Nk’Oku Yahandiikirwe Yohana
6 Hanyuma y’ebi, Yesu yagenda nseeri y’enyanja ya Galiraaya, rundi Tibberiya. 2 Kandi ekitebe ky’abantu baingi baikara nibamuhondera habwokuba baali nibarora ebyamahano ebi akaba naakora omu kukiza abarwaire. 3 Hanyuma Yesu yatemba ha rusozi yaikarra hansi ali hamu n’abeegeswa be. 4 Obugenyi bw’Abayudaaya obw’Okuhingurwaho bukaba buli haihi kuhika. 5 Yesu obu yaimukize amaiso ge kandi yarora ekitebe ky’abantu baingi nibaija nambere ali, yakaguza Firipo ati: “Turaagura nkaha emigaati, abantu banu ei baraalya?” 6 Baitu akaba naabaza binu kumulenga, habwokuba akaba amanyire eki akaba ali haihi kukora. 7 Firipo yamugarukamu ati: “Emigaati eya dinaali* bikumi bibiri tesobora kubamara, buli omu noobu yaakulyaho kataito.” 8 Omu h’abeegeswa be arukwetwa Andereya, mugenzi wa Simooni Petero, yamugambira ati: 9 “Hanu haroho omwojo omuto anyakwine emigaati etaano eya sayiri hamu n’encu ibiri entaito. Baitu binu biraagasa ki h’abantu banu boona?”
10 Yesu yagamba ati: “Mwikalize abantu hansi.” Omu kiikaro eki hakaba haliyo obunyansi bwingi, abantu baikarra hansi, kandi omu bantu abo hakaba harumu abasaija nka 5,000. 11 Yesu yakwata omugaati, kandi hanyuma y’okusiima yagugabira abo abakaba baikaliire aho; yakora ekintu nikyo kimu ha ncu entaito, kandi boona baatunga ebirukubamara. 12 Baitu obu baamazire kwiguta, yagambira abeegeswa be ati: “Musorooze hamu obucwekacweka bwona obusigaireho nukwo hatagira kintu ekyafa busa.” 13 Baasoroza obucwekacweka bw’emigaati etaano eya sayiri obwasigaireho obu baamazire kulya, kandi bwaijuza ebigega 12.
14 Abantu obu baarozere ekyamahano eki akaba akozere baatandika kugamba bati: “Onu nuwe nabbi ow’akaba asemeriire kwija omu nsi.” 15 Hanyuma Yesu obu yakimanyire ngu bakaba bali haihi kwija kumukwata bamufoole omukama, yabarugamu yagaruka ha rusozi ali wenka.
16 Obu bwahikire rwebagyo, abeegeswa be baasirimuka ha nyanja, 17 baatemba eryato, kwambuka enyanja nukwo bagende Kaperenaumu. Kandi omu bwire obu, omwirima gukaba gumazire kukwata, kandi Yesu akaba atakaizire nambere bali. 18 Kandi enyanja ekaba etandikire kusikuka habw’omuyaga gw’amaani ogukaba niguteera. 19 Baitu obu bakaba bagenzere mairo nka isatu rundi ina* omu nyanja, bakarora Yesu naarubatira ha nyanja, kandi obu yairiire haihi n’eryato, baatiina muno. 20 Baitu yabagambira ati: “Niinyowe; mutatiina!” 21 Nubwo baikiriza kumutwaraho omu lyato kandi ahonaaho eryato lyahika ha musa nambere bakaba nibagenda.
22 Ekiro ekyahondiireho, ekitebe ky’abantu abakaba basigaire nseeri y’enyanja baarora hataroho lyato lyona oihireho akaato akataito, kandi Yesu akaba atagendiire omu lyato n’abeegeswa be, habwokuba abeegeswa be bakaba bagenzere bonka. 23 Baitu amaato kuruga Tibberiya gaija haihi n’ekiikaro nambere baaliriire emigaati, hanyuma ya Mukama waitu kusiima. 24 Abantu obu baarozere ngu Yesu n’abeegeswa be tibaroho, baatemba amaato gaabo kwija Kaperenaumu kuserra Yesu.
