Ebikorwa by’Abakwenda
12 Omu kasumi ako, Herodi Omukama akatandika kutwaza kubi abamu ab’omu kitebe. 2 Akaita Yakobbo mugenzi wa Yohaana n’empirima. 3 Obu yarozere ngu nikisemeza Abayudaaya, yakwata na Petero. (Kinu kikabaho omu biro by’obugenyi bw’Emigaati Etatumbisiibwe.) 4 Obu yamazire kumukwata yamuteeka omu nkomo, yamukwasa ebitebe bbina by’abaserikale kumulinda, obu haarugahoga ekitebe kimu, nihagyaho ekindi kandi buli kitebe kimu kikaba kirumu abaserikale bbana. Akaba naagonza kumuleeta aheeru* omu maiso g’abantu hanyuma y’obugenyi obw’Okuhingurwaho. 5 Petero obu akaba atairwe omu nkomo, ekitebe kikaba nikimusabira muno hali Ruhanga.
6 Omu bwire bw’ekiro, Herodi atakamuleesere omu maiso g’abantu, Petero akaba abyamire hagati y’abaserikale babiri asibirwe enjegere ibiri kandi n’abalinzi abandi bali ha rwigi nibalinda enkomo. 7 Baitu dora! Malaika wa Yahwe* akaba ayemeriire aho, kandi ekyererezi kyamuliikana omu nkomo. Yateera Petero ha rubaju yamwimukya naagamba ati: “Imuka bwangu!” Kandi enjegere zaaruga ha mikono ye zaagwa. 8 Malaika yamugambira ati: “Imuka ojwale kandi ojwale n’enkaito zaawe.” Yakikora. Hanyuma malaika yamugambira ati: “Jwara ekijwaro kyawe ekya haruguru kandi oikale noompondera.” 9 Yaturuka aheeru kandi yaikara naamuhondera, baitu atakimanye ngu malaika ebi akaba naakora bikabaho kwo. Amananu gali, akateekereza ngu naarora okwolekwa. 10 Baarabaho omulinzi ow’okubanza n’owa kabiri, baahika ha mulyango gw’orwigi rw’ekyoma ogurukugenda omu rubuga kandi orwigi rwayekingura rwonka. Obu baamazire kuturuka aheeru, baagenda omu muhanda ogumu, kandi ahonaaho malaika yamurugaho. 11 Kandi Petero obu yayetegeriize ekikaba nikigenda omu maiso, yagamba ati: “Hati nakyetegereza ngu Yahwe* atumire malaika we yanjuna kuruga omu mukono gwa Herodi na hali ebintu byona Abayudaaya baikaire nibanihira ngu nibiija kubaho.”
12 Obu yamazire kwetegereza kinu, yagenda ha nju ya Malyamu nyina Yohaana ayayetwaga Marako, nambere baingi bakaba beesoroliize hamu kandi nibasaba. 13 Obu yakingwize ha rwigi, omuzaana arukwetwa Roda yaija kukinguraho. 14 Obu yamanyiriire iraka lya Petero, yasemererwa muno yayebwa n’okukinguraho, yagarukayo munda yabagambira nkooku Petero ayemeriire ha rwigi. 15 Baamugambira bati: “Ogwire iraro.” Baitu yagumizaamu naagamba ngu mananu. Baatandika kugamba bati: “Ogu malaika we.” 16 Baitu Petero akaikaraho ha mulyango naakinguza. Obu baakingwire orwigi, baamurora kandi baahunirra muno. 17 Yaimukya omukono gwe yabaculeeza, kandi yabagambira omu bwijwire omulingo Yahwe* amwihire omu nkomo kandi yagamba ati: “Ebintu binu mubigambire Yakobbo hamu n’ab’oruganda.” Hanyuma y’ebi, yaturuka aheeru kandi yagenda omu kiikaro ekindi.
18 Obwire obu bwakiire, haabaho okutuntura omu baserikale, nibeekaguza kiki ekikaba kihikire hali Petero. 19 Herodi akeekamba muno kumuserra, kandi obu yalemerwe kumuzoora yakaguliiriza abalinzi kandi yaragira ngu bafubirwe; Herodi yaruga Buyudaaya yagenda Kaisaliya kandi oku yamarayo akasumi.
20 Akaba abiihiriirwe muno abantu ba Tuuro na Sidoni. Nahabweki baija nambere ali n’ekigendererwa kimu, kandi hanyuma y’okusoonasoona Burasito omusaija ow’akaba naarolerra eby’omu nju y’omukama,* baamusaba kugarraho obusinge habwokuba ensi yabo yatungaga ebyokulya kuruga omu nsi y’omukama. 21 Ha kiro ekikaba kitairweho, Herodi akajwara ekijwaro kye ky’obukama yaikarra ha ntebe ye ey’okucweramu omusango* kandi yatandika kubaliza abantu. 22 Hanyuma abantu abakaba beesoroize baatandika kutokera haiguru nibagamba bati: “Eri iraka lya ruhanga tiriri ry’omuntu!” 23 Ahonaaho malaika wa Yahwe* yamuleetera kurwara* habwokuba akaba atatairemu Ruhanga ekitiinisa, kandi enzito zaamulya, yafa.
24 Baitu ekigambo kya Yahwe* kikeeyongera kumanywa n’okuraranga.
25 Bbaranabba na Saulo, obu baamazire kutwara obukoonyezi omu Yerusaalemu, baagaruka kandi baatwara Yohaana ow’arukwetwa Marako.