N’osobora Ota Kwirra Haihi na Ruhanga?

1. Ruhanga ahu’ra okusaba kwa buli omu?

Ruhanga n’agonza abantu omu mahanga goona kumwirra haihi nibaraba omu kusaba. (Zabuli 65:2) Gonze kiri kiti, tahu’ra rundi taikiriza buli kusaba kwoona. Nk’ekyokurorraho, essara z’omusaija ow’akutwara kubi mukazi we zisobora kutangwa. (1 Petero 3:7) Abaisareri obu bayangire kuhindura emihanda y’abu embi, Ruhanga akanga kuhu’ra essara zaabu. Nahabwekyo okusaba tusemeriire tukutwale nk’ekintu eky’omuhendo. Baitu, abantu ababaire nibakora ebintu ebibi muno obu begarukamu, Ruhanga aikiriza essara zaabu.​—Soma Isaya 1:15; 55:7.

Rora vidiyo Ruhanga Ahurra Okusaba kwa Buli Omu?

2. Tusemerire kusaba tuta?

Habwokuba okusaba kicweka ky’okuramya kwaitu, tusemeriire kusaba Omuhangi waitu Yahwe wenka. (Matayo 4:10; 6:9) Kandi habwokuba tituhikirire, essara zaitu twiina kuzirabya omu Yesu habwokuba akehayo habw’ebibi byaitu. (Yohana 14:6) Ruhanga tarukugonza tusabe endanda rundi essara ez’okusoma busoma. Baitu n’agonza essara zaitu zibe nizirugira kimu ha mutima.​—Soma Matayo 6:7; Abafiripi 4:6, 7.

N’essara ezi tusabira omu mutima, Omuhangi waitu azihu’ra. (1 Samuiri 1:12, 13) Buli kasumi koona nitusobora kumusaba, nyenkyakara nitukyaimuka, rundi omu kiro nitugenda kubyama, obutuba nitugenda kulya ebyokulya, n’obutuba n’ekintu kyoona ekirukututalibaniza.​—Soma Zabuli 55:22; Matayo 15:36.

3. Habwaki Abakristaayo baso’rokana?

Kwirra haihi na Ruhanga tikyanguhire habwokuba baingi h’abantu abatwikaramu tibaikiririza omu Ruhanga gonze omu murago gwe ogw’okuleetaho obusinge omu nsi. (2 Timoseo 3:1, 4; 2 Petero 3:3, 13) Nahabwekyo, nitwetaaga kuso’rokana n’abaikiriza bagenzi baitu habwokuba batugarramu amaani naitwe tubagarramu amaani.​—Soma Abaheburaniya 10:24, 25.

Obu tuso’rokana n’abantu abarukugonza Ruhanga kitukonyera kwirra haihi nawe. Obu tugenda omu nso’rokano z’Abakaiso ba Yahwe tutunga omugisa gw’okugarranganamu amaani.​—Soma Abarumi 1:11, 12.

4. N’osoba ota kwirra haihi na Ruhanga?

N’osobora kukikora n’ocumitiriza hali ebikorwa, okuhabura, n’emirago ya Ruhanga eby’oyegere kuruga omu Kigambo kye. Okusaba n’okucumitiriza bitukonyera kusiima amagezi n’okugonza Ruhanga okw’atwoleka.​—Soma Yosuha 1:8; Zabuli 1:1-3.

Kwesiga Ruhanga n’okumwikiririzamu nabyo bisobora kukukonyera ku’ira haihi nawe. Baitu okwikiriza nikwetaaga kukukurakuraniza buli kasumi n’oyeijukya ebintu ebikuru eby’orukwikiririzamu.​—Soma Matayo 4:4; Abaheburaniya 11:1, 6.

5. Oragasirwa ota obu oraira haihi na Ruhanga?

Yahwe afaayo muno hali abo abamugonza. Abalinda obu habaho ekintu kyoona ekirukusobora kubalemesa kuhika omu bwomezi obutahwaho. (Zabuli 91:1, 2, 7-10) N’agonza tube bomezi kurungi kandi tusemerirwe. Okwegesa kwe nukwo kurukukirrayo kimu oburungi.​—Soma Zabuli 73:27, 28; Yakobo 4:4, 8.