Omwigo Gw’aroni Gwayakya Ebimuli

DORA ebimuli hamu n’amalozi agengere agamezere ha mwigo. Omwigo gunu n’ogwa Aroni. Ebimuli binu n’ebijuma binu byoona byakiize mukiro kimu kyonka! Katurole habwaki?

Abaana Baisareri baali bamazire akasumi nibandaara omu irungu okumara akaanya. Abantu abandi bakaba nibagamba ngu Musa akaba atasemerire kwebembera abantu kandi ngu na Aroni akaba atasemerire kuba nyakatagara omukuru. Kora akaba ali omu habakaba baine entekereza enu hamu na Disani, Abiramu n’abandi 250 abaali bebembezi b’abantu. Boona bakaizira Musa n’okumugambira bati: ‘Habwaki noyeteka haiguru muno okutukira?’

Musa akagambira Kora n’abakurasi be ati: ‘Nyenkya kara buli muntu akwate ekiswa kye n’emyamirro muleete muhema ya Yahwe. Turarora noha Yahwe ou arakomamu.’

Ekiro ekyakurasireho, Kora n’abakurasi be 250 bakaija muhema hamu n’abandi abaali nibabasagika nabo bakaija. Yahwe akabihirwa muno. Musa akabagambira ati: ‘Muruge murusisira rw’abantu ababi. Mutakwata ha kintu ekyabu kyoona.’ Abantu bakahurra, nukwo kwebaganiza kuruga mukitebe kya Kora, Disani hamu n’Abiramu.

Hanyuma Musa nukwo yabagambire ati: ‘Habwa kinu nimwija kumanya noha Yahwe ou yakomere. Ensi nijja kwesama n’okumirra kimu abasaija banu ababi.’

Aho Musa obu yamazire kubaza binu, ensi ekesama yamira ehema ya Kora hamu n’ebye byoona na Dasani hamu n’Abiramu n’abo boona abaali nibabasagika bakamirwa ensi. Kandi yagaruka yaterekerra. Abantu obu bahuliire empamo z’abo abakaba nibamirwa ensi, bakatoka bati: ‘Twiruke! Ensi naitwe nesobora kutumira!’

Kora wenyini n’abasagiki be 250 bakaba bali haihi n’ehema. Yahwe akatuma omurro boona gwabokya. Yahwe akagambira mutabani wa Aroni, Eryeza okutwara ebiswa byabo abafiire kubisweka ha kyoto kinu ekikaba ky’okurabura hali Abaisareri ngu busaho ondi kwihaho Aroni n’abatabani be asemeriire kukora obwa nyakatagara hali Yahwe.

Yahwe akagonza kubamanyisa ngu akaba akomere Aroni n’abatabani be okuba banyakatagara. Akagambira Musa ati: ‘Abakuru ba buli ruganda rwa Isareri baleete omwigo. Oruganda rwa Levi muteho ogwa Aroni. Emigo yoona mugite omuhema mu maiso g’esanduuko y’endagano. Omwigo gw’ogu ou ndaba nkomere okuba nyakatagara gurayakya ebimuli.’

Ekiro ekyakurasireho, Musa obu yagenzire kurora, akasanga omwigo gwa Aroni gwakize ebimuli hamu n’amalozi agengere! Nahabwekyo norora habwaki Yahwe yaletiire omwigo gwa Aroni okwakya ebimuli?