Yohana Atekaniza Omuhanda

Yohana, mutabani wa Zakaliya na Erisabesi akakura yafooka nabbi. Yahwe akozesa Yohana kumanyisa abantu nk’oku Masiya akaba nagenda kwija. Yohana yayegesezaga omu irungu hatali omu masorrokaniro rundi omu mbuga. Abantu bakaruga omu Yerusalemu na Buyudaaya yoona kwija kwegesebwa. Yohana akabegesa ngu basemeriire kuleka kukora ebintu ebitahikire nukwo basobole kusemeza Ruhanga. Baingi abamuhuliriize bakegarukamu ebibi byabo, kandi Yohana akababatiriza omu Kyambu Yorudani.

Obwomeezi bwa Yohana bwali bworobere. Yajwaraga orugoye orukozerwe omu byoya by’engamira kandi yalyaga enzige hamu n’obwoki. Abantu bakaba nibagonza muno kumanya ebirukukwata hali Yohana. Abafalisayo na Basadukayo nabo bakaija kurora Yohana n’obu baraaba bali baine emyehembo. Yohana akabagambira ati: ‘Mwegarukemu kandi muhindule engeso zanyu. Mutatekereza ngu muli b’embaganiza habwokuba muli baana ba Iburahimu. Eki tikirukubafoora baana ba Ruhanga.’

Baingi bakakaguza Yohana bati: ‘Tusemeriire kukora ki kusobora kusiimwa Ruhanga?’ Yohana akagambira Abayudaaya ati: ‘Obw’oraaba oine eby’okujwara bibiri, ekindi kihe mutaahi wawe ow’ataine.’ Omanyire habwaki yagambire ati? Akaba nagonza abegeswa be bamanye ngu kusobora kusiimwa Ruhanga, baali basemeriire kugonza abantu abandi.

Yohana akagambira abasoroza b’omusoro ati: ‘Mubaze amananu kandi mutagobeza muntu wena.’ Kandi akagambira abaserikale ati: ‘Mutaikiriza enguzi kandi mutabaza ebisuba.’

Banyakatagara n’Abalevi bakaija nambere Yohana akaba ali bamukaguza bati: ‘Niiwe oha? Abantu boona nibagonza kumanya.’ Yohana akabagambira ati: ‘Ninyowe iraka erirukwamirra omu irungu, erikwebembera abantu kubagarra hali Yahwe, nk’oku nabbi Isaya yarangire.’

Abantu bakagonza muno Yohana eby’akaba n’abegesa. Kandi baingi baali nibekaguza obwaraaba nuwe Masiya. Baitu uwe akabagambira ati: ‘Haliyo ondi arukwija kandi nankira obukuru. Tinsemeriire n’okusumurra obuguha obw’enkaito ze. Nyowe nimbatiza n’amaizi baitu ogu alibabatiza n’omwoyo ogurukwera.’