Ebbaruha ya Paulo Hali Abefeeso
5 Nahabweki, mwegere hali Ruhanga nk’abaana abarukugonzebwa, 2 kandi mugumizeemu nimurubatira omu kugonza nkooku Kristo na uwe yatugondeze,* yayehayo habwaitu* nk’ekyonzira kandi nk’ekihongwa ekirukuboya kurungi hali Ruhanga.
3 Obusiihani,* okutasemera okwa buli mulingo, rundi omururu, bitagambwaho omuli inywe nkooku kisemeriire abantu abarukwera; 4 noobu zaakuba engeso ezirukukwasa ensoni, noobu kwakuba kubaza eby’obudomadoma, rundi okusandaara okurukuhemura—ebintu ebitasemeriire—baitu musiimege Ruhanga. 5 Habwokuba mumanyire kinu kandi nimukyetegereza ngu, busaho omusiihani,* omuntu ow’arukukora ebikorwa ebitasemiire, rundi omuntu ow’omururu ekirukumanyisa kuramya ebisisani, ow’aligwetwa Obukama bwa Kristo kandi obwa Ruhanga.
6 Hatabaho omuntu ayababiihabiiha n’ebigambo ebitarumu, habwokuba habw’ebintu nk’ebi, ekiniga kya Ruhanga nikiizira abaana entahurra. 7 Nahabweki, mutakora nkooku barukukora;* 8 habwokuba mukaba muli mwirima, baitu hati muli kyererezi omu Mukama waitu. Mugumizeemu nimugenda nk’abaana b’ekyererezi, 9 habwokuba ekyana eky’ekyererezi nikitwarramu oburungi obwa buli mulingo, okuhikirra n’amananu. 10 Mwekambege kumanya ebirukusiimwa Mukama waitu; 11 kandi muleke kwejumbira omu bikorwa eby’omwirima ebitarukwana ebyana, baitu mubyanike nkooku biri. 12 Habwokuba ebintu ebi bakora omu nsita nibiswaza n’okubibazaaho. 13 Ebintu byona ebyanikirwe, ekyererezi nikyo kibyoleka habwokuba ebintu byona ebiteekwa omu kyererezi, biba kyererezi. 14 Nahabweki, kikagambwa kiti: “Imuka, Iwe ow’agwijagiire, imuka kuruga omu bafu, kandi Kristo alikumulikira.”
15 Nahabweki, mwegendereze omulingo murubatamu, mutarubata nk’abadomadoma, baitu nk’ab’amagezi, 16 nimukozesa kurungi obwire bwanyu* habwokuba ebiro bibi muno. 17 Habw’ensonga egi, muleke kuba bantu abatarukwetegereza, baitu mwikale nimwetegereza Yahwe* eki agonza. 18 Kandi mutanywa amaarwa mukatamiira, habwokuba kirugamu ebikorwa ebibi, baitu mwikale nimwijura omwoyo. 19 Obu muraaba nimubaza hamu,* mugambirangane zabbuli, ebizina ebirukukugiza Ruhanga, ebizina eby’omwoyo, muzinire Yahwe* nimuteera endongo omu mitima yanyu, 20 obwire bwona musiimege Ruhanga waitu kandi Isiitwe habwa buli kintu kyona omu ibara lya Mukama waitu Yesu Kristo.
21 Buli omu, ayoroberege mutaahi we omu kutiina Kristo. 22 Abakazi mworoberege baibainywe nkooku mworobera Mukama waitu, 23 habwokuba omusaija nuwe omutwe gw’omukazi we nka Kristo oku ali mutwe gw’ekitebe, kandi nuwe mujuni w’omubiri gunu. 24 Amananu gali, nkooku ekitebe kyorobera Kristo, n’abakazi basemeriire kworobera baibabo omu bintu byona. 25 Abasaija mugumizeemu nimugonza abakazi banyu nkooku Kristo yagondeze ekitebe kandi yayehayo habwakyo, 26 nukwo asobole kukyeza naakyogya n’amaizi kuraba omu kigambo, 27 nukwo asobole kuleeta ekitebe nambere ali omu kitiinisa kyakyo, kitaine kitonyezi rundi omugonya rundi ekintu ekindi kyona ekya mulingo ogu, baitu kibe ekirukwera kandi ekitaine kamogo.
28 Omu mulingo nugwo gumu, abasaija musemeriire kugonza bakazi banyu nkooku mugonza emibiri yanyu. Omusaija ow’agonza mukazi we, aba naayegonza wenka, 29 habwokuba busaho musaija aranobere omubiri gwe, baitu aguliisa naagurolerra kurungi nkooku Kristo arolerra ekitebe, 30 habwokuba tuli bicweka by’omubiri gwe. 31 “Habw’ensonga enu, omusaija nikyo alirekeraho ise na nyina, agumire hali* mukazi we kandi boona babiri balifooka mubiri gumu.” 32 Ensita enu ey’erukwera* nkuru muno. Hati, nimbazaaho Kristo hamu n’ekitebe. 33 Baitu nabwo, buli omu omuli inywe asemeriire kugonza mukazi we nkooku ayegonza wenka; kandi harubaju orundi, omukazi asemeriire kuteekamu iba ekitiinisa ekingi muno.