Ebikorwa by’Abakwenda
15 Abasaija abamu kuruga Buyudaaya baatandika kwegesa ab’oruganda bati: “Kakuba mutasarwa kusigikirra ha migenzo ya Musa, timurukwija kujunwa.” 2 Baitu obu haabaireho obutaikirraniza, n’okuteera empaka hagati yabo na Paulo, hamu na Bbaranabba, baakora enteekaniza ngu Paulo, Bbaranabba hamu n’abandi, bagende hali abakwenda n’abagurusi omu Yerusaalemu babamanyise ensonga egi.
3 Ab’oruganda omu kitebe obu baamazire kubasendekerezaaho kake, abasaija banu baagumizaamu baaraba omu Foinikiya na Samaliya nibabagambira omu bwijwire okuhinduka okw’ab’amahanga kandi kinu kikaleetera ab’oruganda boona okusemererwa. 4 Obu baahikire Yerusaalemu, ekitebe kyabatangirra kurungi kandi baagambira abakwenda n’abagurusi ebintu byona Ruhanga ebi akozere kuraba omuli bo. 5 Baitu bamu ab’ekitebe ky’Abafalisaayo abakaba bafookere baikiriza, baimuka omu ntebe zaabo baayemerra, baagamba bati: “Abaikiriza abatali Bayudaaya nikibeetaagisa kusarwa n’okubaragira kuhondera Ebiragiro* bya Musa.”
6 Nahabweki, abakwenda n’abagurusi baayesorooza hamu kwekebiija ensonga egi. 7 Hanyuma y’okugibazaaho muno,* Petero yayemerra yabagambira ati: “Basaija inywe, ab’oruganda, mukimanyire kurungi ngu kuruga kara, Ruhanga akankoma kuruga omuli inywe ngu kuraba omu kanwa kange, abantu abamahanga bahurre amakuru amarungi kandi baikirize. 8 Kandi Ruhanga ow’amanyire emitima akaha obwakaiso kuraba omu kubaha omwoyo ogurukwera nkooku na itwe yagutuhaire. 9 Kandi atatwahukanize hagati yaitu na bo, baitu habw’okwikiriza akeeza emitima yabo. 10 Hati habwaki nimulenga Ruhanga kuraba omu kwetwekesa abeegeswa ekikoligo ekyalemere baisenkuruitwe, kandi na itwe eki tutasobora kwetweka? 11 Baitu kusisanaho na bo, na itwe twine okwikiriza ngu tukajunwa kuraba omu mbabazi enyingi muno eza Mukama waitu Yesu Kristo.”
12 Nubwo abantu boona baaculeera, baatandika kuhuliiriza Bbaranabba na Paulo nibabagambira obwokurorraho n’ebyamahano bingi Ruhanga ebi akaba akoliire abamahanga kuraba omuli bo. 13 Obu baamazire kubaza, Yakobbo yagamba ati: “Basaija inywe, ab’oruganda, mumpuliirize. 14 Simyoni asoboroire kurungi nkooku Ruhanga habw’omurundi ogw’okubanza ahindukiire amahanga, yakomamu abantu habw’ibara lye. 15 Kandi n’ebigambo bya banabbi nibiikirraniza nakyo nkooku kyahandiikirwe kiti: 16 ‘Hanyuma y’ebintu ebi, ndigaruka kandi nyongere nyimukye eheema* ya Daudi eyagwire hansi, ndyongera nyombeke ebisigarra byayo kandi ngigarreho, 17 nukwo abantu abasigaireho basobole kwekamba kuserra Yahwe* bali hamu n’abantu kuruga omu mahanga goona, abantu abarukwetwa ibara lyange, agambire Yahwe* ow’arukukora ebintu binu, 18 ebyamanyirwe kuruga kara na kara.’ 19 Nahabweki, nyowe ninteekereza ngu tutagumanganiza obwomeezi bw’abantu abarugire omu mahanga, abarukuhindukira Ruhanga, 20 baitu tubahandiikire beetantale ebintu ebisiisirwe habw’okukozesebwa omu kuramya ebisisani, obusiihani,* ebinigirwe,* hamu n’esagama. 21 Kurugira kimu omu busumi obwa kara, omu buli rubuga haikaire harumu abo abatebeza kuruga omu bitabu bya Musa, habwokuba buli Sabbiiti omu masorrokaniro basoma ebitabu binu omu iraka erikuhulirwa.”
