Ebikorwa by’Abakwenda
27 Obu kyacwirwemu ngu tugende Itale, Paulo n’abanyankomo abandi baabakwasa omukuru w’ihe arukwetwa Yuliyo, ow’ekihanda kya Agusto. 2 Nubwo twatemba emeeri erukuruga Aduramutiyo ey’ekaba eri y’okuraba ha myaro enyakuli haihi n’omusa gw’isaza lya Asiya, twasimbura twagenda; kandi Alisitako, Omunyamakedoni kuruga Sesalonika, akaba ali na itwe. 3 Ekiro ekyahondiireho twahika Sidoni, kandi Yuliyo yatwaza Paulo omu mulingo gw’embabazi, yamwikiriza kugenda hali banywani be bamurolerre.
4 Obu twarugire oku, twatemba emeeri twaraba enyuma y’ekizinga kya Kupuro nukwo tusobole kwehugura omuyaga ogukaba niguteera niguturuga omu maiso. 5 Obu twayambukire enyanja nituraba haihi na Kirikiya na Pamufuliya, twahika ha mwaro gwa Mura omu Likiya. 6 Oku, mukuru w’ihe yasangayo emeeri erukuruga Alekizanderiya neegenda Itale, kandi yagitutembesa. 7 Hanyuma y’emeeri kugenda mporampora kumara ebiro, twahika Kinido tugumanganiirwe muno. Habwokuba omuyaga gukatulemesa kugenda tutereekeriire, twayetoroora twaraba ha rubaju rw’ekizinga Kulete ha rubaju rwa Saramone nukwo twehugule omuyaga ogukaba niguturuga omu maiso. 8 Hanyuma y’okutalibana muno nituraba harubaju rw’omwaro, twahika omu kicweka ekirukwetwa Omwaro Omurungi ekikaba kiri haihi n’orubuga rwa Lasaya.
9 Obu haarabireho akasumi kandi n’okugendera ha nyanja kifookere ky’akabi, kandi habwokuba n’ekisiibo eky’Ekiro eky’Okulihirra* kikaba kimazire kuhwa, Paulo yabaha amagezi 10 naagamba ati: “Basaija inywe, nindora tikiri kirungi kugenda. Kakuba tugenda, emeeri niija kudikira, tufeerwe ebintu ebiroho kandi nitusobora n’okufeerwa obwomeezi bwaitu.” 11 Baitu mukuru w’ihe yahuliiriza omuvugi w’emeeri na mukama wayo omu kiikaro kya Paulo. 12 Nkooku omwaro gukaba gutali murungi kwikaraho omu kasumi ak’obufuki, abarukukira obwingi bakaleeta ekiteekerezo ngu barugeyo oku, barole obu baraaba nibasobora kumara akasumi ak’obufuki omu Foinike, omwaro ogukaba guroleriire obukiizi bw’emoso obwa burugaizooba hamu n’obukiizi bw’obulyo obwa burugaizooba.
13 Omuyaga ogw’obukiizi bw’obulyo obu gwatiire mporampora, baateekereza ngu ekigendererwa kyabo kihikiriire. Baahimba enanga baatandika kuseeyeeya haihi n’omusa gw’enyanja ya Kulete. 14 Baitu hanyuma y’obwire buke, ekiyaga eky’amaani ekirukwetwa Erukwiro* kyateera. 15 Obu kyayeyongiire kuteera muno emeeri kandi tutakyasobora kweyongera omu maiso nambere omuyaga gukaba niguruga, twaleka emeeri yagenda yonka neetwarwa omuyaga. 16 Nubwo twairuka twagenda kwigama h’akazinga akataito akarukwetwa Kawuda, baitu kyatugumira muno kujuna akaato* akakaba kali enyuma y’emeeri. 17 Baitu hanyuma y’okukasika bakakata ha meeri, baakozesa emiguha kuboha emeeri, nukwo egume kandi habw’okutiina ngu neesobora kukwatira omu musenyi gwa Suruti,* baasumurra emiguha y’ebberu kandi emeeri yagenda neetwarwa omuyaga kwonka. 18 Habwokuba tukaba nitutwarwa kunu na kuli habw’ihunga, ekiro ekyahondiireho, baatandika kukeehya emigugu ey’ekaba eri ha meeri. 19 Ha kiro ekya kasatu, baatandika kunaga emiguha y’emeeri nibakozesa emikono yabo.
