Ebbaruha ya Paulo ey’Okubanza Hali Abasesalonika

3 Nahabweki obu twarozere ngu titukyasobora kukigumiisiriza, tukateekereza ngu kirungi kwikara itwenka omu Asene; 2 kandi twatuma Timoseo, ow’oruganda mugenzi waitu, omuheereza wa Ruhanga* omu kutebeza amakuru amarungi agarukukwata hali Kristo, abagumye* kandi abahuumuze obukirukuhika ha kwikiriza kwanyu, 3 nukwo hatabaho n’omu ayatengesebwa* emihito enu. Habwokuba inywe inywenka mukimanyire ngu titusobora kwetantara okubonabona okwa mulingo ogu.* 4 Habwokuba obu tukaba tuli na inywe, twabagambiraga bukyali kara ngu nitwija kuhikwaho emihito kandi nukwo kibaire, nkooku mumanyire. 5 Egi niyo ensonga habwaki obu nkaba ntakyasobora kukigumiisiriza, nkatuma Timoseo nambere muli, nukwo nsobole kumanya ebirukukwata ha kwikiriza kwanyu, obundi nikisobora kuba ngu Omwohi akaboohya kandi amaani gaitu nigaba gaafiire busa.

6 Baitu hati Timoseo agarukire nambere tuli kuruga oku, yatugambira amakuru amarungi agarukukwata ha kwikiriza hamu n’okugonza kwanyu, ngu mwikara nimutwijuka kandi nimugonza kuturora nkooku na itwe turukugonza kubarora. 7 Ab’oruganda, egi niyo ensonga habwaki omu bujune bwaitu bwona, n’omu mihito* yaitu yoona, tuhuumuziibwe habwanyu hamu n’okwikiriza oku murukwoleka. 8 Habwokuba tugarurwamu amaani* obu mwikara mwemeriire mugumire omu Mukama waitu. 9 Ruhanga turaamusiima tuta habw’okusemererwa kwingi oku twine omu maiso ge habwanyu? 10 Ekiro na nyamusana twesengereza muno nukwo tusobole kwongera kubarora maiso h’amaiso,* kandi tubahe ekirukubura ha kwikiriza kwanyu.

11 Hati, leka Ruhanga waitu kandi Isiitwe weenyini hamu na Mukama waitu Yesu batuteereho omulingo ogw’okwija nambere muli. 12 Kandi leka Mukama waitu abaleetere kweyongerra kimu kugonzangana, n’okugonza muno abantu abandi, nkooku na itwe turukubagonza muno, 13 nukwo asobole kugumya emitima yanyu, mutaine eki murukujunaanwa, nimwera omu maiso ga Ruhanga waitu kandi Isiitwe ha kubaho* kwa Mukama waitu Yesu ali hamu n’abarukwera be boona.