Ikara omu Kugonza kwa Ruhanga

1, 2. Nitusobora kutunga nkaha obwirukiro oburungi biro binu?

TERA akasisani oli omu muhanda haimukire akairiringwa. Iguru likwasire muno. Enkuba etandika kumyankya, enkuba ebbwatuka, enjura etandika kugwa etera emigezi. Oiruka n’ose’ra ah’okweigama. Otunga ah’okweigama ha rubaju rw’omuhanda. Homere n’enjura tekukuhikaho. Oina kuba osemererwa muno kutunga ah’okweigama aharungi!

² Tuli omu busumi bubi muno. Ensi n’eyeyongera kusisikara. Baitu haroho obwirukiro oburungi aha tukusobora kutunga obulinzi kandi nitutahikwaho kabi ak’amaani koona. Nubwo buraha? Wetegereze Baibuli eky’egamba: “Ndigamba ha Mukama [Yahwe] nti ogu nikyo ky’okwebingamu kyange, Ruhanga wange ou ndukwesiga.”—Zabuli 91:2, NW.

3. Tusobora tuta kufora Yahwe obwirukiro bwaitu?

³ Kitekerezeho! Yahwe, Omuhangi kandi Arukuki’rayo kimu omu buhangwa bwoona, nasobora kuba bulinzi kandi obwirukiro bwaitu. Nasobora kutulinda kurungi habwokuba aina amaani kukira omuntu ondi wena rundi ekintu kyoona eky’obunyanzigwa. Gonze tuhikirweho akabi koona, Yahwe asobora kwihaho ebyo ebiba bireserwe akabi ako. Tusobora tuta kufora Yahwe bwirukiro bwaitu? Kikwetagisa tumwesige. Kwongerezaho, ekigambo kya Ruhanga kikututere’ra: “Mwerindege omu kugonza kwa Ruhanga.” (Yuda 21) Ego, tukwetaga kwikara omu kugonza kwa Ruhanga, nitulinda obuganjaine bwaitu na Isiitwe ow’omuiguru. Nubwo turakigumya ngu ali bwirukiro bwaitu. Baitu tusobora tuta kukora obuganjaine bwa mulingo ogwo?

MANYA OMULINGO RUHANGA AYOLEKEREMU OKUGONZA KANDI OBE N’EKY’ORAKORAHO

4, 5. Miringo ki Yahwe ey’atwolekiremu okugonza?

⁴ Kwikara omu kugonza kwa Ruhanga, twina kusiima omulingo Yahwe atwolekeremu okugonza kwe. Tekereza ha kwegesa kwa Baibuli okw’otungire kuraba omu kitabu kinu. Nk’Omuhangi, Yahwe atuhaire ensi nk’amaka gaitu amarungi. Agitairemu eby’okulya bingi n’amaizi, eby’obuguuda obw’omwitaka, ebisoro ebikusemeza n’ebikaro ebikuzooka kurungi. Nk’ogu Arugirraho Ebyahandiikirwe omu Baibuli, Ruhanga atumanyisize ibaara lye n’emiringo ye. N’ekindi, ekigambo kye kyoleka ngu akatuma Omwana we omugonzebwa ha nsi, yaikiriza Yesu abonabonesebwe n’okutufeera. (Yohana 3:16) Ekisembo ekyo nikimanyisa ki nambere tuli? Nikituha okunihira okurungi okw’ebiro eby’omumaiso.

⁵ Okunihira okw’ebiro eby’omumaiso nikusigikira na ha kintu ekindi Ruhanga eky’akozire. Yahwe ateireho gavumenti ey’omuiguru, Obukama bwa Masiya. Omu kasumi kataito muno, nibwija kumaraho okubonabona kwoona kandi nibwija kufora ensi yoona orugonjo rwa Ruhanga. Hati banza okitekerezeho! Nitusobora kwikara omu rugonjo oru omu businge kandi tusemereirwe ebiro byoona. (Zabuli 37:29) Baitu ebyo bitakabaireho, Ruhanga atuhaire oburagirizi hati, obukuki’rayo kimu oburungi. Kandi atuhaire n’ekisembo ky’okusaba, omulingo gw’okubaza nawe. Enu eri emu ha miringo enke Yahwe ey’ayoleki’remu okugonza hali abantu boona kandi na hali iwe nk’omuntu.

