Ebikorwa by’Abakwenda
18 Hanyuma y’ebi, yaruga Asene yaija Kolinso. 2 Yasangayo Omuyudaaya arukwetwa Akura enzaarwa ya Ponto nubwo akaba akyarugire Itale na mukazi we Purisila habwokuba Kurawudiyo akaba aragiire Abayudaaya boona kuruga Rooma. Nahabweki yagenda nambere bali, 3 habwokuba yakoraga omulimo nk’ogwabo, yaikara omu ka yabo kandi yakorra hamu na bo habwokuba omulimo gwabo, gukaba guli ogw’okukora eheema. 4 Buli Sabbiiti yahaga orubazo* omu isorrokaniro kandi yasoonasoonaga Abayudaaya n’Abayonaani.
5 Siira na Timoseo obu baarugire Makedoni, Paulo yatandika kutebeza ekigambo n’obwekambi hali Abayudaaya naabananura nkooku Yesu nuwe Kristo. 6 Baitu obu baikaire nibamuhakaniza kandi nibamujuma, yabakunkumurra ebijwaro bye, yabagambira ati: “Leka esagama yanyu ebe ha mitwe yanyu. Nyowe tinyine musango. Kuruga hati, niinyija kugenda hali abantu ab’amahanga.” 7 Yarugayo oku,* yagenda omu nju y’omusaija arukwetwa Tito Yusito omuheereza wa* Ruhanga, enju ye ekaba eherraine n’isorrokaniro. 8 Baitu Kirisipo omukuru w’isorrokaniro, yaikiriza Mukama waitu n’ab’omu nju ye boona. Kandi Abakolinso baingi abaahuliire, baikiriza kandi baabatizibwa. 9 Baitu omu bwire bw’ekiro, Mukama waitu yagambira Paulo omu kwolekwa ati: “Otatiina, baitu ikara nootebeza kandi otaculeera, 10 habwokuba ndi hamu na iwe. Busaho muntu weena arukwija kukuhikyaho akabi habwokuba nyine abantu baingi omu rubuga runu.” 11 Nahabweki, yaikarayo oku, kumara omwaka gumu n’ameezi mukaaga naayegesa ekigambo kya Ruhanga omuli bo.
12 Galio obu akaba ali mukuru w’isaza lya Akaya,* Abayudaaya bakeekoba baatahirra Paulo baamutwara nambere hakaba hali entebe ey’okucweramu omusango,* 13 nibagamba bati: “Omusaija onu naasoonasoona abantu kuramya Ruhanga omu mulingo ogurukucwa ebiragiro.” 14 Baitu Paulo obu akaba ali haihi kubaza, Galio yagambira Abayudaaya ati: “Obu kiraaba ngu omusaija onu aine ekibi eki akozere rundi ngu aine ekiragiro eki acwire, naakubahuliirize n’okugumiisiriza inywe Abayudaaya. 15 Baitu obu ziraaba ziri mpaka ezirukukwata ha bigambo, amabara hamu n’ebiragiro byanyu, inywe mubyemarre. Tindukugonza kuba mucwi w’emisango omu nsonga ezi.” 16 Nahabweki, yababinga kuruga nambere hali entebe ey’okucweramu omusango. 17 Nubwo boona baagwera Sosene mukuru w’isorrokaniro baatandika kumuterra omu maiso g’entebe nambere bacwera emisango. Baitu Galio tiyabyetahyamu.
18 Hanyuma y’okwikarayo ebiro bingi, Paulo yaraga ab’oruganda yatemba eryato, yagenda Siriya* asendekereziibwe Purisila na Akura. Obu akaba ali omu Kenkereya, yasara isoke rye yalikeehya habwokuba akaba atiire ekirahiro. 19 Obu baahikire Efeeso, yabasigayo kandi yataaha omu isorrokaniro, yahingisaniza ebiteekerezo n’Abayudaaya. 20 Noobu kiraaba ngu bakaikara nibamusaba ngu aikale na bo habw’ebiro bike, ataikirize 21 baitu yabaraga naagamba ati: “Niinyija kwongera ngaruke nambere muli, Yahwe* obu araaba agondeze.” Yayambuka enyanja kuruga Efeeso, 22 yasirimuka yahika Kaisaliya. Yatembatemba* yagenda yaramukya ab’omu kitebe, hanyuma yasirimuka yagenda Antyokiya.
23 Hanyuma y’okumarayo ebiro, yarugayo yagenda omu biikaro ebitali bimu na bimu omu Galatiya n’omu Furugiya naagarramu abeegeswa boona amaani.
24 Omuyudaaya arukwetwa Apolo, enzaarwa y’Alekizanderiya, akahika omu Efeeso, omusaija onu akaba aine ekisembo eky’okubaza kandi amanyire kurungi Ebyahandiikirwe. 25 Akaba ayegesiibwe omuhanda gwa Yahwe* kandi naayekambisibwa omwoyo, akaba naatebeza kandi naayegesa ebihikire ebirukukwata hali Yesu, baitu akaba amanyire okubatiza kwa Yohaana kwonka. 26 Yatandika kubaza n’obumanzi omu isorrokaniro, kandi Purisila na Akura obu baamuhuliire, baamutwara agende na bo kandi baayeyongera kumusoborra kurungi omuhanda gwa Ruhanga. 27 Kandi habwokuba akaba naagonza kugenda Akaya, ab’oruganda baahandiikira abeegeswa ebbaruha nibabeekambisa kumutangirra kurungi. Obu yahikireyo, habw’embabazi za Ruhanga enyingi muno, yakoonyera muno abo abakaba bafookere baikiriza; 28 yabaza n’obumanzi omu rwijwire kukyoleka ngu enyegesa z’Abayudaaya zikaba zitahikire, naakozesa Ebyahandiikirwe kubooleka ngu Yesu nuwe Kristo.