Ebikorwa by’Abakwenda
20 Akajagarro obu kaakeehere, Paulo yatumaho abeegeswa kandi obu yamazire kubagarramu amaani n’okubaraga, yatandika orugendo rwe orwa Makedoni. 2 Hanyuma y’okuraba omu biikaro ebi, n’okugarramu amaani abeegeswa abakaba bali oku, yahika Buyonaani. 3 Akamara oku emyezi esatu, baitu habwokuba Abayudaaya bakeekoba kumwita obu akaba ali haihi kwambuka enyanja kugenda Siriya, yacwamu kugaruka Makedoni. 4 Akasendekerezebwa Sopatera mutabani wa Pulo owa Bberoya, Alisitako hamu na Sekundo ow’Abasesalonika, Gayo owa Derebbe, Timoseo, Tukiko na Tirofimo ab’omu isaza lya Asiya. 5 Abasaija banu bakatubanza kugenda kandi bakaba batulinzire omu Terowa; 6 baitu hanyuma y’ebiro by’Emigaati Etatumbisiibwe, tukatemba eryato twaruga Firipi kandi omu biro bitaano, twahika nambere bali omu Terowa, kandi oku tukamarayo ebiro musanju.
7 Ha kiro eky’okubanza omu wiiki, obu tukaba twesoroize hamu kulya ekiihuro, Paulo yatandika kubaza na bo habwokuba ekiro ekirukuhonderaho akaba naija kugenda; kandi yagumizaamu naabaza kuhikira kimu omu itumbi. 8 Omu kisiika kya haiguru nambere tukaba twesorooliize hakaba haliyo etaara nyingi. 9 Paulo obu akaba naakyabaza, omusigazi arukwetwa Yutuko ow’akaba aikaliire omu idirisa akakwatwa oturo otw’amaani, yahanuuka kuruga ha kaina eya kasatu yagwa hansi kandi baamwihaho amazire kufa. 10 Baitu Paulo yasirimuka hansi yamwinamaho, yamubumbatira naagamba ati: “Muleke kuteera empamo habwokuba mwomeezi.” 11 Hanyuma yatemba haiguru kandi yatandika kulya ekiihuro.* Kandi yagumizaamu kubaza kuhikya obwire bukiire kandi hanyuma yagenda. 12 Nahabweki baatwara omwojo ali mwomeezi kandi baahuumuzibwa muno.
13 Nubwo twatemba emeeri kugenda Aso, nambere tukaba twine kwiha Paulo atweteeranizeeho ha meeri, nkooku akaba aturagiire habwokuba akaba naagonza kugendayo naarubata. 14 Obu yatutangatangaine omu Aso, twamuta ha meeri kandi twagenda Mitulene. 15 Kandi ekiro ekyahondiireho, twaruga oku twagenda twahika Kiyo, baitu ekiro ekya kabiri twahika Samo, kandi ekiro ekya kasatu twahika Merito. 16 Paulo akaba acwiremu kugenda n’emeeri agumizeemu ateemeriire Efeeso nukwo atagira obwire bwona obu yamara omu isaza lya Asiya, habwokuba akaba naagonza obu kiraaba nikisoboka arahuke ahike Yerusaalemu ha kiro ky’Obugenyi bwa Pentekooti.
17 Baitu obu akaba ali Merito, yatumaho abagurusi ab’omu kitebe kya Efeeso. 18 Obu baizire nambere ali yabagambira ati: “Mumanyire kurungi omulingo nayetwaizeemu obu nkaba ndi na inywe, kurugira kimu ha kiro eky’okubanza obu naizire omu isaza lya Asiya, 19 nimpeereza Mukama waitu n’obwebundaazi bwona, obu nincura amaziga kandi nindengesebwa habw’Abayudaaya kugonza kunyita, 20 kandi mukimanyire ngu ntaleke kubagambira ebintu byona eby’omugaso* n’okubeegesa omu rwijwire n’enju ha nju. 21 Baitu nkaha obwakaiso omu bwijwire hali Abayudaaya n’Abayonaani oburukukwata ha kwegarukamu, bagaruke hali Ruhanga kandi baikiririze omu Mukama waitu Yesu. 22 Kandi hati dora! habw’okuhambirizibwa omwoyo ogurukwera, ningenda Yerusaalemu noobu kiraaba ngu timmanyire ekirampikaho obu ndaahikayo, 23 baitu omu buli rubuga omwoyo ogurukwera nigwikara nigummanyisa ngu enkomo n’emihito bindindiriire. 24 Baitu obwomeezi bwange nimbutwara nk’obutali bw’omugaso hali nyowe, kakuba haakire mmaliiriza orugendo rwange n’obuheereza obu natungire kuruga hali Mukama waitu Yesu, kuha obwakaiso omu bwijwire hali amakuru amarungi agarukukwata ha mbabazi za Ruhanga enyingi muno.
25 “Kandi hati dora! busaho n’omu omuli inywe abanatebiize ha Bukama alyongera kundora. 26 Nahabweki nimbeeta kiro kinu mube bakaiso ngu tindukujunaanizibwa esagama ey’omuntu weena, 27 habwokuba ntaleke kubagambira byona ebirukukwata ha kigendererwa kya Ruhanga. 28 Mwerinde kandi mulinde igana lyona nambere omwoyo ogurukwera gwabakomere kuba abaroleerezi,* kurolerra ekitebe kya Ruhanga eki yaguzire n’esagama y’Omwana we. 29 Nkimanyire ngu obu ndimara kugenda, emyaga ey’obukaali eritaaha omuli inywe kandi teritwaza kurungi igana, 30 kandi omuli inywe inywenka halirugamu abantu abarukubaza ebintu ebiramaire kandi ebirukuhabya nukwo basoonasoone abeegeswa babahondere.
31 “Nahabweki mwikale nimurora, kandi mwikale nimwijuka ngu kumara emyaka esatu, nyamusana n’ekiro, ntaleke kuteererra buli omu hali inywe n’okurra amaziga. 32 Hati nimbakwasa Ruhanga n’ekigambo kye eky’embabazi enyingi muno, ekigambo ekisobora kubombeka kandi kikabaha obugwetwa omuli abo boona abeeziibwe. 33 Ntegombe efeeza y’omuntu, rundi ezaabbu, rundi ebijwaro. 34 Inywe inywenka mukimanyire kurungi ngu nayekorraga n’emikono yange ninyehikyaho ebyetaago byange hamu n’eby’abo aba ndi na bo. 35 Mboolekere omu bintu byona ngu kuraba omu kukora n’amaani omu mulingo gunu, musemeriire kukoonyera abo abaceke kandi musemeriire kwikara nimwijuka ebigambo bya Mukama waitu Yesu, uwe weenyini obu yagambire ati: ‘Okugaba kuleeta okusemererwa kwingi kukira okuheebwa.’”
36 Obu yamazire kubaza binu byona uwe na bo baateeza amaju hansi kandi yasaba. 37 Boona barra muno, baagwa Paulo omu kifuba* kandi baamunywegera n’okugonza, 38 habwokuba bakasaalirwa muno habw’eki yagambire ngu bakaba batarukwija kwongera kumurora. Hanyuma baamusendekereza kuhika ha meeri.