Musa Ateera Omwandara

EMYAKA nyingi ekarabaho—emyaka 10, emyaka 20, emyaka 30, emyaka 39! Abaisareri bakaba bakyaali omu irungu. Omubwire bunu bwoona Yahwe akaba narolerra abantu be. Akaba nabaliisa emanu. Akaba nabebembera arukukozesa empagi y’ekicu nyamisana, kandi ekiro akaba nakozesa empagi y’omurro. Obwire bunu bwoona engoye zabu tizirakuzire n’obu byakuba ebigere byabu okuzimba.

Hati gwaali mwezi gw’okubanza ogw’omwaka gwa 40 kuruga Abaisareri baruga Misiri. Abaisareri batire orukande omu Kadesi. Hanu nuho baali bali obu batumiire entasi 12 okutata ensi ya Kanani emyaka 40 ey’enyuma. Munyanya Musa, Miryamu akafeera Kadesi. Nkoku kikaba kibaireho nahanu hakabaho emitalibaine.

Abantu bali batasobora kutunga amaizi. Hanyuma batontorromera Musa: ‘Kyakubaire kirungi kakuba twafiire kara. Habwaki watulesere kutwiha Misiri kutuleeta mukiikaro kinu ekibi kiti nambere hatarukukura ekintu kyoona? Busaho obura, mizabibu, mizaituni n’amakoma mahanga kandi busaho n’amaizi goona ag’okunywa.’

Musa na Aroni obu bagenzire omu hema okusaba, Yahwe akagambira Musa ati: ‘Soroza ekitebe ky’abantu kyoona hamu. Nukwo ogambire omwandara oguli hali. Amaizi agarukumara nigaija kurugamu habw’abantu n’ebisoro byabu.’

Nukwo Musa kusoroza abantu n’okubagambira ati: ‘Muhurre inywe abatarukwesiga Ruhanga! Nyowe na Aroni titurukusobora kubaihira amaizi mu mwandara gunu?’ Nukwo Musa yatiire omwandara emirundi ebiri n’omwigo gwe n’omugera gw’amaizi gukatandika kuruga omu mwandara. Hakabaho amaizi agarukumara abantu hamu n’ebisoro okunywa.

Baitu Yahwe akabihirirwa Musa na Aroni. N’omanya habwaki? Habwokuba Musa na Aroni bakagamba ngu nibo baali nibagenda okuleeta amaizi kuruga mu mwandara. Baitu mumananu akaba ali Yahwe nuwe yakikozire baitu Musa na Aroni batabaze mananu hali kinu. Nahabwekyo Yahwe akagamba ngu naija kubafubira. Akabagambira ati: ‘Timulyebembera abantu bange kubatahya omu Kanani.’

Hanyuma Abaisareri bakaruga Kadesi bahika ha Rusozi orwa Horu. Haiguru y’orusozi runu nuho Aroni yafeerire. Akaba ahikiize emyaka 123 ey’obukuru. Kinu kikatuntuza muno Abaisareri kandi bakamara ebiro 30 nibalirirra Aroni. Mutabani we, Eryeza nuwe yafookere nyakatagara omukuru ow’ihanga lya Isareri.