Adamu na Hawa Bakajemera Ruhanga

Kiro kimu, Hawa obwakaba ali wenka, enjoka ekabaza nauwe. Ekamugambira eti: ‘Mali Ruhanga akabatanga kulya ebijuma by’emiti enu yoona?’ Hawa akagigarukamu ati: ‘Nitusobora kulya ebijuma eby’emiti yoona, oihireho gumu gwonka. Obu turalya ebijuma by’omuti ogu nitwija kufa.’ Enjoka ekamugarukamu eti: ‘Timurukwija kufa. Baitu obu muragulyaho, nimwija kufooka nka Ruhanga.’ Setani akabaza amananu? Nangwa, akabaza ebisuba. Baitu Hawa akaikiririza omu bisuba ebi. Buli murundi Hawa ogu yaroraga ha kijuma, yayeyongeraga kugonza kukirya. Akamalirra akiriire kandi yaha na Adamu. Adamu akaba akimanyire ngu kujemera Ruhanga kikaba nikigenda kurugamu okufa. Baitu Adamu eki atakifeho.

Hanyuma y’obwire buke, ha kiro eki kyonyini, Yahwe akabaza na Adamu na Hawa. Akabakaguza habwaki bacwire ekiragiro kye. Adamu akekwasa Hawa, kandi Hawa yayekwasa enjoka. Yahwe akababinga omu Rugonjo Adeni babw’okucwa ekiragiro kye. Kurora ngu tibagarukayo, Yahwe akata abamaraika hamu n’empirima erukwaka omurro ha mulyango ogurukutaha omu rugonjo.

Yahwe akagamba ngu ayababihire nauwe akaba nagenda kufubirwa. Enjoka teri niyo yonyini ey’abalize na Hawa habwokuba Yahwe atahange enjoka ezisobora kubaza. Maraika omubi nuwe yakozeseze enjoka kubiihabiiha Hawa. Maraika ogu omubi nayetwa Setani Diabolo. Omu bwire obw’omu maiso, Yahwe naija kuhwerekereza Setani anyakusoonasoona abantu kukora ebintu ebibi.