6. Nosobora ota kusiima okugonza Yahwe okw’akwolekere?

⁶ Ekikaguzo ekikuru eky’okucumitirizaho kiri: Okugonza kwa Yahwe ndakutwara mulingo ki? Baingi nibaija kugamba “Nanyowe nikinyetagisa kwoleka Yahwe ngu nimugonza.” Nukwo okwehu’ra otyo? Yesu akagamba ngu ekiragiro kinu nikyo kikuki’rayo kimu omu byoona: “Gonza Mukama Ruhanga wawe n’omutima gwawe gwona, n’obwomezi bwawe bwona, namagezi gawe gona.” (Matayo 22:37) Mali oina ensonga nyingi ezikuletera kugonza Yahwe Ruhanga. Baitu tugambe ngu kwehu’ra otyo nikyo kyoonka ekikutwarramu omu kugonza Yahwe n’omutima gwawe gwoona, n’amagezi gawe goona?

7. Oihireho kw’ehu’ra bw’ehu’ra ngu nogonza Ruhanga, haroho ekindi ekitwina kukora kwoleka ngu nitumugonza? Soborra.

⁷ Nkoku kisoboroirwe omu Baibuli, kugonza Ruhanga tikugarukira ha kwehu’ra bwehu’ra ngu n’omugonza. Omu mananu n’obukiraba kiri kikuru kuba n’enyehu’ra eya mulingo ogwo, egyo eri ntandikwa y’okugonza Yahwe. Akabibo k’ekijuma niko kamera nikarugamu omuti ogwaana ebijuma. Baitu kakusangwa oba nogonza ekijuma wakusemerirwe omuntu kukuha akabibo k’ekijuma? Nangwa! Omu mulingo nugwo gumu, kwehu’ra nogonza Ruhanga eri ntandikwa butandikwa y’okugonza Yahwe Ruhanga. Baibuli eyegesa: “Kunu nukwo kugonza Ruhanga, itwe tukwate ebiragiro bye, kandi ebiragiro bye tibirukulemera.” (1 Yohana 5:3) Okugonza Ruhanga kusobora kuba kw’amananu, kwina kwaana ebyaana. Kwina kwolekwa omu bikorwa. —Matayo 7:16-20.

8, 9. Nitusobora kwoleka tuta okusiima hamu n’okugonza kwaitu hali Ruhanga?

⁸ Twoleka ngu nitugonza Ruhanga obu tuhondera ebiragiro bye kandi nitubiko’raho. Kinu tikigumire kuhikiriza. Ebiragiro bya Yahwe tiguli mugugu nambere tuli, akabituteraho tusobole kutunga obwomezi oburungi kandi obukusemeza. (Isaya 48:17, 18) Obu tuhondera okuragi’ra kwa Yahwe, twoleka Isiitwe ow’omuiguru ngu nitusiima byoona eby’atukoliire. Ekikusaliza bataito muno mu nsi ye biro binu aboleka okusiima nk’okwo. Titukugonza kuba abatarukusiima, nk’abamu ababaireho omu busumi Yesu ahayabereireho ha nsi. Yesu akakiza abagenge ikumi, kyonka omu wenka nuwe yagarukire enyuma kumusiima. (Luka 17:12-17) Mananu kwo, twakugondeze kuba nk’ogwo eyayolekere okusiima, hatali entasiima mwenda!

⁹ Hati obwo, ebiragiro bya Yahwe ebi twina kworobera nibyo biraha? Bingi hali byo tubibalizeho omu kitabu kinu, kyonka ka tweijukyeyo ebimu. Kukwata ebiragiro bye kikwija kutukonyera kwikara omu kugonza kwa Ruhanga.

