Ebbaruha ya Paulo Hali Abarooma
5 Nahabweki, hati nkooku tweserwe ab’okuhikirra habw’okwikiriza, leka twegondeze omu businge* na Ruhanga kuraba omu Mukama waitu Yesu Kristo, 2 kandi n’okuraba omuli uwe, tusoboire kutunga embabazi zinu enyingi muno ezi twemeriiremu hati habw’okwikiriza; kandi leka tusemererwe* nitusigikirra ha kunihira okw’ekitiinisa kya Ruhanga. 3 Hatali eki kyonka, leka tusemererwe* obu turukuba nitubonabona,* habwokuba tukimanyire ngu okubonabona kurugamu okugumiisiriza; 4 okugumiisiriza kurugamu okusiimwa Ruhanga; okusiimwa Ruhanga kurugamu okunihira, 5 kandi okunihira tikurukuswaza, habwokuba okugonza kwa Ruhanga kuseeserwe omu mitima yaitu kuraba omu mwoyo ogurukwera, ogwatuhairwe.
6 Amananu gali ngu, obu tukaba tukyali baceke, Kristo akafeera abantu abatarukutiina Ruhanga omu kasumi akaatairweho. 7 Habwokuba kigumire muno omuntu weena kufeera omuntu ow’ahikiriire; baitu obundi omuntu naasobora kwehayo kufeera omuntu omurungi. 8 Baitu Ruhanga atwoleka okugonza kwe, habwokuba obu tukaba tukyali basiisi, Kristo akatufeera. 9 Ekirukukira hali eki, nkooku tweserwe ab’okuhikirra habw’esagama ye, kuraba omuli uwe nitwija kujunwa hali ekiniga kya Ruhanga. 10 Habwokuba obu tukaba tuli banyanzigwa ba Ruhanga, tukateeranizibwa na Uwe kuraba omu kufa kw’Omwana we, hati nkooku tuteeraniziibwe na Uwe, nitukigumiza kimu n’okukiraho ngu nitwija kujunwa habw’obwomeezi bwe. 11 Tikiri eki kyonka baitu nitusemerererwa omuli Ruhanga kuraba omu Mukama waitu Yesu Kristo, kuraba omuli uwe hati tusoboire kuteeranizibwa na Ruhanga.
12 Egi niyo nsonga habwaki kuraba omu muntu omu, ekibi kikataaha omu nsi, kandi ekibi kyaleeta okufa, kandi nukwo okufa kwahikire kuti hali abantu boona habwokuba boona bakasiisa—. 13 Habwokuba ekibi kikaba kiri omu nsi Ebiragiro bitakabaireho, baitu ekibi tikijunaanwa omuntu weena ebiragiro obu birukuba bitaroho. 14 Okufa kukalema kuruga hali Adamu kuhika hali Musa, kandi na hali abo abatarasiisire omu mulingo Adamu yasiisire,* ow’arukusisana ogu ow’akaba ali w’okwija.
15 Baitu ekisembo tikirukusisana n’ekibi. Obu kiraaba ngu habw’ekibi eky’omuntu omu baingi bakafa, omu mulingo nugwo gumu, baingi batunga embabazi za Ruhanga enyingi muno n’ekisembo kye ekya busa kuraba omu mbabazi enyingi ez’omuntu omu, Yesu Kristo! 16 Ekindi, ebyarugire omu kibi ky’omuntu omu nibyahukana n’ebyarugire omu kisembo ekyahairwe. Ekibi kimu kikarugirramu kucwerwa omusango, baitu ekisembo ekyaizire hanyuma y’ebibi bingi kikarugirramu abantu kwetwa ab’okuhikirra. 17 Obu kiraaba ngu habw’okusiisa kw’omuntu omu okufa kukalema nk’omukama kuraba omu muntu ogu, abo abatunga embabazi za Ruhanga enyingi muno n’ekisembo ekya busa, balikiraho kulema nk’abakama omu bwomeezi kuraba omu muntu omu, Yesu Kristo!
18 Nahabweki nkooku kuraba omu kusiisa kw’omuntu omu abantu aba buli mulingo bakasingwa omusango, omu mulingo nugwo gumu, kuraba omu kikorwa kimu eky’okuhikirra, abantu aba buli mulingo balyetwa ab’okuhikirra nukwo basobole kutunga obwomeezi. 19 Habwokuba kuraba omu butahurra obw’omuntu omu, baingi bakafoorwa abasiisi, kuraba omu buhulizi bw’omuntu omu baingi balifoorwa abahikiriire. 20 Nahabweki, Ebiragiro bikaija nukwo ekibi kisobole kweyongera.* Baitu ekibi obu kyeyongera, n’embabazi za Ruhanga enyingi muno zeyongerra kimu. 21 Habw’ekigendererwa ki? Nkooku ekibi n’okufa byalemere nk’omukama, nukwo n’embabazi za Ruhanga enyingi muno zisobole kulema nk’omukama, kuraba omu kuhikirra okurukuhikya omu bwomeezi obutahwaho kuraba omuli Yesu Kristo Mukama waitu.