25 Obu baamusangire nseeri y’enyanja baamukaguza bati: “Rabbi, kunu ohikireyo di?” 26 Yesu yabagarukamu ati: “Mananu kwo nimbagambira nti, timurukunserra habw’ebyamahano ebi murozere, baitu nimunserra habw’emigaati ei muliire mwaiguta. 27 Mutakolerra ebyokulya ebirukuhwaho baitu mukolerre ebyokulya ebirukwikaraho ebireeta obwomeezi obutahwaho, Omwana w’omuntu obu alibaha; habwokuba onu, Ise, Ruhanga weenyini, akamuteekaho emanyikirizo* ey’erukwoleka ngu naamusiima.”
28 Nubwo baamukaguza bati: “Kiki eki tusemeriire kukora, kusobora kuhikiiriza Ruhanga ebi agonza?” 29 Yesu yabagarukamu naagamba ati: “Kinu nikyo Ruhanga agonza, mwikiririze omuli ogu Ruhanga ou yatumire.” 30 Hanyuma, baamukaguza bati: “Hati kyamahano ki eki oraakora, nukwo tukakirora tukakwikiririzaamu? Oraakora ki? 31 Baisenkuruitwe bakalya emanu omu irungu, nkooku kyahandiikirwe ngu: ‘Akabaha omugaati gw’okulya kuruga omu iguru.’” 32 Hanyuma Yesu yabagambira ati: “Mananu kwo nimbagambira nti, Musa atabahe omugaati kuruga omu iguru, baitu Isenyowe abaha omugaati ogw’amananu kuruga omu iguru. 33 Habwokuba omugaati gwa Ruhanga nuwe ogu arukuruga omu iguru kandi akaha ensi obwomeezi.” 34 Nubwo baamugambira bati: “Mukama waitu, otuhege omugaati gunu butoosa.”
35 Yesu yabagambira ati: “Niinyowe mugaati gw’obwomeezi. Ogu weena ow’aija nambere ndi, talirumwa enjara naakake, kandi n’ogu weena ow’anyikiririzaamu talikwatwa iroho naakake. 36 Baitu nkooku mbagambiirege, mundozere baitu nabwo timurukwikiriza. 37 Abo boona Isenyowe abaarukumpa baija nambere ndi, kandi tindibinga weena ow’aija nambere ndi; 38 habwokuba nkaruga omu iguru kukora ogu ayantumire ebi agonza, hatali ebi ngonza. 39 Ayantumire kinu nikyo arukugonza, ntafeerwa n’omu hali abo boona abayampaire baitu mbahumbuule ha kiro ekya ha mpero. 40 Kinu nikyo Isenyowe arukugonza, ogu weena ow’amanyirra Omwana kandi akamwikiririzaamu asobole kutunga obwomeezi obutahwaho kandi ndimuhumbuura ha kiro ekya ha mpero.”
41 Hanyuma Abayudaaya baatandika kumuhyemera habwokuba akaba agambire ati: “Niinyowe mugaati ogwarugire omu iguru.” 42 Kandi baatandika kugamba bati: “Onu tinuwe mutabani wa Yusufu, ise na nyina abaturukumanya? Hati naasobora ata kugamba ngu: ‘Ndugire omu iguru’?” 43 Yesu yabagarukamu ati: “Muleke kuhyema inywenka na inywenka. 44 Busaho muntu asobora kwija hali nyowe, rundi buli Isenyowe ayantumire, obu amucunda, kandi ndimuhumbuura ha kiro ekya ha mpero. 45 Kikahandiikwa omu bihandiiko bya Banabbi ngu: ‘Boona balyegesebwa Yahwe.’* Ogu weena anyakuhuliriize Isenyowe kandi akeega, aija nambere ndi. 46 Busaho muntu ararozere Isenyowe, oihireho ogu arukuruga hali Ruhanga; ogu nuwe yarozere Isenyowe. 47 Mananu kwo nimbagambira nti, ogu weena arukwikiriza aine obwomeezi obutahwaho.
