Ebbaruha ya Paulo ey’Okubanza Hali Abasesalonika

1 Nyowe Paulo, ndi na Sirwano* hamu na Timoseo nimpandiikira abali omu kitebe kya Sesalonika abali omu bumu na Ruhanga Isiitwe, hamu na Mukama waitu Yesu Kristo:

Embabazi za Ruhanga enyingi muno* hamu n’obusinge bibe na inywe.

2 Obutoosa tusiima Ruhanga obu tubasabira* inywena, 3 habwokuba omu maiso ga Ruhanga kandi Isiitwe, twikara nitwijuka omulimo ogu mukora habw’okwikiriza kwanyu, omulingo mwekamba habw’okugonza n’okugumiisiriza kwanyu habw’okunihira oku mwine omu Mukama waitu Yesu Kristo. 4 Ab’oruganda abarukugonzebwa Ruhanga, tukimanyire ngu Ruhanga akabakoma, 5 habwokuba amakuru amarungi aga turukutebeza, gataije nambere muli n’ebigambo byonka, baitu gakaija n’amaani, n’omwoyo ogurukwera, hamu n’obwakaiso bw’amaani, nkooku mumanyire omulingo twayetwazaamuga omuli inywe habwanyu. 6 Kandi na inywe mukeegera ha kyokurorraho kyaitu n’ekya Mukama waitu, habwokuba mukaikiriza ekigambo omu kubonabona kwingi mwine okusemererwa okw’omwoyo ogurukwera, 7 nukwo mwafookere ekyokurorraho hali abaikiriza boona abali omu Makedoni na Akaya.

8 Amananu gali, timugarukiire ha kurangirra ekigambo kya Yahwe* omu Makedoni na Akaya, baitu okwikiriza kwanyu kurarangire n’omu biikaro byona, nukwo kitatwetaagisa kubaza ekintu kyona. 9 Habwokuba bo bonyini baikara nibabazaaho omurundi gwaitu ogw’okubanza obu twaizire nambere muli, n’omulingo mwalekere ebisisani byanyu mwagaruka hali Ruhanga nukwo musobole kuheereza Ruhanga omwomeezi kandi ow’amananu, 10 n’okulindirra omwana we kuruga omu iguru, ou yahumbwire kuruga omu bafu kandi ogu nuwe Yesu, ow’atujuna kuruga hali ekiniga ekirukwija.