Yahwe Akagumisiriza Yona

Omu rubuga rwa Nineve omu ihanga lya Asura, hakaba harumu abantu ababi muno. Yahwe akatuma nabbi we arukweta Yona kugenda Nineve kugambira abantu ngu bakaba basemeriire kuhindura ha ngeso zaabo. Baitu uwe Yona akatiina yairuka yagenda omu kiikaro kindi. Akatemba elyato erirukugenda Tarasisi.

Obu bakaba bali ha nyanja nibagenda, ekiyaga ky’amaani kikateera kandi abaliimba b’elyato batiina muno. Bakasaba baruhanga baabo kandi babakaguza bati: ‘Habwaki kinu nikibaho?’ Hanyuma, Yona akabagambira ati: ‘Ninyowe nyine omusango. Ninyiruka habwokuba tindukugonza kukora omulimo Yahwe ogw’andagiire kukora. Munnage omu nyanja kandi enyanja niija kuculeera.’ Abaliimba bakaba batarukugonza kumunaga omu nyanja baitu akabahambiriza kumunagamu. Obu bamunagire omu nyanja, enyanja ekaculeera.

Yona akatekereza ngu nagenda kufa baitu obwakaba nadikira omu nyanja akasaba Yahwe. Yahwe akasindika encu enkooto yamumira baitu etamwite. Yona obwakaba ali omunda y’encu akasaba yagamba ati: ‘Ninyija kworoberaga ebiragiro byawe buli kaire.’ Yahwe akaikaza Yona omunda y’encu kumara ebiro bisatu ataine kizibu kyona kandi akaragira encu emutwale ha musa gw’enyanja emutanake.

Nk’oku Yahwe akaba ajunire Yona, kikamanyisa ngu kikaba kitakyamwetagisa kugenda Nineve? Nangwa. Yahwe akongera yagambira Yona kugenda Nineve, baitu omurundi gunu akaikiriza yagenda. Obuyahikireyo akagambira abantu abo ababi ati: ‘Omu biro 40 byonka, orubuga runu nirwija kuhwerekerezebwa.’ Ekintu ekirukuhuniiriza kikabaho​—abantu ba Nineve bakuhuliriza kandi baleka engeso zaabo embi. Omukama wa Nineve akagambira abantu be ati: ‘Mukunge hali Ruhanga kandi mwegarukemu. Obundi tarukwija kutuhwerekereza.’ Yahwe obuyaboine abantu begarukiremu, atahwerekereze Nineve.

Yona akabiihirwa muno habwokuba orubuga rutahwerekerezebwe. Tekerezaaho kinu: Yahwe akagumisiriza Yona kandi yamwoleka embabazi, baitu uwe atakwatirwe abantu ba Nineve embabazi. Akagenda aheru y’orubuga yaikarra hansi y’ekisunsa abiihirwe. Hanyuma, ekisunsa kinu kikooma kyafa kandi Yona ayongerra kimu kubiihirwa. Yahwe akagambira Yona ati: ‘Nofaaho muno ekisunsa kukira abantu ba Nineve. Mbakwatiirwe embabazi tinabahwerekereza.’ Yahwe akaba namanyisa ki? Abantu ba Nineve bakaba bali b’omuhendo muno kukira ekisunsa ekyayomere.