nsi egi n’omukono gwe ogw’amaani. 18 Kandi habw’akasumi akarukuhika nk’emyaka 40, akabagumiisiriza omu irungu. 19 Hanyuma y’okuhwerekereza amahanga musanju omu nsi ya Kanaani, ensi yabo yagiha baisenkuruitwe nk’obugwetwa. 20 Kandi ebi byona bikabaho omu kasumi akarukuhika nk’emyaka 450.
“Hanyuma y’ebi, yabaha abacwi b’emisango kuhikira kimu hali nabbi Samwiri. 21 Baitu hanyuma baasaba kuheebwa omukama, kandi Ruhanga yabaha Saulo mutabani wa Kisi ow’omu ruganda rwa Benyamiini, kumara emyaka 40. 22 Hanyuma y’okumwihaho, yabaimukiza Daudi kulema nk’omukama kandi akamuheera obwakaiso naagamba ati: ‘Nzoire Daudi mutabani wa Yese, omuntu omutima gwange ou gusiimire kandi naija kukora ebintu byona ebi ndukugonza.’ 23 Kusigikirra ha murago gwa Ruhanga, ahaire Isaleeri Omujuni, Yesu, ayarugire omu ruzaaro rw’omusaija* ogu. 24 Ogu obu akaba atakaizire, Yohaana yatebezaaga omu rwijwire abantu boona omu Isaleeri okubatizibwa nk’akokurorraho ak’okwegarukamu. 25 Baitu Yohaana obu akaba naamaliiriza obuheereza bwe, yagambaga ati: ‘Nimuteekereza niinyowe oha? Tali niinyowe ogu. Baitu dora! Haroho arukwija enyuma yange ou ntasemeriire kusumurra enkaito ze.’
26 “Basaija inywe, ab’oruganda, abaijukuru b’eka ya Ibburahimu hamu na inywe abandi abali omuli inywe abarukutiina Ruhanga, ekigambo eky’okujunwa kitumirwe hali itwe. 27 Habwokuba abaikazi ba Yerusaalemu n’abalemi baabo batamanye omujuni ogu. Baitu obu baayefoire bacwi b’emisango, bakahikiiriza ebintu ebyabaziibwe Banabbi ebisomwa ha buli sabbiiti omu iraka erirukuhulirwa. 28 Noobu kiraaba ngu batazoole ekintu kyona ekisemeriire kumwitisa, bakasaba Piraato ngu Yesu aitwe. 29 Kandi obu baamazire kuhikiiriza ebintu byona ebyamuhandiikirweho, bakamuhanuura ha muti kandi baamubyamya omu kituuro.* 30 Baitu Ruhanga akamuhumbuura omu bafu, 31 kandi kumara ebiro bingi akeeyoleka abakaba barugire na uwe Galiraaya kugenda Yerusaalemu. Kandi hati banu, nubo bakaiso be hali abantu.
32 “Nahabweki, nitubagambira amakuru amarungi agarukukwata ha murago ogwahairwe baisenkuruitwe. 33 Ruhanga aguhikiiriize omu bwijwire hali itwe abaana baabo, kuraba omu kuhumbuura Yesu, nkooku kyahandiikirwe omu zabbuli eya kabiri kiti: ‘Oli mwana wange, kiro kinu nfookere so.’ 34 Kandi habwokuba akamuhumbuura omu bafu, talyongera kujunda. Akakigamba ati: ‘Niinyija kuba mwesigwa hali iwe, nkwoleke okugonza okutalekera nkooku naraganiize Daudi.’ 35 Kandi zabbuli* endi egamba eti: ‘Tolireka omwesigwa waawe kujunda.’ 36 Harubaju orundi, Daudi yaheerezaaga Ruhanga* omu busumi bwe, yagwijagira omu kufa, yaziikwa hamu n’abaisenkuru kandi akajunda. 37 Baitu ogu Ruhanga ou yahumbwire, atajunde.
38 “Nahabweki ab’oruganda, mukimanye ngu kuraba omuli ogu, okuganyirwa ebibi nikurangirirwa nambere muli. 39 Kandi ngu omu bintu byona ebi mutasobora kwihwaho omusango kuraba omu Biragiro bya Musa, nigusobora kwihwaho omuntu weena anyakwikiririza omuli ogu. 40 Nahabweki mwerinde, ebintu binu ebyagambirwe banabbi bitabahikaho ebirukugamba ngu: 41 ‘Mukirole inywe abasekeerezi, muhunirre kandi muhwerekerre. Habwokuba ninkora omulimo omu biro byanyu, omulimo ogu mutaliikiriza omuntu weena noobu aligubasoborra omu bwijwire.’”
42 Obu bakaba nibaturuka aheeru, abantu baabeesengereza ngu bongere babazeeho ebintu binu ha Sabbiiti erukuhonderaho. 43 Hanyuma y’abo abakaba bali omu isorrokaniro kugenda, Abayudaaya baingi n’abahinduki abaaramyaga Ruhanga, baahondera Paulo na Bbaranabba. Kandi obu bakaba nibabaza na bo, baabeekambisa kwikara omu mbabazi za Ruhanga enyingi muno.
44 Sabbiiti eyahondiireho, haihi boona ab’omu rubuga bakeesorooza hamu kuhurra ekigambo kya Yahwe.* 45 Abayudaaya obu baarozere ebitebe by’abantu baingi, baakwatwa ihali, baatandika kujumirra n’okuhakaniza ebintu Paulo akaba naabaza. 46 N’obumanzi, Paulo na Bbaranabba baabagambira bati: “Kikaba nikyetaagisa ekigambo kya Ruhanga kubanza kugambirwa inywe, baitu hati nkooku muliyo nimukyanga kandi nimwecwera omusango inywenka nkooku mutasemeriire kutunga obwomeezi obutahwaho, dora! leka tugende omu bamahanga. 47 Habwokuba Yahwe* aturagiire naagamba ati: ‘Mbakomere okuba nk’ekyererezi hali amahanga, nukwo mube okujunwa okuhikya ha mpero z’ensi.’”
48 Abamahanga obu baakihuliire, baasemererwa, kandi baahaisaniza ekigambo kya Yahwe,* kandi abo boona abakaba baine omutima omurungi ogweteekaniize kutunga obwomeezi obutahwaho baikiriza. 49 Kandi, ekigambo kya Yahwe* kikaba nikiraranga omu nsi egi yoona. 50 Baitu Abayudaaya baimukiriza abakazi ab’ekitiinisa abakaba nibatiina Ruhanga n’abasaija abakuru ab’omu rubuga, baatandika kuhiiganiza Paulo na Bbaranabba kandi baababinga omu kicweka kyabo. 51 Paulo na Bbaranabba baayeteeraho ecuucu nk’obwakaiso hali abantu abo kandi baagenda Ikoniyo. 52 Kandi abeegeswa baikara nibaijura okusemererwa n’omwoyo ogurukwera.