Isomo 10

Ebikorwa Ruhanga eby’Anoba

Oyina kutwara ota ebintu Ruhanga ebyagamba ngu bibi? (1)

Kuteerana kwa mulingo ki, okw’omukazi n’omusaija okubi? (2)

Omukristaayo okubiiha ebisuba aina kukurora ata? (3) kandi okuteera jaara? (3) kandi okwiba? (3) kandi obwisi? (4) kandi oburaguzi? (5) kandi obutamizi? (6)

Omuntu asobora ata kwecwa h’abikorwa ebibi? (7)

1. Abahereza ba Ruhanga bagonza ebirungi. Kyonka nabwo baina kwega kunoba ebibi. (Zabuli 97:10) Ekyo nikimanyisa kwehara ebikorwa Ruhanga eby’anoba. Ebikorwa ebimu hali ebyo nibyo biraha?

2. Obusihani: Okuteerana otakatahire omu buswezi, obusihani, kubyama n’ekisoro, kubyama n’ogwo ow’oinaho oruganda, okubyama omusaija n’omusaija rundi omukazi n’omukazi byona biri bibi bya maani muno omu maiso ga Ruhanga. (Abyabalevi 18:6; Abarumi 1:26, 27; 1 Abakolinso 6:9, 10) Kakuba omusaija n’omukazi abataswerangaine baikara hamu, basemerire kwahukana kitali ekyo baina kuswerangana omu biragiro.—Abaheburaniya 13:4.

3. Okubiiha Ebisuba, Okuteera Jaara, Okwiba: Yahwe Ruhanga tasobora kubiiha ebisuba. (Tito 1:2) Abantu abakugonza kusiimibwa omu maiso ge basemerire kwehara okubiiha ebisuba. (Enfumo 6:16-19; Abakolosai 3:9, 10) Buli mulingo gwona ogw’okuteera jaara gulimu omururu. Nahabw’ekyo Abakristaayo tibetahya omu mulingo gwona ogw’okuteera jaara, nk’oburuuru, empaka z’embarasi na canisi. (Abefeso 5:3-5) Kandi Abakristaayo tibaiba. Tibagura by’obusuma babyetegerize rundi kutwara ebintu bataikirizibwe.—Okuruga 20:15; Abefeso 4:28.

4. Ekiniga, Obwisi: Ekiniga ekitakugirwe kisobora kurugwamu ebikorwa by’obwisi. (Okubanza 4:5-8) Omuntu akora eby’obwisi tasobora kuba munywani wa Ruhanga. (Zabuli 11:5; Enfumo 22:24, 25) Tikihikire kuhoo’ra enzigu rundi kukora abandi ekibi ha’bwebibi ebibaba batukozere.—Enfumo 24:29; Abarumi 12:17-21.

5. Ebyamasane n’Oburaguzi: Abantu abamu bakozesa amaani g’ebihangwa eby’omyoyo kulengaho kukiza endwara. Abandi baroga abanyanzigwa baabu barwale rundi bafe. Amaani agali enyuma y’ebikorwa binu byona nuwe Setani. Nahabw’ekyo Abakristaayo tibasemerire kwetahya omu bikorwa binu. (Ekyebiragiro 18:9-13) Kuba haihi na Yahwe nubwo bulinzi oburukuki’rayo kimu hali okurogebwa abandi.—Enfumo 18:10.

6. Obutamiizi: Tikiri kibi kunywaho evini, bbiya rundi ebitamiiza ebindi. (Zabuli 104:15; 1 Timoseo 5:23) Baitu okunywa muno n’obutamiizi bibi omu maiso ga Ruhanga. (1 Abakolinso 5:11-13; 1 Timoseo 3:8) Kunywa ekihinguraine kisobora kusiisa obwomezi bwawe n’amaka gaawe. Kandi kisobora kukuletera kutwalirizibwa bwangu okwohebwa okundi.—Enfumo 23:20, 21, 29-35.

7. Abantu abakora ebyo Ruhanga ebyagamba ngu bibi “tibaligwetwa obukama bwa Ruhanga.” (Abagaratiya 5:19-21) Bworaba mali n’ogonza Ruhanga kandi n’ogonza kumusemeza, osobora kwecwa habikorwa binu. (1 Yohana 5:3) Yega kunoba ekyo Ruhanga eky’agamba ngu kibi. (Abarumi 12:9) Koragana n’abantu abaina engeso ez’okutiina Ruhanga. (Enfumo 13:20) Abakristaayo bagenzi bawe abakuzire omu by’omwoyo basobora kuba ab’obukonyezi. (Yakobo 5:14) Kukira muno, wekwate ha bukonyezi bwa Ruhanga noraba omu kusaba.—Abafiripi 4:6, 7, 13.

[Ebisisani ebiri ha rupapura 20, 21]

Ruhanga anoba obutamiizi, okwiba, okuteera jaara n’ebikorwa eby’obwisi