Isomo 1

Omulingo Nkoku Osobora Kuzoramu Ruhanga eky’Akutwetagisa

Bikuru ki ebikutumanyisibwa omu Baibuli? (1)

N’oha ayahandikisize Baibuli? (2)

Habwaki w’akwegere Baibuli? (3)

1. Baibuli kisembo kyomuhendo kuruga hali Ruhanga. Eri nk’ebbaruha taata eyahandiikire abaana abagonza. Etumanyisa amananu agakukwata hali Ruhanga—okwali kandi ne byagonza. Esoborra omulingo gwokutabarukamu ebizibu n’okuzoora okusemererwa okuhikire. Baibuli niyo yonka etugambira ekitunyina kukora kusobora kusemeza Ruhanga.—Zabuli 1:1-3; Isaya 48:17, 18.

2. Baibuli ekahandiikwa abasaija 40 abenyahukana omu mwanya gw’emyaka 1,600, kutandikira 1513 B.C.E. Erumu obutabu 66. Abo abahandiikire Baibuli bakaterekerezebwa Ruhanga. Bakahandiika ebitekerezo bye, bitabe byabu habwabu. Nahabwekyo Ruhanga ali omu iguru hatali omuntu wena hansi, nuwe Yahandikisize Baibuli.— 2 Timoseo 3:16, 17; 2 Petero 1:20, 21.

3. Ruhanga akakigumya ngu Baibuli ekopororwe omu mulingo oguhikire mali kandi erindwe. Baibuli ziteirwe omukyapa kukira ekitabu ekindi kyona. Boona tibaija kusemererwa kukurora noyega Baibuli, baitu ekyo otakikiriza kukulemesa. Obwire bwawe obw’omu maiso obw’ebiro n’ebiro nibusigikirra hakumanya Ruhanga n’okukora ebyagonza nobworaba nohiganizibwa.—Matayo 5:10-12; Yohana 17:3.