Obwomezi Obw’emihito Butandika

AHEERU y’orugonjo rwa Adeni, Adamu na Hawa bakatunga emihito nyingi. Bali baine kukora muno kutunga ebyokulya. Mukikaro ky’emiti emirungi, bakarora amahwa n’amatojo gabehingulirize. Kinu nikyo kyahikire ha Adamu na Hawa obu baajemiire Ruhanga kandi obuganjaine bwabu Nawe bukafa.

Kukiraho ha bubi, Adamu na Hawa bakatandika kufa. Ijuka ngu Ruhanga akaba abatererire ngu bakufiire obu bakuliire ha bijuma eby’omuti ogu akaba abatangire. Mananu ekiro eki baguliriremu bakatandika kufa. Kakikaba ky’obudomadoma muno obutahuliriza Ruhanga!

Abaana ba Adamu na Hawa bakazaarwa hanyuma ya Ruhanga okubabinga omu rugonjo rwa Adeni. Kinu nikimanyisa ngu n’abaana nabo bali baine kukaikura hamu n’okufa.

Kakuba Adamu na Hawa bayorobire Yahwe, obwomezi bwakubaire burungi halibo n’aha baana babu. Bakwomiire ebiro byona mukusemererwa omu nsi. Busaho muntu ayakukaikwire, kurwara n’okufa.

Ruhanga nagonza abantu kwomera ebiro byona mukusemererwa, kandi Naraganiza ngu mubiro ebirukwija nikiijja kusoboka. Abantu baliba n’obwomezi oburungi, n’ensi eriba nungi muno n’abantu baliba nibagonzangana hamu na Ruhanga.

Hawa akaba atakyali munywani wa Ruhanga, okuzaara abaana kutamwanguhire. Akasaasa muno. Obutahurra Yahwe bukamuletera obujune bwingi, torukukikiriza?

Adamu na Hawa bakazaara abaana baingi aboojo n’abaisiki. Omwana wabu omuzigaijo obu yazairwe bakamuruka Kaini. Kandi owakabiri bakamuruka Aberi. Bintu ki ebyababaireho? Nobimanya?