WEYONGERE KUI’RA HAIHI NA YAHWE

10. Soborra habwaki kiri kikuru kugenda omu maiso n’okutunga okumanya okurukukwata hali Yahwe Ruhanga.

¹⁰ Kwega ebirukukwata hali Yahwe guli mulingo mukuru ogutusobozesa kuba n’enkoragana ey’amaani nawe. Nikyo kintu eki tutasemeire kulekeraho kukora. Kakusangwa oba oli ha kyoto, aheru omu kiro nihafuka muno; wakugayalirire omurro kuhoiga, n’okuzima? Nangwa. Noija kwikara n’ocumamu n’oyongeramu enku nukwo omurro gw’eyongere kwaka. Obwomezi bwawe nibusobora kugwa omu kabi kakuba omurro guzima. Omulingo enku zikaaza omurro nigwaka nugwo omulingo “okumanya Ruhanga” kwikazaho okugonza kwaitu hali Yahwe kuli kw’amaani.—Enfumo 2:1-5.

11. Okwegesa kwa Yesu kukakwataho kuta h’abakurasi be?

¹¹ Yesu akagonza abakurasi baikale nibagonza Yahwe hamu n’Ekigambo Kye eky’amananu. Hanyuma y’okuhumbuka, Yesu akegesa abegeswa babiri ha bunabbi obuli omu Byahandiikirwe eby’Oruheburaniya ebyahikirizibwe omuli we. Okwegesa kunu kukabakwataho kuta? Hanyuma bakagamba: “Omutima gwaitu tigusarairege omunda yaitu obwabaire nabaza naitwe omumuhanda, natusuku’ra ebyahandikirwe?”—Luka 24:32.

12, 13. (a) Kiki ekihikire ha kugonza kw’abantu abakukira obwingi biro binu hali Yahwe n’ekigambo kye? (b) Nitusobora kwerinda tuta butagaruki’ra omu kugonza kwaitu?

¹² Obu wabandize kwega Baibuli ekyeyegesa otahu’re oina omuhimbo gw’amaani, kandi wayeyongera n’okugonza Ruhanga? Hataroho kugurukyagurukya nukwo wayehu’lire. Baingi behu’ra mulingo nugwo gumu. Hati obuzibu buli ha kwikazaho okugonza okwo n’okukukuza. Titukugonza kuhondera engeso z’ensi. Yesu akaranga: “Okugonza kwabaingi nukwo kulifuka.” (Matayo 24:12) Nosobora ota kwerinda butagaruki’ra omu kugonza Yahwe n’amananu aga Baibuli ag’oyegere?

¹³ Weyongere kutunga okumanya okurukukwata hali Yahwe Ruhanga na Yesu Kristo. (Yohana 17:3) Cumitiriza muno hali eby’okwega omu Kigambo kya Ruhanga, n’oyekaguza: ‘Kinu nikinyegesa ki hali Yahwe Ruhanga? Nikinkonyera kita kwongera kumugonza n’omutima gwange gwoona, n’amagezi gange goona, n’obwomezi bwange bwoona?’ (1 Timosewo 4:15) Okucumitiriza nk’okwo kwija kukukonyera kulinda okugonza kwawe hali Yahwe.

14. Okusaba nikusobora kutukonyera kuta kulinda okugonza kwaitu hali Yahwe?

¹⁴ Okusaba nugwo mulingo ogundi ogukusobora kutukonyera kwikara nitugonza Yahwe. (1 Abasesalonika 5:17) Omu Suura 17 ey’ekitabu kinu, tukega ngu okusaba kiri kisembo ky’omuhendo kuruga hali Ruhanga. Nk’okugambirangana buli kimu kugumya enkoragana y’abantu n’okusaba kugumya enkoragana yaitu na Yahwe. Kikuru kubaza nawe kurugira kimu ha mutima—tutakugarukanganamu ebigambo okutaina amakuru. Twina kubaza na Yahwe nk’omwana obwabaza na ise omugonzebwa. Nitugonza kumugambira buli kimu omu mananu kandi kurugira kimu ha mutima gwaitu baitu omu mulingo gw’okutekamu ekitinisa. (Zabuli 62:8) Mali, okwesomesa Baibuli n’okusaba okurukurugira kimu ha mutima, biri bintu bikuru omu kuramya kwaitu, kandi bitukonyera kwikara omu kugonza kwa Ruhanga.

TUNGA OKUSEMERERWA OMU KURAMYA KWAWE

15, 16. Habwaki kihikire okutwara omulimo gw’okutebeza nk’eky’omugisa kandi nk’eky’omuhendo ekituhairwe?