48 “Niinyowe omugaati ogw’obwomeezi. 49 Baisenkuruinywe bakalya emanu* omu irungu, baitu baafa. 50 Gunu nugwo omugaati kuruga omu iguru, nukwo buli omu weena agulyeho, kandi atafa. 51 Niinyowe omugaati ogwomiire ogwarugire omu iguru. Omuntu weena anyakulya ha mugaati gunu alyomeera ebiro n’ebiro; kandi amananu gali ngu, omugaati ogundukwija kuhayo nugwo omubiri gwange ogundukwija kuhayo habw’obwomeezi bw’ensi.”
52 Hanyuma, Abayudaaya baatandika kuhakana bonka nibagamba bati: “Omusaija onu naasobora ata kutuha omubiri gwe kugulya?” 53 Yesu yabagambira ati: “Mananu kwo nimbagambira nti, kakuba mutalya omubiri gw’Omwana w’omuntu kandi mukanywa esagama ye, timwine obwomeezi omuli inywe. 54 Ogu weena anyakulya omubiri gwange kandi akanywa esagama yange, aine obwomeezi obutahwaho kandi ndimuhumbuura ha kiro ekya ha mpero; 55 habwokuba omubiri gwange nibyo ebyokulya eby’amananu, n’esagama yange nikyo eky’okunywa eky’amananu. 56 Ogu weena ow’alya omubiri gwange kandi akanywa esagama yange aikara omu bumu na nyowe kandi na nyowe mba omu bumu na uwe. 57 Nkooku Isenyowe omwomeezi yantumire kandi nyomeera habwa Isenyowe, n’ogu anyakundyaho alyomeera habwange. 58 Gunu nugwo omugaati ogwarugire omu iguru. Tiguli nk’ogu baisenkuruinywe baaliireho, baitu baahika baafa. Ogu weena ow’alya ha mugaati gunu alyomeera ebiro n’ebiro.” 59 Akabaza ebintu ebi obu akaba naayegesa omu isorrokaniro* omu Kaperenaumu.
60 Obu baahuliire ebi, baingi h’abeegeswa be baagamba bati: “Ebigambo ebi nibitabaijura; nooha asobora kubihuliiriza?” 61 Baitu Yesu obu yakimanyire ngu abeegeswa be baliyo nibahyema habw’ebi akaba abalize, yabakaguza ati: “Na inywe ebi byabatabaijura? 62 Kandi kiriba kita, obu mulirora Omwana w’omuntu naatemba kugaruka nambere yarugire? 63 Omwoyo nugwo gugaba obwomeezi; omubiri tigwine mugaso gwona. Ebigambo ebi mbagambiire by’omwoyo kandi by’obwomeezi. 64 Baitu haroho bamu omuli inywe abatarukwikiriza.” Habwokuba kurugira kimu ha kubanza Yesu akaba amanyire abo abatarukwikiriza hamu n’ogu ayaakumugobiize. 65 Yayongera yagamba ati: “Enu niyo ensonga habwaki mbagambiire nti, busaho n’omu asobora kwija hali nyowe rundi buli Isenyowe amwikiriize.”
66 Habw’ensonga egi, baingi h’abeegeswa be, bakagarukira ebintu ebi bakaba balekereho enyuma kandi baaleka kugenda na uwe. 67 Nubwo Yesu yakaguza ikumi na bibiri ati: “Na inywe nimugonza kugenda?” 68 Simooni Petero yamugarukamu ati: “Mukama waitu, turaagenda hali oha? Niiwe oine ebigambo eby’obwomeezi obutahwaho. 69 Tukaikiriza kandi twamanya ngu niiwe Ogu Arukwera owa Ruhanga.” 70 Yesu yabagarukamu ati: “Tali niinyowe, ayakomere inywe, ikumi na babiri? Baitu omu hali inywe muhangirizi.”* 71 Akaba naabazaaho Yuda, mutabani wa Simooni Isikalyota, habwokuba onu nuwe akaba naagenda kumugobeza, noobu kiraaba ngu akaba ali omu ha ikumi na babiri.