Ebbaruha ya Paulo ey’Okubanza Hali Abasesalonika
4 Omu kumalirra, ab’oruganda, nkooku mwatungire oburagirizi kuruga hali itwe oburukwoleka omulingo musemeriire kwetwaza* nukwo musemeze Ruhanga, nkooku hati muliyo nimwetwaza,* nitubasaba kandi nitubeesengereza kuraba omu Mukama waitu Yesu, kwikara nimweyongera kukikora omu bwijwire. 2 Habwokuba mumanyire oburagirizi* obu twabahaire kuruga hali Mukama waitu Yesu.
3 Kinu nikyo Ruhanga arukugonza, mube abarukwera kandi mwetantale obusiihani.* 4 Buli omu omuli inywe amanye omulingo asemeriire kulemamu omubiri* gwe omu burukwera* hamu n’omu kitiinisa, 5 hatali omu mururu, okwegomba okuhinguraine okw’okuteerana nk’ab’amahanga abatamanyire Ruhanga. 6 Hatabaho n’omu ayahingura nambere asemeriire kugarukira rundi akakora kubi mugenzi we omu nsonga enu, habwokuba Yahwe* afubira abantu abakora ebintu binu byona nkooku twasangirwe tubagambiire kandi tubahabwire. 7 Habwokuba Ruhanga atatwete kuba abantu abatasemiire, baitu kuba abantu abarukwera. 8 Nahabweki, omuntu weena anyakugaya kinu, aba atagayire abantu, baitu aba agayire Ruhanga ow’abaha omwoyo gwe ogurukwera.
9 Baitu obukirukuhika ha kugonzangana nk’ab’oruganda, tikirukutwetaagisa itwe kubahandiikira habwokuba inywe Ruhanga naabeegesa kugonzangana. 10 Amananu gali, eki nikyo murukukorra ab’oruganda boona abali omu Makedoni yoona. Baitu ab’oruganda, nitubeekambisa kugumizaamu nimukora muti omu bwijwire. 11 Mukifoole kigendererwa kyanyu kwikara omu businge, muteetaahya omu bintu ebitarukubakwataho kandi mukole n’emikono yanyu nkooku twabateereriire, 12 nukwo musobole kwetwaza kurungi omu bantu ab’aheeru* kandi mutarukuburwaho ekintu kyona.
13 Ekindi, ab’oruganda, nitugonza mumanye ebirukukwata hali abo abaagwijagiire omu kufa, nukwo mutaganya nk’abandi abataine okunihira oku baganya. 14 Habwokuba obu turaaba twine okwikiriza ngu Yesu akafa kandi yahumbuuka, n’abo abaafiire bali omu bumu na uwe, Ruhanga alibahumbuura babe hamu na Yesu. 15 Kinu nikyo turukubagambira kuraba omu kigambo kya Yahwe,* ngu itwe abaliba bakyali boomeezi kuhika ha kubaho* kwa Mukama waitu, titulibanza naakake abo abaagwijagiire omu kufa; 16 habwokuba Mukama waitu weenyini alisirimuka kuruga omu iguru, naaragira n’iraka ery’obusobozi, n’erya malaika omukuru* n’engwara ya Ruhanga, kandi abo abaafiire bali omu bumu na Kristo nubo balibanza kuhumbuuka. 17 Hanyuma itwe abaliba bakyali boomeezi, tulitwarwa hamu na bo omu bicu kutangatangana Mukama waitu omu mwanya; kandi turaikaraga na uwe. 18 Nahabweki mwikale nimuhuumuzangana n’ebigambo binu.