¹⁵ Okwesomesa Baibuli n’okusaba biri bikorwa by’okuramya ebi tukusobora kukora ha bwaitu itwenka. Kyonka hati katwetegereze omulingo gw’okuramya ogu tuko’ra omu rujwire: nukwo kugambiraho abandi enyikiriza zaitu. Otandikire ira kugambiraho abandi amananu agali omu Baibuli? Obu kiraba kiri kityo notekwa kuba osemereirwe kuhika ha idaara eryo. (Luka 1:74) Obu tugambira abandi ebi twegere hali Yahwe Ruhanga, tuba tutungire omulimo omukuru oguhairwe Abakristayo boona ab’amananu—ogw’okutebeza amakuru amarungi ag’Obukama bwa Ruhanga.—Matayo 24:14; 28:19, 20.

¹⁶ Omukwenda Paulo akatwara obuhereza bwe nk’ekintu eky’omuhendo, akabweta eky’obuguuda. (2 Abakolinso 4:7) Kugambira abantu hali Yahwe Ruhanga n’ebigendererwa bye, nugwo mulimo ogurukuki’rayo kimu ogw’orukusobora kukora. Obu tugukora, tuba nituhereza Omukozesa arukuki’rayo kimu oburungi, kandi omulimo gunu gurugamu emigisa nyingi. Obwokora omulimo gunu oba n’okonyera abantu ab’emitima emirungi kui’ra haihi na Isiitwe ow’omuiguru n’okutandika kulibatira omu muhanda ogukuhikya omu bwomezi obutahwaho! Mulimo ki ogundi ogukusobora kukira gunu? Kandi kugambira abandi ebirukukwata hali Yahwe n’ekigambo kye, okwikiriza kwawe n’okugonza kwawe hali Yahwe by’eyongera kuguma. Kandi Yahwe asiima muno okwekamba kwawe. (Abaheburaniya 6:10) Okwekambira omulimo ogwo nikusobora kukukonyera kwikara omu kugonza kwa Ruhanga.—1 Abakolinso 15:58.

17. Habwaki obuhereza bw’Ekikristayo bwina kukorwa bwangu hati?

¹⁷ Kikuru kukimanya ngu omulimo gw’okutebeza amakuru g’Obukama gwina kukorwa omu bwangu. Baibuli egamba: “Tebeza ekigambo, kikole bwangu.” (2 Timosewo 4:2, NW) Habwaki kutebeza kukwetagisa bwangu omu kasumi kanu? Ekigambo kya Ruhanga kitugambira: “Ekiro ekikuru ekya Mukama kiri haihi. Kiri haihi nikyanguha muno.” (Zefaniya 1:14) Akasumi kakwija mu bwangu nambere Ruhanga araihiraho kimu entekaniza y’ebintu enu. Abantu baina kuraburwa! Nibetaaga kumanya ngu hati niko kasumi k’okwekomeramu Yahwe kuba mulemi wabu arukuki’rayo kimu. Empero “terukuke’rerwa.”—Habakuki 2:3, NW.

18. Habwaki twina kuramya Yahwe omu ruijwire tuli hamu n’Abakristayo ab’amananu?

¹⁸ Yahwe nagonza tumuramye omu rujwire tuli hamu n’Abakristayo ab’amananu. Obwo nubwo bulyo ekigambo kye kigambira: “Kandi tutekerezege okwekambisangana, okugonzangana n’okukora engeso ezisemiire; okutaleka kwesorozaga hamu, nkabandi okubagira, baitu ntugambi’ragana itwenka, kandi okweyongera tweyongerege tuti nkoku murora ekiro kiri haihi nokuhika.” (Abaheburaniya 10:24, 25) Obutuba n’abaikiriza bagenzi baitu omu nsorokano z’Ekikristayo, tuba n’omugisa ogwo kuhaisaniza n’okuramya Ruhanga waitu. Kandi twombekangana kandi tugarranganamu amaani.