22 Hanyuma abakwenda n’abagurusi, bali hamu n’ekitebe kyona, baacwamu kutuma abasaija abakomerwemu omuli bo kugenda Antyokiya hamu na Paulo na Bbaranabba; baatuma Yuda ow’akaba naayetwa Bbarasabba hamu na Siira abakaba nibeebembera ab’oruganda. 23 Bakahandiika ebbaruha enu, baagisindika kuraba omuli bo:
“Abakwenda hamu n’abagurusi bagenzi banyu, hali ab’oruganda omu Antyokiya, Siriya, na Kirikiya abarukuruga omu mahanga: Nitubaramukya! 24 Tukahurra ngu bamu kuruga omuli itwe, bakagumanganiza obwomeezi bwanyu habw’ebigambo ebi baagambire obu nibalengaho kubatabura noobu kiraaba ngu tutabahe buragirizi bwona. 25 Hati twikirraniize itwena kandi twacwamu kukomamu abasaija kubatuma nambere muli bali hamu na Paulo na Bbaranabba abaturukugonza muno, 26 abasaija abahaireyo obwomeezi bwabo habw’ibara lya Mukama waitu Yesu Kristo. 27 Nahabweki, tutumire Yuda na Siira nukwo basobole kubagambira ebintu nibyo bimu n’omunwa gwabo. 28 Habwokuba itwe n’omwoyo ogurukwera, titugondeze kubongeraho omugugu ogundi, oihireho ebintu binu ebirukwetaagisa: 29 mwikale nimwetantara ebintu ebihongiirwe ebisisani, esagama, ebinigirwe, hamu n’obusiihani.* Obu muraayetantara ebintu binu, nimwija kuba kurungi. Nitubagondeza obwomeezi oburungi!”*
30 Obu baamazire kuraga abasaija banu, baagenda Antyokiya kandi baasorooza ekitebe kyona, baakikwasa ebbaruha. 31 Obu baamazire kugisoma, baasemererwa muno habw’ebigambo ebirukugarramu amaani. 32 Nkooku Yuda hamu na Siira bakaba bali banabbi, baaha embazo nyingi ezirukugarramu ab’oruganda amaani kandi baabagumya. 33 Hanyuma y’okumarayo oku obwire, ab’oruganda baabaraga omu businge, baagaruka hali abo abakaba babatumire. 34* —— 35 Baitu Paulo hamu na Bbaranabba baikara omu Antyokiya nibeegesa kandi nibarangirra amakuru amarungi ag’ekigambo kya Yahwe* bali hamu n’abandi baingi.
36 Hanyuma y’akasumi, Paulo yagambira Bbaranabba ati: “Leka hati tugarukeyo tubungire ab’oruganda omu buli rubuga nambere twatebiize ekigambo kya Yahwe,* turole nkooku bali.” 37 Bbaranabba yagonza muno kutwara Yohaana ow’akaba naayetwa Marako. 38 Baitu Paulo akaba atarukugonza agende na bo, habwokuba akaba abasigireho omu Pamufuliya kandi akaba atagenzere na bo omu mulimo. 39 Habw’ensonga egi, baakungana muno kandi baayahukana; Bbaranabba yatwara Marako, baatemba eryato baagenda Kupuro. 40 Paulo yakomamu Siira baagenda hamu, hanyuma y’ab’oruganda kusaba Yahwe* ayoleke Paulo embabazi ze enyingi muno. 41 Yaraba Siriya na Kirikiya, naagumya ebitebe.