ISOMO 8
Obu Mugwerwa Obutandwa
“Habw’ebi nimusemererwa muno, n’obukiraaba ngu habw’akasumi akataito mwine kuraba omu kulengesebwa okutali kumu.”—1 Petero 1:6, NW
Obundi n’obumukora kyoona ekirukusoboka kuba n’amaka amarungi, hasobora kwijaho ebigwererezi ebisora kubamaraho okusemererwa. (Omugambizi 9:11) Obu tutunga ebizibu, Ruhanga tatulekerra, atuheereza obukonyezi. Kakuba muko’ra ha misingi ey’erukugenda kusoborwa omw’isomo linu, nimwija kusobora n’okuraba n’omubizibu eby’amaani.
1 MWESIGE YAHWE
BAIBULI EGAMBA: “Nimumukwasa ebirukubatuntuza, habwokuba abafaaho.” (1 Petero 5:7, NW) Obu mutunga ebizibu timusemerire kujunana Ruhanga habwokuba tali nuwe abileeta. (Yakobo 1:13) Obu muramwesiga, naija kubakonyera. (Isaya 41:10) “Mumugambire byoona ebibali ha mutima.”—Zabuli 62:8, NW.
Kusoma Baibuli buli kiro nikiija kubakonyera kuteekana omu bitekerezo. Obu murakora mutyo nimwija kurora omulingo Yahwe ‘arabahuumuza omu mihito yaanyu.’ (2 Abakolinso 1:3, 4; Abarumi 15:4) Yahwe agamba ngu naija kubaheereza ‘obusinge bwe oburukukira okumanya kwona.’—Abafiripi 4:6, 7, 13.
EKY’OKUKORA:
Saba Yahwe akuheereze obusinge oikale oteekaine
Wecumitirize otakacwire ekintu kyoona
2 OTENAGIRIZA HAMU N’AB’OMU MAKA GAAWE
BAIBULI EGAMBA: ‘Omutima gw’ow’amagezi gutunga okumanya, n’okutu okw’ab’amagezi nikuse’ra okumanya.’ (Enfumo 18:15) Oine kusigara n’obaza n’ab’omu maka gaawe nukwo omanye ebibarukwetaaga.—Enfumo 20:5.
Baitu kakuba omu hali ab’omu maka gaanyu afa? Otatiina ku’ra. Ijuka ngu Yesu nauwe ‘aka’ra amaizi.’ (Yohana 11:35; Omugambizi 3:4) Kuhuumura kurungi nakyo kikuru muno. (Omugambizi 4:6) Nikiija kukukonyera kuraba omu kasumi kanu akazibu.
EKY’OKUKORA:
Linda enkoragana enungi n’ab’omu maka gaawe boona, nukwo kibanguhire kukugambira nkoku barukwehura hagwireho ekizibu. Otalinda kubaza n’abo hamazire kwijaho ekizibu
Bazaho n’abandi abarabire omu kizibu nikyo kimu
3 MUSERRE OBUKONYEZI
BAIBULI EGAMBA: “Enganjani negonza obusumi bwona, mugenziwe ayazairwe habwobujune.” (Enfumo 17:17) Abanywani baanyu basobora kuba nibagonza kubakonyera baitu batamanyire omulingo gw’okukikoramu. Nahabwekyo, mutetiinirra, mubagambire kyonyini ekimurukwetaaga babakorre. (Enfumo 12:25) Muserre obukonyenzi kuruga hali abo abarukwetegereza kurungi Ebyahandiikirwe. Amagezi agabarabaheereza nigaija kubahuumuza.—Yakobo 5:14.
Kuso’rokana n’ab’oruganda kiija kugumya okwikiriza kwanyu. Kukonyera abantu abandi abarukwetaaga kuhuumuzibwa, kiija naiywe kubakonyera kuguma. Mubagambire ha bintu ebirungi Yahwe eby’araganiize abantu. Mutesorrora baitu obwire bwanyu mubumale nimukonyera abantu abandi. —Enfumo 18:1; 1 Abakolinso 15:58.
EKY’OKUKORA:
Bazaho n’omu ha banywani baawe omusoborre nkoku orukwehu’ra
Mugambire kyonyini eky’orukwetaaga akukorre