19. Nitusobora tuta kugumya okugonza kwaitu omu kitebe Ekikristayo?

¹⁹ Obu twesoroza hamu n’abaramya ba Yahwe bagenzi baitu, tugumya obumu, engonzi n’obuganjaine bwaitu omu kitebe. Kikuru kuserra ebirungi ebiri omu bagenzi baitu, nka Yahwe nawe okw’atuserramu ebirungi. Otanihira kurora okuhiki’ra omu b’oruganda bagenzi bawe. Ijuka buli omu ali ha rulengo orurukwahukana omu by’omwoyo, kandi buli omu hali itwe akora ensobi. (Abakolosai 3:13) Kora enkoragana naabo abagonza Yahwe, noija kwesanga naiwe nokura omu by’omwoyo. Ego, kuramya Yahwe n’aboruganda ab’omwoyo nikiija kukukonyera kwikara omu kugonza kwa Ruhanga. Yahwe araha ata empeera ab’amuramya n’obwesigwa kandi nibaikara omu kugonza kwe?

KUNUKI’RA “OBWOMEZI MALI”

20, 21. “Obwomezi mali” nikyo kiki, kandi habwaki kuli kunihira kurungi muno?

²⁰ Yahwe aha abahereza be abesigwa obwomezi, baitu abaha bwomezi bwa mulingo ki? Oli mwomezi? Baingi hali twe nitusobora kugamba ngu twomiire. Habwokuba, nitwikya, nitulya kandi nitunywa. Omu mananu twina kuba tuli bomezi. Kandi obutuba tusemerirwe nitusobora n’okugamba, “Kunu nukwo kwomera mali!” Kyonka Baibuli eyoleka ngu busaho muntu mwomezi mali biro binu.

²¹ Ekigambo kya Ruhanga kitutererra ‘kukwata obwomezi obu, nubwo bwomezi mali.’ (1 Timoseo 6:19) Ebigambo ebyo bikwoleka ngu “obwomezi mali” tukubunihira omu busumi bw’omumaiso. Ego, obu tuliba tuhikirire, twija kuba bomezi mali omu mulingo Ruhanga yagendereire omu kubanza. Obu turaba nitwikara omu rugonjo rwa Ruhanga omu nsi, omu bwomezi oburungi omu businge n’okusemererwa, nubwo twija kuba nitusemererwa “bwomezi mali”—obwomezi obutahwaho. (1 Timosewo 6:12) Okwo tikuli kunihira kurungi?

22. Nosobora ota “kukwatira kimu obwomezi mali”?

²² Tusobora tuta kukwatira kimu “obwomezi mali”? Omu mulingo nugwo gumu Paulo akatere’ra Abakristayo “bakole kurungi” kandi “babe abagu[u]da omu ngeso enungi.” (1 Timosewo 6:18) Nahabwekyo kutunga obwomezi bwonyini, kikusigikira muno ha mulingo tuko’ra h’amananu agatwegere kuruga omu Baibuli. Baitu Paulo akaba namanyisa ngu tutunga “obwomezi mali” habw’okukora ebikorwa ebirungi? Nangwa, ekisembo ekyo kikutuhebwa kusigikira ha “mbabazi ezitatusemerire” Kuruga hali Ruhanga. (Abarumi 5:15) Kyonka, Yahwe nasemererwa kuha empeera abo ab’amuhereza n’obwesigwa. Nasemererwa obe ‘n’obwomezi mali.’ Obwomezi nk’obwo obukusemeza, obw’obusinge, obw’ebiro n’ebiro bwija kutungwa abakwikara omu kugonza kwa Ruhanga.

23. Habwaki kiri kikuru kwikara omukugonza kwa Ruhanga.

²³ Buli omu hali itwe aina kwekaguza, ‘Nindamya Ruhanga omu mulingo ogw’ateireho omu Baibuli?’ Kuba buli kiro turakigumya ngu nukwo kiri, nitwija kuba tuli omu muhanda oguhikire. Nitwija kugumya ngu Yahwe ali bwirukiro bwaitu. Naija kulinda abantu be abesigwa nabarabya omu biro eby’ahampero y’entekaniza y’ebintu enu embi. Kandi Yahwe naija kutujuna n’atuhikya omu ntekaniza empyaka eri haihi okuhika. Katuliba n’okusemererwa kwingi kuhika omu kasumi ako! Kandi nitwija kusemererwa habw’okucwamu kurungi omu biro binu eby’ahampero! Kakusangwa okora okucwamu nk’okwo hati, noija kusemererwa “obwomezi mali,” obwomezi nka Yahwe Ruhanga y’agendereire bube ebiro n’ebiro!