Maraika wa Yahwe Akalinda Hezekiya

Obukama bwa Asura bukaba bumazire kusingura obukama obw’enganda ikumi eza Isareri. Omukama Senakaribu owa Asura, akagonza n’okukwata obukama obw’enganda ibiri eza Yuda. Akatandika kukwata embuga za Yuda rumu ha rumu. Baitu orubuga orw’akaba akizireyo kugonza kukwata rukaba Yerusalemu. Senakaribu, akaba atamanyire ngu Yahwe naliinda Yerusalemu.

Omukama wa Yerusalemu Hezekiya, akasasura Senakaribu sente nyingi muno nukwo atarwanisa Yerusalemu. Senakaribu n’obwaraaba yatwaire sente, akalemeraho mpaka yasindika ihe ery’amaani kusobora kurwanisa Yerusalemu. Abantu omu rubuga rwa Yerusalemu bakatiina muno habwokuba ihe lya Asura likaba nirirra haihi. Hanyuma, Hezekiya akabagambira ati: ‘Mutatiina. Ihe lya Asura ly’amaani, baitu Yahwe naija kutufoora b’amaani n’okubakira.’

Senakaribu akatuma omukwenda we Rabusake kugenda kusekereza abantu ba Yerusalemu. Rabusake akemerra aheru y’orubuga rwa Yerusalemu yagamba ati: ‘Yahwe tasobora kubakonyera. Mutaikiriza Hezekiya kubabiihabiha. Busaho ruhanga wena asobora kubajuna ihe lyaitu.’

Hezekiya akasaba Yahwe yamukaguza kiki ekyasemeriire kukora. Yahwe akamugarukamu yagamba ati: ‘Otatiina ebigambo bya Rabusake. Senakaribu tarukwija kukwata Yerusalemu.’ Hanyuma, Hezekiya akatunga amabbaruha kuruga hali Senakaribu. Ebbaruha zinu zikaba nizigamba ngu: ‘Mweheyo omu mikono yaitu, Yahwe tasobora kubajuna.’ Hezekiya akongera y’asaba Yahwe nagamba ati: ‘Ai, Yahwe, tujune, nukwo buli omu wena amanye ngu niiwe wenka Ruhanga ow’amananu.’ Yahwe akamugarukamu ati: ‘Omukama wa Asura tarukwija kutaaha omu Yerusalemu. Ninyija kulinda orubuga rwange.’

Senakaribu akaba nagumiza kimu ngu naija kukwata Yerusalemu. Baitu Yahwe akasindika maraika we ekiro nambere Abasura bakaba bakozere enkambi aheeru y’orubuga. Maraika akaita abaserikale 185,000 Abasura! Omukama Senakaribu akaferwa ihe rye ery’amaani. Akaba aine kugarukayo owabu habwokuba akaba asingwirwe. Yahwe akalinda Hezekiya hamu na Yerusalemu nk’oku akaba araganiize. Kakuba naiwe wali omu Yerusalemu kaire ako, wakwesigire Yahwe?