Ebbaruha ya Paulo ey’Okubanza Hali Abasesalonika

2 Ab’oruganda, inywe inywenka mukimanyire kurungi ngu okubunga kwaitu nambere muli nkooku kutarafiire busa. 2 Noobu kiraaba ngu ha kubanza tukabonabona kandi twatwazibwa kubi muno omu Firipi nkooku mumanyire, Ruhanga waitu akatuha obumanzi twabagambira amakuru amarungi agarukukwata hali Ruhanga omu kuhakanizibwa okw’amaani.* 3 Habwokuba okuteererra oku tubaha tikurukusigikirra ha nteekereza ey’etahikire, obutasemera, rundi ha bisuba, 4 baitu nkooku twaikiriziibwe Ruhanga twakwasibwa amakuru amarungi, tubaza kusemeza Ruhanga, ow’ayekebiija emitima yaitu hatali kusemeza abantu.

5 Amananu gali, mukimanyire ngu tutakozese ebigambo ebirukubahaisaniza rundi kwefoora eki tutali habw’ebigendererwa eby’omururu; Ruhanga nuwe kaiso waitu. 6 Kandi tubaire tutarukweserurra ekitiinisa omu bantu, ka kibe kuruga omuli inywe rundi omu bantu abandi, noobu kiraaba ngu itwe nk’abakwenda ba Kristo, tukaba nitusobora kubatweka omugugu ogw’okuturolerra. 7 Baitu kwahukana hali eki, obu tukaba tuli omuli inywe, tukabakwata omu mulingo gw’obwegendereza, nkooku omukazi arukwonkya arolerra kurungi* abaana be. 8 Nahabweki, habw’okubagonza muno, tukaba tucweriiremu kimu* kutagarukira ha kubatebeza amakuru amarungi aga Ruhanga kyonka, baitu n’okuhayo obwomeezi bwaitu habwanyu kusobora kubakoonyera habwokuba mukafooka abarukugonzebwa hali itwe.

9 Ab’oruganda, hataroho kugurukyagurukya, nimwijuka amaani twateekamuga n’omulingo twatalibanaga. Obu tukaba nitubatebeza amakuru amarungi aga Ruhanga, twakoraga nyamusana n’ekiro, nukwo buli omu hali inywe tutamwetwekesa omugugu ogw’amaani. 10 Inywe muli bakaiso, na Ruhanga na uwe kaiso habw’omulingo tukaba tuli beesigwa, ab’okuhikirra kandi abataine eki turukujunaanwa omuli inywe abaikiriza. 11 Mukimanyire kurungi ngu tukaikara nitubateererra, nitubahuumuza kandi nituha buli omu hali inywe obwakaiso, nka isebaana oku akora hali abaana be, 12 nukwo musobole kugumizaamu nimwetwaza* nkooku Ruhanga arukusiima, ow’arukubeeta omu Bukama bwe n’omu kitiinisa kye.

13 Amananu gali, egi niyo ensonga habwaki na itwe nitwikara nitusiima Ruhanga tutarukuleka, habwokuba obu mwatungire ekigambo kya Ruhanga, eki mwahuliire kuruga hali itwe, mutakiikirize nk’ekigambo ky’abantu, baitu mukakiikiriza nk’ekigambo kya Ruhanga, nkooku kiri mali, kandi ekirukukora omuli inywe abaikiriza.* 14 Ab’oruganda, inywe mukeegera ha bitebe bya Ruhanga ebiri omu bumu na Kristo Yesu eby’omu Buyudaaya, habwokuba mukabonabonesebwa abantu ab’ihanga lyanyu, nkooku ab’oruganda abali omu Buyudaaya barukubonabonesebwa Abayudaaya, 15 abaisire Mukama waitu Yesu, na banabbi kandi baatuhiiganiza. Ekindi, ebi barukukora tibirukusemeza Ruhanga kandi tibirukugasira omuntu weena, 16 obu balengaho kututanga kutebeza abantu ab’amahanga nukwo basobole kujunwa. Omu mulingo gunu, baikara nibongera ha bibi byabo. Baitu ha kumalirra ekiniga kye kibaiziire.

17 Baitu ab’oruganda, obu twayahukaniziibwe* hali inywe habw’akacu kake (maiso h’amaiso hatali omu mitima yaitu), habwokuba tukaba nitugonza muno kubarora, tukakora kyona ekirukusoboka kubarora maiso h’amaiso.* 18 Habw’ensonga enu, tukagonza kwija nambere muli. Nyowe Paulo nkalengaho hatali omurundi gumu gwonka, baitu emirundi ebiri; baitu Sitaani akeemerra omu muhanda gwaitu. 19 Okunihira kwaitu, rundi okusemererwa kwaitu, rundi ekondo ey’okusemererwa kwaitu omu maiso ga Mukama waitu Yesu ha kubaho* kwe, nibyo biha? Tiniinywe? 20 Mali niinywe ekitiinisa kyaitu n’okusemererwa kwaitu.