20 Obu haarabireho ebiro bingi izooba n’enyunyuuzi bitarukuzooka kandi nituteerwa ihunga ery’amaani, okunihira kwona okw’okukiraho kwatandika kukeeha. 21 Hanyuma y’okumara ebiro bingi batarukulya, Paulo yayemerra hagati yabo, yagamba ati: “Basaija inywe, amananu gali, mwakubaire mwikiriize eki nabagambiire. Mwakubaire mutarugire Kulete kandi titwakuhikirweho akabi kanu noobu kwakuba kufeerwa ebintu binu. 22 Baitu nabwo nimbeekambisa kuguma, habwokuba busaho n’omu hali inywe arukwija kufa, oihireho emeeri yonka niyo erukwija kuhwerekerra. 23 Kiro kinu omu bwire bw’ekiro, malaika wa Ruhanga ou ndamya kandi ou mpeereza anyemeriirege ha rubaju 24 kandi yangambira ati: ‘Paulo, otatiina, noobu haraabaho ki, noija kwemerra omu maiso ga Kaisaali, kandi dora! Ruhanga naija kujuna abo boona ab’oli na bo omu meeri.’ 25 Nahabweki basaija inywe mugume, habwokuba ninyikiriza ngu Ruhanga naija kukora eki kyonyini eki ngambiirwe. 26 Baitu emeeri niija kucwekacwekera haihi n’ekizinga ekimu.”
27 Ha kiro ekya 14, emeeri obu ekaba neetwarwa kunu na kuli tuli ha Nyanja ya Aduliya, ekiro omu itumbi abavugi b’emeeri baatandika kuteekereza ngu bali haihi kuhika haihi n’obwerre. 28 Obu baapimire oburaiha bw’amaizi, baasanga biri bifuba 20,* baayeyongerayo kake omu maiso kandi baayongera baapima, baasanga oburaiha bw’amaizi biri bifuba 15.* 29 Habw’okutiina ngu nitusobora kuhuumira amabaale, baanaga enanga ina kuruga omu kicweka eky’enyuma eky’emeeri kandi baatandika kwegomba obwire bukye. 30 Abavugi b’emeeri obu baalengereho kwiruka kuruga omu meeri obu nibasirimura akaato akataito omu nyanja, nibeefoora nk’abarukugonza kunaga enanga kuruga omu kicweka eky’omu maiso, 31 Paulo yagambira mukuru w’ihe hamu n’abaserikale ati: “Abasaija abo obu bataikale omu meeri, timurukwija kukiraho.” 32 Nubwo abaserikale baatema emiguha ey’akaato akataito baakaleka kaagwa.
33 Obwire obu bukaba buli haihi kukya, Paulo yabeekambisa boona kulya naagamba ati: “Kiro kinu kiro kya 14, kandi mwikaire mulindiriire mwetuntwire kandi timukaliire ekyokulya kyona. 34 Nahabweki, nimbeesengereza mulyeho akookulya; kinu mukikole habw’obwomeezi bwanyu, habwokuba noobu kaakuba akasoke kamu kuruga ha mitwe yanyu tikarukwija kuhwerekerra.” 35 Hanyuma y’okubaza binu, yakwata omugaati, yasiima Ruhanga omu maiso gaabo boona, yagucwamu, yatandika kulya. 36 Nubwo na bo baaguma kandi baatandika kulya. 37 Itwena hamu tukaba tuli bantu 276 omu meeri. 38 Obu baamazire kulya ebyokulya baiguta, baanaga engano omu nyanja nukwo bakeehye obulemeezi bw’emeeri.
39 Obwire obu bwakiire, bakaba batamanyire ekicweka eki barumu, baitu baarora omukono gw’enyanja gwine omwaro oguruho omusenyi kandi baacweramu kimu ngu aho nuho barukwija kwemereza emeeri obu kiraaba kisobokere. 40 Nubwo baasara emiguha ey’enanga baagireka yagwa omu nyanja, omu kaire nuko kamu baasumurra emiguha ey’ekaba esibire engahi kandi hanyuma y’okuhanika ebberu ez’omu maiso nukwo omuyaga gutwale emeeri, baatandika kugenda ha mwaro. 41 Obu baahikire nambere hali omusenyi mwingi, ekicweka eky’omu maiso kyakwatiramu, emeeri yakwama kandi yaleka kugenda, baitu ekicweka ky’enyuma kyacwekacweka habw’ebigonzi. 42 Eki obu kyabaireho, abaserikale baacwamu kwita abanyankomo nukwo hatabaho n’omu yaziha akatoroka. 43 Habwokuba mukuru w’ihe akaba acweriiremu kimu kuhikyayo Paulo atahikirweho akabi, yabatanga kukora eki bakaba bateekaniize. Yaragira abo abarukusobora kuziha, bagwe omu nyanja bazihe nukwo nubo babanze kuhika ha bwerre, 44 kandi hanyuma abandi babahondere, obu abamu nibagendera ha bibbaaho, kandi abandi ha bicwekacweka by’emeeri. Nubwo boona baahika ha bwerre batahikirweho akabi koona.