Ebbaruha ya Paulo ey’Okubanza Hali Abakolinso

5 Mpuliire ngu omuli inywe harumu obusiihani,* omusaija akeegarurra mukaise, obusiihani nk’obu tiburukusangwa n’omu bamahanga. 2 Eki nimukyenyumiririzaamu? Timwakubaire nimuganya nukwo omuntu ow’akozere ekikorwa eki, aihwe hagati omuli inywe? 3 Noobu ndaaba ntali na inywe omu mubiri, ndi na inywe omu mwoyo, kandi mmazire ira kucwera omusango omuntu ow’akozere eki, oti rundi ndi hamu na inywe. 4 Obu muraabaga mwesoroize hamu omu ibara lya Mukama waitu Yesu, kandi mukimanyire ngu ndi na inywe omu mwoyo hamu n’amaani ga Mukama waitu Yesu, 5 omuntu ogu musemeriire kumuhayo hali Sitaani, omubiri guhwerekerre nukwo omwoyo* gusobole kujunwa ha kiro kya Mukama waitu.

6 Okwenyumiza* kwanyu tikuli kurungi. Timukimanyire ngu ekitumbisa ekike, kitumbisa entonge enkooto yoona ey’ensaano ey’ekanzirwe? 7 Mwiheho ekitumbisa ekikuzire, nukwo musobole kufooka entonge empyaka ey’etarumu kitumbisa. Habwokuba mali, Kristo Omwana gwaitu ogw’entaama ogw’Okuhingurwaho,* akahongwa. 8 Nahabweki leka tukole obugenyi tutarukukozesa ekitumbisa ekikuru, rundi ekitumbisa eky’ebikorwa ebibi n’okusiisa, baitu tukozese emigaati etatumbisiibwe* ey’etarumu obugobya kandi ey’amananu.

9 Omu bbaruha yange nkabahandiikira nimbagambira kuleka kukoragana n’abantu abasiihani, 10 tindukumanyisa kwetantarra kimu abantu ab’omu nsi enu abanyakuli abasiihani, abaine omururu, abanyagi rundi abaramya ebisisani. Kakuba kiba kiti, kyakubeetaagisize kurugira kimu omu nsi enu. 11 Baitu hati nimbahandiikira ngu muleke kukoragana n’omuntu weena ow’arukwetwa ow’oruganda anyakuli omusiihani, ow’omururu, arukuramya ebisisani, omujumi, omutamiizi rundi omunyagi, noobu kwakuba kulya hamu n’omuntu nk’ogu. 12 Nyowe nikinkwatiraho nkaha kucwera omusango abo abali aheeru? Tikibahikiriire kucwera omusango abo abali omunda, 13 nukwo Ruhanga akagucwera abo abali aheeru? “Mwihe omuli inywe omuntu ogu omubi.”